ରଗଡ଼ି,୧୯।୪(ଡି.ଏନ.ଏ.): ଯାଜପୁର ଜିଲାର ଗ୍ରାମାଞ୍ଚଳକୁ ପାନୀୟ ଜଳ ଯୋଗାଇବା ପାଇଁ ଗତ ୨ ବର୍ଷ ହେବ ୮୮ କୋଟି ୮୪ ଲକ୍ଷ ୫୮ ହଜାର ଟଙ୍କାର ୯୫ଟି ପ୍ରକଳ୍ପ ନିର୍ମାଣାଧୀନ ରହିଛି। ଶତାଧିକ ନଳକୂପ ଖନନ କରାଯାଉଛି। କିନ୍ତୁ ଆଜି ବି ଯାଜପୁର ଜିଲାର ବହୁ ଗ୍ରାମର ଲୋକେ ଶୁଦ୍ଧ ପାନୀୟ ଜଳ ଟିକକ ପାଇଁ ନୟାନ୍ତ ହେଉଛନ୍ତି। ଏମିତି ଏକ ଉଦାହରଣ ଦେଖିବାକୁ ମିଳିଛି କୋରେଇ ବ୍ଲକ ଅନ୍ତର୍ଗତ ଅନ୍ଧାରୀ ପଞ୍ଚାୟତ ସାହାଡ଼ାକୋଳି ଗ୍ରାମରେ। ଅନ୍ଧାରୀ ପଞ୍ଚାୟତ କାର୍ଯ୍ୟାଳୟର ପଛପାର୍ଶ୍ୱରେ ରହିଛି ସାହାଡକୋଳି ଗ୍ରାମ। ୬୫ରୁ ଊର୍ଦ୍ଧ୍ୱ ଦଳିତ ପରିବାର ବାସ କରନ୍ତି। ତେବେ ଏହି ଗ୍ରାମର ମୌଳିକ ସମସ୍ୟା ମଧ୍ୟରୁ ପାନୀୟ ଜଳ ଅଭାବ ହେଉଛି ଅନ୍ୟତମ। ଗ୍ରାମର ଗୋଟିଏ ସରକାରୀ ନଳକୂପ ଉପରେ ଗ୍ରାମବାସୀ ନିର୍ଭର କରନ୍ତି। ଏହି ନଳକୂପଟି ୨୦ ବର୍ଷରୁ ଊର୍ଦ୍ଧ୍ୱ ସମୟ ହେବ ସ୍ଥାପନ ହୋଇଥିବାରୁ ଏଥିରୁ ନିର୍ଗତ ଜଳ ବ୍ୟବହାର ଉପଯୋଗୀ ହେଉ ନ ଥିବା ଗ୍ରାମବାସୀ ଅଭିଯୋଗ କରିଛନ୍ତି। ଅନ୍ୟ କୌଣସି ଉପାୟ ନ ଥିବାରୁ ଗ୍ରାମବାସୀ ଉକ୍ତ ନଳକୂପରୁ ବାହାରୁଥିବା ଦୁର୍ଗନ୍ଧଯୁକ୍ତ ବିଷାକ୍ତ ପାଣି ବ୍ୟବହାର କରୁଛନ୍ତି। ସେହିପରି ଗ୍ରାମକୁ କଂକ୍ରିଟ ରାସ୍ତା ନ ଥିବା କାରଣରୁ ଗ୍ରାମବାସୀ ନିଜ ନିଜ ମଧ୍ୟରେ ଟଙ୍କା ଆଦାୟ କରି ଗ୍ରାମର ମୁଖ୍ୟ ଫାଟକଟିକୁ ମାଟି ମୋରମ ପକେଇ ଯାତାୟାତ କରୁଛନ୍ତି। ବର୍ଷା ହେଲେ ଗ୍ରାମକୁ ବାଇକ ଯୋଗେ ଯିବା କଷ୍ଟସାଧ୍ୟ ହୋଇ ପଡୁଛି। ଜରୁରିକାଳୀନ ଗାଡ଼ି ଯଥା ଆମ୍ବୁଲାନ୍ସ, ଦମକଳ ଆଦି ଗ୍ରାମକୁ ପଶିବା ସମ୍ଭବ ହେଉ ନ ଥିବା ଗ୍ରାମବାସୀ ଅଭିଯୋଗ କରିଛନ୍ତି। ଏନ୍ଏଚ୍ ୨୦ ରଗଡିିଠାରୁ କିଆପଦା ରାସ୍ତାକୁ ସଂଯୋଗ କରୁଥିବା ୧ କି.ମି. ଗ୍ରାମର ମୁଖ୍ୟ ଫାଟକ ରାସ୍ତାକୁ ପ୍ରଧାନମନ୍ତ୍ରୀ ଗ୍ରାମ ସଡ଼କ ଯୋଜନାରେ ସାମିଲ କରିବା ପାଇଁ ଗ୍ରାମବାସୀ ଦାବି କରି ଆସୁଛନ୍ତି। ହେଲେ କୌଣସି ସୁଫଳ ମିଳିପାରିନାହିଁ। ସେହିପରି ଗ୍ରାମରେ ଦୁଇଟି ସରକାରୀ ନଳକୂପ ପ୍ରତିଷ୍ଠା ପାଇଁ ଗ୍ରାମବାସୀ କୋରେଇ ବିଡିଓଙ୍କ ନିକଟରେ ଲିଖିତ ଭାବେ ଦାବି କରିଥିଲେ। ବିଡିଓ ଏଥିପ୍ରତି କୌଣସି ପଦକ୍ଷେପ ନେଉ ନ ଥିବା ଗ୍ରାମବାସୀ ଅଭିଯୋଗ କରିଛନ୍ତି।
