ଖୋର୍ଦ୍ଧା ଅଫିସ, ୨ା୧: ଖୋର୍ଦ୍ଧା ଜିଲାର ଅନ୍ୟତମ ପ୍ରମୁଖ ପର୍ଯ୍ୟଟନସ୍ଥଳୀ ହେଉଛି ବରୁଣେଇ ପୀଠ। ଶୀତଋତୁ ଆସିଗଲେ ଏଠାରେ ପର୍ଯ୍ୟଟକଙ୍କ ଭିଡ଼ ଜମେ। ପର୍ଯ୍ୟଟକମାନେ ମା’ ବରୁଣେଇ ଓ କରୁଣେଇଙ୍କ ଦର୍ଶନ ସହ ପାହାଡ଼ ଉପରେ ବୁଲି ପ୍ରାକୃତିକ ପରିବେଶ ଉପଭୋଗ କରନ୍ତି। ସେହିପରି ବଣଭୋଜିର ଆୟୋଜନ ମଧ୍ୟ କରିଥାନ୍ତି। ଏଠାରେ ବଣଭୋଜି ପାଇଁ ପ୍ରଶାସନ ଓ ପର୍ଯ୍ୟଟନ ବିଭାଗ ପକ୍ଷରୁ ସ୍ବତନ୍ତ୍ର ସୁବିଧା କରାଯାଇଛି। ବର୍ତ୍ତମାନ କୋଭିଡ୍ କଟକଣା କୋହଳ ପରେ ବରୁଣେଇ ପୀଠ ଖୋଲିଲାଣି। ଧୀରେ ଧୀରେ ପର୍ଯ୍ୟଟକଙ୍କ ଆଗମନ ମଧ୍ୟ ଆରମ୍ଭ ହେଲାଣି। ତେବେ ଏହି ପୀଠରେ କେତେକ ସମସ୍ୟା ଦୂର ହୋଇପାରିନାହିଁ। ପାନୀୟଜଳ ଟ୍ୟାପ୍ ଅଚଳ ହୋଇପଡ଼ିଥିବାବେଳେ ବରୁଣେଇ ମନ୍ଦିରକୁ ଯିବା ଲାଗି ଉଦ୍ଦିଷ୍ଟ ପାହାଚ ଫାଟି ଆଁ କରିଛି। ପାହାଚରେ ଗଛ ଭାଙ୍ଗି କାଠଗଣ୍ଡି ପଡ଼ିରହିଛି। ବରୁଣେଇରୁ ଜଳସ୍ରୋତ ବୋହି ଆସି ରାସ୍ତାରେ ଜମି ଶିଉଳି ଲାଗିଛି। ଫଳରେ ପର୍ଯ୍ୟଟକମାନେ ପୀଠକୁ ଯାତାୟାତ ଲାଗି ହଇରାଣ ହେଉଛନ୍ତି।
ସ୍ବଚ୍ଛ ସର୍ବେକ୍ଷଣ ତାଲିକାରେ ଶୀର୍ଷତା ହାସଲ ଲାଗି ଖୋର୍ଦ୍ଧା ପୌର ପରିଷଦ ପକ୍ଷରୁ ଅଭିଯାନ ଚାଲିଛି। ତେବେ ଏହି ପୀଠର ସ୍ବଚ୍ଛତା ପ୍ରତି ପୌର ପ୍ରଶାସନ ବିଶେଷ ଧ୍ୟାନ ଦେଉ ନ ଥିବା ମନେହେଉଛି। କାରଣ ଏଠାକାର ସ୍ବଚ୍ଛତା ଦାୟିତ୍ୱ ଏକ ଘରୋଇ ସଂସ୍ଥାକୁ ଦିଆଯାଇଛି। ସମ୍ପୃକ୍ତ ସଂସ୍ଥା ଠିକ୍ ଭାବେ ଦାୟିତ୍ୱ ତୁଲାଉ ନ ଥିବା ସାଧାରଣରେ ଅଭିଯୋଗ ହେଉଛି। ଫଳରେ ପର୍ଯ୍ୟଟକଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଉଛି। ଭୁବନେଶ୍ୱରରୁ ଏଠାକୁ ବୁଲି ଆସିଥିବା ଗଗନ ଦାସ କହିଛନ୍ତି, ଶିଳ୍ପାଞ୍ଚଳକୁ ସଂଯୋଗ କରୁଥିବା ଏହି ରାସ୍ତାର ଉଭୟ ପାଶର୍ବରେ ଗାଡ଼ି ପାର୍କିଂ ଯୋଗୁ ଟ୍ରାଫିକ ସମସ୍ୟା ସୃଷ୍ଟି ହେଉଛି। ଯାତାୟାତ ବେଳେ ପର୍ଯ୍ୟଟକ ଅସୁବିଧାର ସମ୍ମୁଖୀନ ହେଉଛନ୍ତି। ସେହିପରି କରୋନା କଟକଣା ଯୋଗୁ ଏହି ପୀଠ ଦୀର୍ଘ ୯ ମାସ ଧରି ବନ୍ଦ ରହିଥିଲା। ଫଳରେ ଉକ୍ତ ସ୍ଥାନ ଅସାମାଜିକ ବ୍ୟକ୍ତିଙ୍କ ଆଡ୍ଡାସ୍ଥଳୀ ପାଲଟିଛି। ବନ ବିଭାଗର ନିଷ୍କ୍ରିୟତା ଯୋଗୁ ବରୁଣେଇ ପାହାଡ଼ ପଦା ହେବାରେ ଲାଗିଛି। ଦୈନିକ ପ୍ରାୟ ଲକ୍ଷାଧିକ ଟଙ୍କାର କାଠ ଚୋରା ଚାଲାଣ ହେଉଛି। କରୋନା ସମୟରେ କୋଟିଏରୁ ଊଦ୍ଧର୍ବ ମୂଲ୍ୟର କାଠ ଚୋରି ହୋଇଥିବା ଜଣାପଡ଼ିଛି। ଗୋଟିଏ ପଟେ ପର୍ଯ୍ୟଟକଙ୍କୁ ମୌଳିକ ସୁବିଧା ମିଳୁ ନ ଥିବା ବେଳେ ଅନ୍ୟପଟେ ଏହାର ମନୋରମ ପ୍ରାକୃତିକ ପରିବେଶ ନଷ୍ଟ ହେବାରେ ଲାଗିଛି। ପର୍ଯ୍ୟଟନ ବିଭାଗ କେବଳ ନାମଫଳକ ଟାଙ୍ଗିଦେଇ କାମ ସାରିଦେଇଛି। ଉପଯୁକ୍ତ ରକ୍ଷଣାବେକ୍ଷଣ ଅଭାବରୁ ଏହା ନିଜର ଗୌରବ ହରାଇବାକୁ ବସିଛି। ଏ ନେଇ ପୌର ପରିଷଦର କାର୍ଯ୍ୟନିର୍ବାହୀ ଅଧିକାରୀ ଶ୍ୱେତପଦ୍ମା ଶତପଥୀଙ୍କୁ ପଚରିବାରେ କହିଛନ୍ତି, କରୋନା ଲାଗି ଏହି ସ୍ଥାନକୁ ପର୍ଯ୍ୟଟକଙ୍କ ବାରଣ ରହିଥିଲା। ଏବେ ଖୋଲିବାକୁ ଯାଉଥିବାରୁ ଭିତ୍ତିଭୂମି ସଜାଡ଼ିବା ଉପରେ ଗୁରୁତ୍ୱ ଦିଆଯିବ।
