ଭୁବନେଶ୍ୱର,୨୪।୯ (ବ୍ୟୁରୋ): ରାଜଧାନୀରେ ଚଳାଚଳ କରୁଥିବା ମୋ ବସ୍ରେ ଚୋରି କରୁଥିଲେ ବନ୍ଜାରା। ଭିଡ଼ ଭିତରେ ଆଖି ପିଛୁଳାକେ ଯାତ୍ରୀଙ୍କଠାରୁ ମୋବାଇଲ ଫୋନ୍, ଟଙ୍କା ଆଦି ସାମଗ୍ରୀ ଚୋରି କରି ଚମ୍ପଟ ମାରୁଥିଲେ। ଶେଷରେ ଏହି ବନ୍ଜାରା ଗ୍ୟାଙ୍ଗ୍ର ଦୁଇ ମୁଖ୍ୟଙ୍କୁ ଯାଜପୁରରୁ ଗିରଫ କରିଛି ଶହୀଦନଗର ଥାନା ପୋଲିସ। ସେମାନେ ହେଲେ ଯାଜପୁର ଧାନମଣ୍ଡଳ ରେଳ ଷ୍ଟେଶନ ନିକଟରେ ରହୁଥିବା ପଶ୍ଚିମବଙ୍ଗର ସଞ୍ଜୟ ସିଂ ଓ ଯାଜପୁରର ଗଣେଶ ପ୍ରଧାନ। ସେମାନଙ୍କଠାରୁ ୧୫ ମୋବାଇଲ ଫୋନ, ସୁନା କାନଫୁଲ, ସାଢେ ୫ ହଜାର ଟଙ୍କା, ୨ ଲାପଟପ୍, ପର୍ସ ଆଦି ଜବତ କରିଛି। ବୁଧବାର ଜଣେ କ୍ୟାନ୍ସର ପୀଡିତଙ୍କଠାରୁ ୧୫ହଜାର ଟଙ୍କା ଚୋରି ଓ ଗୁରୁବାର ଦୁଇ ଛାତ୍ରୀଙ୍କ ମୋବାଇଲ୍ ଫୋନ୍ ଚୋରି ଘଟଣାରେ ଏମାନଙ୍କର ସମ୍ପୃକ୍ତି ଥିବା ପୋଲିସ ଜାଣିବାକୁ ପାଇଛି। ମାମଲା ନଂ.୪୫୧/୨୦୨୨ରେ ଅଭିଯୁକ୍ତଦ୍ୱୟଙ୍କୁ ପୋଲିସ କୋର୍ଟଚାଲାଣ କରିଥିଲା। ଜାମିନ ନାମଞ୍ଜୁର ହେବାରୁ ଉଭୟଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି। ତେବେ ଏହି ରାକେଟରେ ବହୁ ମହିଳା ଓ କେତେଜଣ ଛୋଟପିଲା ସାମିଲ ଥିବା ଡିସିପି ପ୍ରତୀକ ସିଂ କହିଛନ୍ତି। ଏମାନେ ସାଧାରଣତଃ ପରିତ୍ୟକ୍ତ ଘରେ, ରାସ୍ତା କଡ, ଷ୍ଟେଶନ ଆଦିରେ ରହିଥାନ୍ତି। ତେଣୁ ସେମାନଙ୍କୁ ଚିହ୍ନଟ କରାଯାଇ ଖୁବ୍ଶୀଘ୍ର ଧରାଯିବାକୁ ଉଦ୍ୟମ ଜାରି ରହିଛି। ଏମାନେ ଗ୍ୟାଙ୍ଗ ବା ଏକାଠି ହୋଇ ବସ୍ରେ ପଶି ଭିଡ଼ ସୃଷ୍ଟି କରିବା ପରେ ପ୍ୟାଣ୍ଟ ପଛ ପକେଟ, ବ୍ୟାଗ ପଛ ପଟେ ଥିବା ଜିନିଷ ଆଦିକୁ ଅତି ଚତୁରତାର ସହ ଚୋରି କରିଥାନ୍ତି। ଏଥିସହ ଏହି ଗ୍ୟାଙ୍ଗର ସଦସ୍ୟମାନେ ପାଣି ପିଇବା କିମ୍ବା ଭିକ ମାଗିବା ବାହାନା କରି ଦିନରେ ଖୋଲା ଥିବା ଘର ଭିତରୁ ଚୋରି କରି ଫେରାର ହୋଇଯାଇଥାନ୍ତି। ଆଗକୁ ଦୁର୍ଗା ପୂଜା ଆସୁଥିବାରୁ ଏହି ଗ୍ୟାଙ୍ଗ ଅଧିକ ସକ୍ରିୟ ରହିବ। ତେଣୁ ଚୋରି କିମ୍ବା ଲୁଟ୍ରୁ ବର୍ତ୍ତିବା ଲାଗି ସତର୍କ ରହିବାକୁ ଡିସିପି ସିଂ ଅପିଲ କରିଛନ୍ତି। ମୋ ବସ୍ରେ ଯାତ୍ରା କଲାବେଳେ ଯଦି କୌଣସି ସନ୍ଦେହଜନକ ବ୍ୟକ୍ତି, ମହିଳା କିମ୍ବା ଛୋଟ ପିଲା ନଜରକୁ ଆସନ୍ତି, ସଙ୍ଗେ ସଙ୍ଗେ ପୋଲିସକୁ ଖବର ଦିଅନ୍ତୁ। ଘର ଖୋଲା ରଖନ୍ତୁ ନାହିଁ। କମିଶନରେଟ ପୋଲିସ ଏହା ଉପରେ ନଜର ରଖିବା ସହ ବିଭିନ୍ନ ସ୍ଥାନରେ ଚଢାଉ ଜାରି ରଖିଥିବା ସେ କହିଛନ୍ତି।
