ଆର.ଉଦୟଗିରି,୧୫ା୭(ଡି.ଏନ୍.ଏ.)-ଗଜପତି ଜିଲା ଆର୍.ଉଦୟଗିରି ପଞ୍ଚାୟତର ଜଣେ ଆୟୁଷ ଡ଼ାକ୍ତର, ସ୍ବାସ୍ଥ୍ୟକର୍ମୀ ଓ ହୋମ୍ଗାର୍ଡ କରୋନା ସଂକ୍ରମିତ ହେବାପରେ ସେମାନେ ରହୁଥିବା ପଞ୍ଚାୟତର ୩ ସାହିକୁ ୭ଦିନ ପାଇଁ କଣ୍ଟେନ୍ମେଣ୍ଟ ଜୋନ୍ ଘୋଷଣା କରିଥିଲା ପ୍ରଶାସନ। ପ୍ରବେଶ ପଥରେର ବ୍ୟାରିକେଡ୍ କରି ସିଲ୍ କରାଯାଇଥିଲା। ମାତ୍ର ଅମାନିଆ ବ୍ୟାରିକେଡ୍ ଡେଇଁ ଅନ୍ୟସାହିକୁ ଯାତାୟାତ କଲେ। ଫଳରେ ସରପଞ୍ଚ ସଞ୍ଜୁକ୍ତା ପୂଜାରୀ ୧୪ ରୁ ୧୭ ତାରିଖ ପର୍ଯ୍ୟନ୍ତ ସମ୍ପୂର୍ଣ୍ଣ ଶଟ୍ଡାଉନ ଘୋଷଣା କରିଥିଲେ। ତଥାପି ଅମାନିଆ ମାନୁ ନାହାନ୍ତି। ଜଣେ ଦୋକାନୀ ବାଡଡେଉଁ ବଜାରରୁ ସାମଗ୍ରୀ କିଣିଥିବା ଖବର ପାଇ ବିଡିଓ ପ୍ରଦୀପ କୁମାର ନାୟକ ଷ୍ଟାଫ ସହ ପହଞ୍ଚତ୍ଥିଲେ। ଏପରି ନ କରିବାକୁ ସମ୍ପୃକ୍ତ ବେପାରୀଙ୍କୁ କହିବାରୁ ସେ ବିଡିଓଙ୍କ ସହ ଯୁକ୍ତିତର୍କ ସହ ଦୁର୍ବ୍ୟବହାର କରିଥିଲେ। ସମ୍ପୃକ୍ତ ୩ କରୋନା ଯୋଦ୍ଧା ବହୁ ଲୋକଙ୍କ ସଂସ୍ପର୍ଶରେ ଆସିଥିବାରୁ ଗୋଷ୍ଠୀ ସଂକ୍ରମଣ ଆଶଙ୍କା ରହିଛି। ପ୍ରଶାସନ ତରଫରୁ ବୁଝାଇଲେ ଓଲଟା ଦୁର୍ବ୍ୟବ୍ୟବହାରର ଶିକାର ହେଉଛୁ ବୋଲି ବିଡିଓ କହିଛନ୍ତି।
କଣ୍ଟେନ୍ମେଣ୍ଟ ଜୋନ୍ରେ ପୋଲିସ ରହୁ ନ ଥିବାରୁ ଲୋକେ ବାଡ ଡେଇଁ କ୍ଷୀର ବିକିବାକୁ ଯିବା ସହ ନାଳରେ ଗାଧୋଉଛନ୍ତି। ଏନେଇ ଗ୍ରାମରେ ଅସନ୍ତୋଷ ଦେଖାଦେଇଛି। କେତେଜଣ ଅମାନିଆଙ୍କ ପାଇଁ ବିପଦ ମାଡିଆସିବ ବୋଲି ଲୋକେ କହିଛନ୍ତି। ଏଥିପ୍ରତି ଜିଲା ପ୍ରଶାସନ ଦୃଷ୍ଟି ଦେବାକୁ ବୁଦ୍ଧିଜୀବୀ ଦାବି କରିଛନ୍ତି।
