ବାରଙ୍ଗ, ୨୭।୧୧ (ଡି.ଏନ୍.ଏ.): ଶୀତ ସହ ପର୍ଯ୍ୟଟନ ଋତୁ ଆରମ୍ଭ ହୋଇଯାଇଥିବା ବେଳେ ରାଜ୍ୟର ବିଭିନ୍ନ ପର୍ଯ୍ୟଟନ ସ୍ଥଳକୁ ପର୍ଯ୍ୟଟକ ଯିବା ଆରମ୍ଭ ହୋଇଗଲାଣି। ଏହି ପରିପ୍ରେକ୍ଷୀରେ ନନ୍ଦନକାନନ ଓ ବଟାନିକାଲ ଗାର୍ଡେନରେ ପର୍ଯ୍ୟଟକଙ୍କ ସଂଖ୍ୟା ଧୀରେ ଧୀରେ ବଢିବାକୁ ଲାଗିଛି। ଉଭୟ ପାର୍କ ଅଗଷ୍ଟ ୩ରେ ଖୋଲିଥିବା ବେଳେ ଏହାଭିତରେ ନନ୍ଦନକାନନରେ ପର୍ଯ୍ୟଟକମାନଙ୍କ ସଂଖ୍ୟା ୫ଲକ୍ଷ ଟପିଲାଣି। ଏବେ ପର୍ଯ୍ୟଟନ ଋତୁ ଚାଲୁଥିବାରୁ ପର୍ଯ୍ୟଟକମାନଙ୍କୁ ଅଧିକ ଆକୃଷ୍ଟ କରିବା ପାଇଁ ବଟାନିକାଲ ଗାର୍ଡେନରେ ବଣଭୋଜି କରିବାର ବ୍ୟବସ୍ଥା କରାଯାଇଛି। ଡିସେମ୍ବର ୫ ତାରିଖଠାରୁ ପର୍ଯ୍ୟଟକ ଏଠାରେ ବଣଭୋଜି କରିପାରିବେ ବୋଲି ନନ୍ଦନକାନନ କର୍ତ୍ତୃପକ୍ଷ ଶୁକ୍ରବାର ସୂଚନା ଦେଇଛନ୍ତି। ପାଖାପାଖି ୩ମାସର ବ୍ୟବଧାନ ପରେ ବଟାନିକାଲ ଗାର୍ଡେନରେ ବଣଭୋଜିର ମଜା ଉଠାଇବାକୁ ଯାଉଛନ୍ତି ପର୍ଯ୍ୟଟକ। ଏଥିପାଇଁ ପ୍ରସ୍ତୁତି ପର୍ବ ଆରମ୍ଭ ହୋଇଯାଇଛି। ଉଚ୍ଚ ପଦାଧିକାରୀ ଏଥିପାଇଁ ନନ୍ଦନକାନନକୁ ସ୍ବୀକୃତି ପ୍ରଦାନ କରିଛନ୍ତି। ତେବେ ପ୍ରାଥମିକ ପର୍ଯ୍ୟାୟରେ ଛୋଟ ଛୋଟ ଗ୍ରୁପକୁ ବଣଭୋଜି କରିବା ପାଇଁ ସୁଯୋଗ ଦିଆଯିବ ବୋଲି କର୍ତ୍ତୃପକ୍ଷ କହିଛନ୍ତି। ବଟାନିକାଲ ଗାର୍ଡେନରେ ବଣଭୋଜି କରିବା ପାଇଁ ପର୍ଯ୍ୟଟକଙ୍କ ବିଶେଷଭାବେ ଆଗ୍ରହ ରହିଥାଏ। ପୂର୍ବରୁ ବଟାନିକାଲ ଗାର୍ଡେନକୁ ନନ୍ଦନକାନନ କର୍ତ୍ତୃପକ୍ଷ ଖୋଲିଥିଲେ ମଧ୍ୟ ବଣଭୋଜି ପାଇଁ ଅନୁମତି ଦେଇ ନ ଥିଲେ। ଏବେ ଡିସେମ୍ବର୧ରୁ ବଣଭୋଜିର ସୁବିଧା ପର୍ଯ୍ୟଟକମାନେ ପାଇପାରିବା ସହ ପ୍ରାଥମିକ ପର୍ଯ୍ୟାୟରେ ସୀମିତ ସଂଖ୍ୟାରେ ଲୋକଙ୍କୁ ନେଇ (୨୦ରୁ ୩୦) ବଣଭୋଜି କରିବାକୁ ଅନୁମତି ମିଳିଛି। ଏଥିନିମନ୍ତେ ପର୍ଯ୍ୟଟକମାନେ ସେମାନେ ଅନ୍ଲାଇନରେ ପିଣ୍ଡି ବୁକିଂ କରିପାରିବେ ବୋଲି ଭୁବନେଶ୍ୱର ଆଞ୍ଚଳିକ ବନ ସଂରକ୍ଷକ ତଥା ନନ୍ଦନକାନନ ନିର୍ଦ୍ଦେଶକ ମନୋଜ କୁମାର ମହାପାତ୍ର ସୂଚନା ଦେଇଛନ୍ତି।
