ବରଗଡ଼,୧୫।୭(ପ୍ରେମାନନ୍ଦ ଖମାରୀ):ବରଗଡ଼ ନିଶା କାରବାରର ହବ ପାଲଟିଛି। ଏଠାରେ କଫ୍ ସିରପଠାରୁ ଆରମ୍ଭ କରି ଗଞ୍ଜେଇ, ବ୍ରାଉନସୁଗାର ଆଦି ନିଶା କାରବାର ଚାଲିଛି। ପୋଲିସ ଥରକୁଥର ଚଢ଼ାଉ କରି ସେଭଳି ନିଶାଦ୍ରବ୍ୟ ଜବତ କରୁଛି। ଅଭିଯୁକ୍ତମାନେ ମଧ୍ୟ ଗିରଫ ହେଉଛନ୍ତି। ମାତ୍ର ଦୀର୍ଘଦିନରୁ ଚାଲି ଆସୁଥିବା ଏହି କାରବାର ଉପରେ ସମ୍ପୁର୍ଣ୍ଣ ଅଙ୍କୁଶ ଲାଗି ପାରୁ ନାହିଁ। ରାଜଧାନୀ ଭୁବନେଶ୍ୱରଠାରୁ ଆରମ୍ଭ କରି କଟକ ଆଦି ଅଞ୍ଚଳରୁ ବରଗଡ଼କୁ କଫ୍ ସିରପ୍ ଚାଲାଣ ହେଉଛି। ସେହିପରି ବୌଦ୍ଧ, କନ୍ଧମାଳ, ସୋନପୁର ଦେଇ ବରଗଡ଼କୁ ଗଞ୍ଜେଇ ଆସୁଥିବାବେଳେ ପଡ଼ୋଶୀ ଛତିଶଗଡ଼ ରାଜ୍ୟକୁ ମଧ୍ୟ ଏହି ବାଟରେ ଗଞ୍ଜେଇ ଚାଲାଣ ହେଉଛି। କିଛି ବଡ଼ବଡ଼ିଆଙ୍କ ଛତ୍ରଛାୟା ତଳେ ଏଭଳି ବେଆଇନ କାରବାର ଚାଲି ଆସୁଥିବାରୁ ଜିଲାରେ ସେଭଳି ନିଶା କାରବାରକୁ ଦମନ କରାଯାଇ ପାରୁ ନାହିଁ ବୋଲି ସାଧାରଣରେ ଚର୍ଚ୍ଚା ଜୋର୍ ଧରୁଛି। ଅନ୍ୟପଟେ ଅପରାଧରେ ଛୋଟ କିମ୍ବା ବଡ଼ବଡ଼ିଆ ମଧ୍ୟରେ ପ୍ରଭେଦ ନାହିଁ, ଯେ କେହି ବି ସମ୍ପୃକ୍ତ ଅଛନ୍ତି, ସେମାନଙ୍କୁ ଗିରଫ କରାଯାଉଛି ଏବଂ ଆଗକୁ ମଧ୍ୟ ସମ୍ପୃକ୍ତି ଜଣାପଡ଼ିଲେ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ବରଗଡ଼ ଏସ୍ପି ରବୀନ୍ଦ୍ରନାଥ ଶତପଥୀ କହିଛନ୍ତି। ମଙ୍ଗଳବାର ଅପରାହ୍ନ ପ୍ରାୟ ୨ଟା ୩୦ମିନିଟ୍ ସମୟରେ ବରଗଡ଼ ଟାଉନ ଥାନା ପୋଲିସ ସହର ମଧ୍ୟରୁ ବିପୁଳ ପରିମାଣରେ କଫ୍ ସିରପ ଜବତ କରିଛି। ସ୍ଥାନୀୟ ଏକ ହୋଟେଲ ପଛପଟେ କଫ୍ ସିରପ କାରବାର ଚାଲୁଥିବାବେଳେ ପୋଲିସ ୪ ଅଭିଯୁକ୍ତଙ୍କୁ ଗିରଫ କରିଛି। ଗିରଫ ଅଭିଯୁକ୍ତମାନେ ହେଲେ, ବରଗଡ଼ ପୌର ପରିଷଦ ଅଧୀନ ୱାର୍ଡ଼ ନଂ-୫ ବିଶିପଡ଼ାର ଅର୍ଜୁନ ନାୟକ(୨୫), ୱାର୍ଡ଼ ନଂ-୧୯ ରେଳ ଷ୍ଟେଶନ ରାସ୍ତାର ଚନ୍ଦନ ଚକ୍ରବର୍ତ୍ତୀ(୪୦), ୱାର୍ଡ଼ ନଂ-୨ ନଦୀପଡ଼ାର ସୁଶାନ୍ତ ନାଗ(୩୨) ଏବଂ ୱାର୍ଡ଼ ନଂ-୧୧ ବାଞ୍ଜିପଡ଼ାର ବିଜୟ ନାଗ(୪୨)ଙ୍କୁ ଗିରଫ କରିଛି। ସେମାନଙ୍କ ପାଖରୁ ୭୨୦ବୋତଲ କଫ୍ ସିରପ, ନଗଦ ୫୧୦୦ ଟଙ୍କା, ଏକ ହୋଣ୍ଡା ଆକ୍ଟିଭା ଗାଡ଼ି(ନଂ-ଓଡ଼ି୧୭ଏସି ୫୫୮୦), ସୁଜୁକି ଏକ୍ସେସ୍ ୧୨୫ ଗାଡ଼ି(ଓଡ଼ି୧୭ଏଡ଼ି ୬୮୬୯) ଏବଂ ୨ଟି ମୋବାଇଲ ଜବତ ହୋଇଛି। ଏ ନେଇ ବରଗଡ଼ ଟାଉନ ଥାନାରେ ଏକ ମାମଲା(ନଂ-୪୦୦/୨୬) ରୁଜୁ ହୋଇଛି।
ଏ ସମ୍ପର୍କରେ ଅନୁଷ୍ଠିତ ଖବରଦାତା ସମ୍ମିଳନୀରେ ସୂଚନା ଦେଇ ଏସ୍ପି ଶତପଥୀ କହିଥିଲେ, ଜବତ ହୋଇଥିବା କଫ୍ ସିରପ୍ ଭୁବନେଶ୍ୱରରୁ ଏଠାକୁ ଆସିଥିବା ପ୍ରାଥମିକ ତଦନ୍ତରୁ ଜଣାପଡ଼ିଛି। ଏହି କାରବାରର କିଙ୍ଗପିନ୍ ଚିହ୍ନଟ ହୋଇ ସାରିଛନ୍ତି ଏବଂ ତାଙ୍କୁ ମଧ୍ୟ ଗିରଫ କରାଯିବ। ପୂର୍ବରୁ ଧରାପଡ଼ିଥିବା କଫ୍ ସିରପ୍ ଓ ଗଞ୍ଜେଇ କାରବାରର କିଙ୍ଗପିନ୍ମାନେ ଏସଟିଏଫ୍ ଜାଲରେ ପଡ଼ି ଏବେ ଜେଲ୍ରେ ଥିବା ଏସ୍ପି ଶତପଥୀ କହିଥିଲେ।
Dharitri – Odisha’s No.1 Odia Daily
