ପାରାଦୀପ,୨୭।୧୨(ସ୍ବ.ପ୍ର.): ପାରାଦୀପ-ଅସ୍ତରଙ୍ଗ ସମୁଦ୍ର ସୀମା ମଧ୍ୟରେ ବୁଲୁଥିବା ଏକ ଅଣ ପଞ୍ଜୀକୃତ ବାଂଲାଦେଶୀ ବୋଟ୍କୁ ରବିବାର ସ୍ଥାନୀୟ ମତ୍ସ୍ୟଜୀବୀ ଠାବକରି ମେରାଇନ ପୋଲିସ ଜିମା ଦେଇଛନ୍ତି। ଉକ୍ତ ବୋଟ୍ରେ ଥିବା ୨୦ଜଣ ମତ୍ସ୍ୟଜୀବୀଙ୍କୁ ପୋଲିସ ଅଟକ ରଖି ପଚରାଉଚୁରା କରିଛି। ମତ୍ସ୍ୟବିଭାଗ ପକ୍ଷରୁ ଏସମ୍ପର୍କରେ ଯାଞ୍ଚ ସରିଥିବାବେଳେ ସୋମବାର କୋଷ୍ଟଗାର୍ଡ ପକ୍ଷରୁ ଯାଞ୍ଚ କରାଯିବ ବୋଲି ସୂଚନା ମିଳିଛି। ସାମୁଦ୍ରିକ ମତ୍ସ୍ୟ ଅଧିକାରୀ ମନୋରଞ୍ଜନ ମହାପାତ୍ରଙ୍କ କହିବାନୁଯାୟୀ, ଉକ୍ତ ବାଂଲାଦେଶ ବୋଟ୍ ଗତ ୭ ତାରିଖରେ ମାଛ ଧରିବା ପାଇଁ ସମୁଦ୍ରକୁ ବାହାରିଥିଲା। ୧୦ ତାରିଖରେ ବୋଟର ଇଞ୍ଜିନ ଖରାପ ହୋଇଯାଇଥିଲା। ସେବେଠାରୁ ସେମାନେ ସମୁଦ୍ରରେ ଭାସୁଥିବାବେଳେ ଏବେ ଓଡ଼ିଶା ଉପକୂଳ ସୀମାରେ ପହଞ୍ଚତ୍ଛନ୍ତି। ପାରାଦୀପ ଅସ୍ତରଙ୍ଗ ମଝିରେ ଷଣ୍ଡକୁଦର ୨ଟି ଯନ୍ତ୍ରଚାଳିତ ବୋଟ୍ ସେମାନଙ୍କୁ ଟାଣି ପାରାଦୀପ ମାଛଧରା ବନ୍ଦର ଭିତରେ ପୂରାଇ ଆମକୁ ସୂଚନା ଦେଇଥିଲା। ଏହାପରେ ମେରାଇନ ପୋଲିସକୁ ଅବଗତ କରାଯାଇଥିଲା। ଗତ ନଭେମ୍ବର ୧ରୁ କଇଁଛଙ୍କ ଆଗମନ ପାଇଁ ସାମୁଦ୍ରିକ କଟକଣା ଲାଗୁ କରାଯାଇଛି। ଏହି ସମୟରେ ବନ ବିଭାଗ, ମତ୍ସ୍ୟ ବିଭାଗ, କୋଷ୍ଟଗାର୍ଡ, ମେରାଇନ ପୋଲିସ ଏବଂ ନୌସେନା ପକ୍ଷରୁ ସମୁଦ୍ର ଉପକୂଳରେ ଅନବରତ ପାଟ୍ରୋଲିଂ କରାଯାଉଛି। ଏହାସତ୍ତ୍ୱେ ୨୦ ଦିନ ଧରି ଏକ ଅଣପଞ୍ଜୀକୃତ ବିଦେଶୀ ବୋଟ୍କୁ କେହି ଦେଖି ନ ପାରିବା ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି। ଏ ସମ୍ପର୍କରେ ଏଏସପି ନିମାଇଁ ସେଠୀ କହିଛନ୍ତି, ଘଟଣା ସମ୍ପର୍କରେ ଯାଞ୍ଚ ଚାଲିଛି। ବୈଦେଶିକ ନିୟମାନୁସାରେ ସମସ୍ତ ଦିଗ ଉପରେ ତର୍ଜମା କରାଯାଉଛି।
