ନୂଆଦିଲ୍ଲୀ,୨୦।୫(ପି.ଟି.): ମେ’ ୨୯ ତାରିଖରେ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ)ର ସ୍ବତନ୍ତ୍ର ସାଧାରଣ ବୈଠକ (ଏଜିଏମ୍) ବସିବ। ଦେଶରେ ଅକ୍ଟୋବର ଓ ନଭେମ୍ବରରେ ଆୟୋଜନ ହେବାକୁ ଥିବା ଟି୨୦ ବିଶ୍ୱକପ ସହ ଏଥିରେ ଆଗାମୀ କ୍ରିକେଟ ସେସନ୍ ନେଇ ସବିଶେଷ ଆଲୋଚନା କରାଯିବ। କୋଭିଡ୍-୧୯ ମହମାରୀକୁ ଦୃଷ୍ଟିରେ ରଖି ଯାହାକିଛି ନିଷ୍ପତ୍ତି ନିଆଯିବ ବୋଲି କୁହାଯାଇଛି। ଏ ନେଇ ବିସିସିଆଇ ସମ୍ପାଦକ ଜୟ ଶାହା ନୋଟିସ ଜାରି କରିଛନ୍ତି।
ଭାରତରେ କୋଭିଡ୍-୧୯ର ଦ୍ୱିତୀୟ ଲହର ପ୍ରାଦୁର୍ଭାବ ଜାରି ରହିଥିବା ବେଳେ ଟି୨୦ ବିଶ୍ୱକପ ଆୟୋଜନ ନେଇ ଆଶଙ୍କା ସୃଷ୍ଟି ହୋଇଛି। ଜୁନ୍ ୧ରେ ଆଇସିସି ବୈଠକ ବସିବା ପୂର୍ବରୁ ବୋର୍ଡର ଏସ୍ଜିଏମ୍ ଆୟୋଜନ ନେଇ ନିଷ୍ପତ୍ତି ନିଆଯାଇଛି। ଆଇସିସି ବୈଠକରେ ଟି୨୦ ବିଶ୍ୱକପ୍ ଆୟୋଜନ ନେଇ ଆଲୋଚନା ହେବ ଓ ଏ ନେଇ ନିଷ୍ପତ୍ତି ନିଆଯିବ। କରୋନା ମହାମାରୀକୁ ଦୃଷ୍ଟିରେ ରଖି ଭାରତରେ ଏହି ମେଗା ଇଭେଣ୍ଟ ଆୟୋଜନ ହେବ କି ନା ସେ ନେଇ ଆଇସିସି ନିଷ୍ପତ୍ତି ନେବ। କରୋନା ପାଇଁ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ର ୧୪ତମ ସଂସ୍କରଣ ଅଧାରୁ ସସ୍ପେଣ୍ଡ କରାଯାଇଛି। ଏପରିସ୍ଥଳେ ଟି୨୦ ବିଶ୍ୱକପ୍ ପାଇଁ ୟୁନାଇଟେଡ ଆରବ ଏମିରେଟ୍ସ (ୟୁଏଇ)କୁ ବିକଳ୍ପ ଭେନ୍ୟୁ ଭାବେ ବିଚାର କରାଯାଉଛି। ବିସିସିଆଇ ଗତମାସ ଟି୨୦ ବିଶ୍ୱକପ୍ ପାଇଁ ୯ଟି ଭେନ୍ୟୁର ସଂକ୍ଷିପ୍ତ ତାଲିକା ଜାରି କରିଥିଲା। ଏହି ତାଲିକାରେ ଅହମ୍ମଦାବାଦ, ବେଙ୍ଗାଲୁରୁ, ଚେନ୍ନାଇ, ଦିଲ୍ଲୀ, ଧର୍ମଶାଳା, ହାଇଦ୍ରାବାଦ, କୋଲକାତା, ଲକ୍ଷ୍ନୌ ଓ ମୁମ୍ବାଇ ସାମିଲ ରହିଛି। ବୋର୍ଡ ଏସ୍ଜିଏମ୍ରେ ମଧ୍ୟ ଘରୋଇ କ୍ରିକେଟ ନେଇ ସବିଶେଷ ଆଲୋଚନା ହେବ।
