ନାଉଗାଁ,୧୪।୫(ସ୍ବ.ପ୍ର.): ନାଉଗାଁ ତହସିଲ ଅନ୍ତର୍ଗତ ନାଉଗାଁ-ଡାବର, ବାଲିକୁଦା-ଗଙ୍ଗଦାହାଟ, ଇଚ୍ଛାପୁର-ଗୋଠଦାକୁ ସଂଯୋଗୀକରଣ ରାସ୍ତା ରହିଛି। ଏହି ରାସ୍ତାଗୁଡ଼ିକ ଗ୍ରାମ୍ୟ ଉନ୍ନୟନ ବିଭାଗ ଅଧୀନରେ ରହିଛି। ଉକ୍ତ ରାସ୍ତାକୁ ବିଭାଗ ପକ୍ଷରୁ ପୁନଃ ସମ୍ପ୍ରସାରଣ ଓ ନିର୍ମାଣ କାର୍ଯ୍ୟ ଜାରି ରହିଛି। ରାସ୍ତା ସମ୍ପ୍ରସାରଣ ଯୋଗୁ ଜନସାଧାରଣ ଅସୁବିଧାର ସମ୍ମୁଖୀନ ହେଉଛନ୍ତି। ଅପରପକ୍ଷେ ଠିକାଦାର ମନମୁଖିଭାବେ ମାଟି ତାଡି ନେଉଛନ୍ତି। ଏହାସତ୍ତ୍ୱେ ରାଜସ୍ବ ବିଭାଗ କୌଣସି କାର୍ଯ୍ୟାନୁଷ୍ଠାନ ନ ନେଇ ଚୁପ୍ ବସି ରହିଛି। ସୂଚନାଯୋଗ୍ୟ, ଜାମୁଗାଁ, ତିରୁଣା ଡାବର ପଞ୍ଚାୟତ ଦେଇ ବାଉଁଶ ଯୋରି ନାଳ ପ୍ରବାହିତ ହେଉଛି। ଏହି ପଞ୍ଚାୟତରେ ଚାଷୀମାନଙ୍କ ପାଇଁ ଜଳ ସେଚନ ସୁବିଧା ନାହିଁ। ସେମାନେ ବର୍ଷା ଜଳ ଉପରେ ନିର୍ଭର କରି ଚାଷ କାର୍ଯ୍ୟ କରିଥାନ୍ତି। ନିକଟରେ ପ୍ରବାହିତ ବାଉଁଶ ଯୋରିଦୀର୍ଘ ଦିନ ହେବ ସଫେଇ ନ ହେବା ଓ ନାଳର ଉଭୟ ପାର୍ଶ୍ୱରେ ବନ୍ଧ ନ ଥିବାରୁ ଉକ୍ତ ପଞ୍ଚାୟତର ଅଧିକାଂଶ ଚାଷ ଜମିରେ ଥିବା ବର୍ଷା ଜଳ ଅବାଧରେ ଯୋରି ମଧ୍ୟକୁ ପ୍ରବେଶ କରିଥାଏ। ଫଳରେ ଚାଷ କାର୍ଯ୍ୟରେ ବାଧା ଉପୁଜିଥାଏ। ୨୦୨୦-୨୧ ଆର୍ଥତ୍କ ବର୍ଷରେ ଜଳ ସମ୍ପଦ ବିଭାଗ ପକ୍ଷରୁ ୧ କୋଟି ୯୬ ଲକ୍ଷ ଟଙ୍କା ଖର୍ଚ୍ଚ କରାଯାଇ ଉକ୍ତ ନାଳକୁ ସଫେଇ କରାଯାଇଥିଲା। ଏହାର ୨ ପାର୍ଶ୍ୱରେ ବନ୍ଧ ନିର୍ମାଣ କରାଯାଇଥିଲା। ଏହାଦ୍ୱାରା ବର୍ଷା ଜଳ ଚାଷ ଜମିରେ ମହଜୁଦ ହୋଇ ରହିପାରିବ ବୋଲି କୁହାଯାଇଥିଲା।
ମାତ୍ର ଏବେ ରାସ୍ତା କାର୍ଯ୍ୟ ପାଇଁ ତିରୁଣା-ଦେଓପଡା ରାସ୍ତା ନିକଟରେ ଥିବା ଏହି ବନ୍ଧ ଓ ନାଳପଠାକୁ ଗ୍ରାମ୍ୟ ଉନ୍ନୟନ ବିଭାଗ ତରଫରୁ କାର୍ଯ୍ୟ କରୁଥିବା ଠିକାଦାର ସମ୍ପୂର୍ଣ୍ଣ ତାଡି ନେଉଛନ୍ତି। ଫଳରେ ଜମିରୁ ସମସ୍ତ ପାଣି ନାଳକୁ ଚାଲିଯିବାର ଆଶଙ୍କା ରହିଛି। ଏନେଇ ଚାଷୀମାନେ ଅସନ୍ତୋଷବ୍ୟକ୍ତ କରିଛନ୍ତି। ସେହିପରି ତିରୁଣା ଓ ଶାଳପଦା ମୌଜାର ଗୋଡ଼ିଢିହ ନିକଟରେ ଥିବା ଗୋଚର ଜମିକୁ ଗୃହପାଳିତ ପ୍ରାଣୀ ଚାରଣ ଭୂଇଁ ଭାବେ ବ୍ୟବହାର କରନ୍ତି। ମାତ୍ର ଉକ୍ତ ଭୂମରୁ ମଧ୍ୟ ମାଟି ତାଡି ନିଆଯାଉଛି। ଫଳରେ ବର୍ଷା ଦିନେ ଗୃହପାଳିତ ପ୍ରାଣୀମାନେ ଅସୁବିଧାରେ ସମ୍ମୁଖୀନ ହେବାର ଆଶଙ୍କା ରହିଛି।
ଏ ସମ୍ପର୍କରେ ଡେରିକି ରାଜସ୍ବ ନିରୀକ୍ଷକ ରାଜେଶ ସାହୁ କହିଛନ୍ତି, ନିୟମ ମୁତାବକ ଠିକାଦାରଙ୍କୁ ୬ଇଞ୍ଚର ମାଟି ଉଠାଇବା ପାଇଁ ନିର୍ଦ୍ଦେଶ ଦିଆଯାଇଛି। ମାତ୍ର ଅଧିକ ମାଟି ଖୋଳା ହୋଇଥିବାରୁ ତହସିଲଦାରଙ୍କୁ ଲିଖିତ ଭାବେ ଜଣାଯାଇଛି। ସେହିପରି ଜଳସମ୍ପଦ ବିଭାଗ ଅଧୀକ୍ଷଣ ଯନ୍ତ୍ରୀ ହରେକୃଷ୍ଣ ବେହେରା କୁହନ୍ତି, ନାଳର ତଦାରଖ କରିବା ଆମ ଦାୟିତ୍ୱ। କିନ୍ତୁ ମାଟି ତାଡିବା ସମ୍ପର୍କରେ ସ୍ଥାନୀୟ ତହସିଲଦାର ପଦକ୍ଷେପ ନେବେ ବୋଲି କହିଛନ୍ତି। ତହସିଲଦାର ଜେ.କଳ୍ପନାଙ୍କୁ ଏସଂକ୍ରାନ୍ତରେ ପଚାରିବାରେ କେତେ ମାଟି ତଡା ଯାଇଛି ତଦନ୍ତ ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ମତଦେଇଛନ୍ତି।
