ଭୁବନେଶ୍ୱର,୨୫।୮: ବ୍ୟାଙ୍କ ଅଫ୍ ବରୋଦା (ବିଓବି) ଉଚ୍ଚ ସୁଧ ହାର ପ୍ରଦାନ କରୁଥିବା ଏକ ସ୍ବତନ୍ତ୍ର ସ୍ଥିର ଜମା ଉତ୍ପାଦ ‘ବରୋଦା ତ୍ରିରଙ୍ଗା ଜମା ଯୋଜନା’ର ଶୁଭାରମ୍ଭ ସମ୍ପର୍କରେ ଘୋଷଣା କରାଯାଇଛି। ବରୋଦା ତିରଙ୍ଗା ଜମା ୨ଟି ଅବଧିରେ ଉପଲବ୍ଧ ଯଥା ୪୪୪ ଦିନର ଯୋଜନା ପାଇଁ ୫.୭୫% ଏବଂ ୫୫୫ ଦିନ ଯୋଜନା ପାଇଁ ୬% ବାର୍ଷିକ ସୁଧହାର ପ୍ରଦାନ କରାଯାଉଛି। ଏହି ଯୋଜନା ଚଳିତ ବର୍ଷ ଡିସେମ୍ବର ୩୧ ପର୍ଯ୍ୟନ୍ତ ଉପଲବ୍ଧ ହେବ। ଏହା ୨ କୋଟିରୁ କମ୍ ଟଙ୍କାର ଖୁଚୁରା ଜମା ପାଇଁ ପ୍ରଯୁଜ୍ୟ ରହିଛି। ସେହିଭଳି ବରିଷ୍ଠ ନାଗରିକମାନଙ୍କୁ ବାର୍ଷିକ ୦.୫୦% ଅତିରିକ୍ତ ସୁଧହାର ଯୋଗାଇ ଦିଆଯାଉଥିବାବେଳେ ଫେରସ୍ତ ହୋଇ ନ ଥିବା ଜମା ଉପରେ ବାର୍ଷିକ ୦.୧୫% ଅତିରିକ୍ତ ସୁଧ ହାର ପ୍ରଦାନ କରାଯିବ ବୋଲି ବ୍ୟାଙ୍କ ପକ୍ଷରୁ କୁହାଯାଇଛି। ଏ ସମ୍ପର୍କରେ ବିଓବିର କାର୍ଯ୍ୟନିର୍ବାହୀ ନିର୍ଦ୍ଦେଶକ ଅଜୟ କେ.ଖୁରାନା କହିଛନ୍ତି, ଭାରତ ସ୍ବାଧୀନତାର ୭୫ବର୍ଷ ପୂର୍ତ୍ତି ଅବସରରେ ଆମେ ଆମର ଗ୍ରାହକମାନଙ୍କୁ ଆଉ ଏକ ଉତ୍ସବ ପାଳନ କରିବାର ସୁଯୋଗ ଦେଇପାରିଥିବାରୁ ଆନନ୍ଦ ମନେକରୁଛୁ।
