ଢାକା,୬।୯: ବାଂଲାଦେଶର ମଧ୍ୟବର୍ତ୍ତୀକାଳୀନ ସରକାରର ମୁଖ୍ୟ ମହମ୍ମଦ ୟୁନୁସ୍ ଭାରତ ସହ ସମ୍ପର୍କ ବିଷୟରେ କହିଛନ୍ତି ବଡ଼ ବୟାନ ଦେଇଛନ୍ତି। ସେ କହିଛନ୍ତି, ନୂଆଦିଲ୍ଲୀ ଅନୁଭବ କରୁଛି ଯେ ଶେଖ ହାସିନା ଯଦି ନ ରହିବେ, ତେବେ ଆମେ ବାଂଲାଦେଶକୁ ଆଫଗାନିସ୍ତାନରେ ପରିଣତ କରିବୁ। ସେ କହିଛନ୍ତି ଯେ ଭାରତକୁ ଏହାର କାହାଣୀ ବଦଳାଇବାକୁ ପଡିବ। ସେମାନେ ଅନୁଭବ କରୁଛନ୍ତି ଯେ କେବଳ ପୂର୍ବତନ ପ୍ରଧାନମନ୍ତ୍ରୀ ଶେଖ ହାସିନାଙ୍କ ନେତୃତ୍ୱରେ ଦେଶ ସୁରକ୍ଷିତ ଅଛି। ଏଥିସହ ସେ କହିଛନ୍ତି ଯେ ଅୱାମୀ ଲିଗ ବ୍ୟତୀତ ଭାରତ ଅନ୍ୟ ସମସ୍ତ ରାଜନୈତିକ ଦଳକୁ ଇସଲାମ ଦଳ ଭାବରେ ବିବେଚନା କରେ।
ୟୁନୁସ୍ କହିଛନ୍ତି, ଆମେ ଭାରତ ସହିତ ଭଲ ସମ୍ପର୍କ ଚାହୁଁଛୁ, କିନ୍ତୁ ନୂଆଦିଲ୍ଲୀକୁ ଏହି କାହାଣୀକୁ ପରିତ୍ୟାଗ କରିବାକୁ ପଡ଼ିବ ଯେ କେବଳ ହାସିନାଙ୍କ ନେତୃତ୍ୱ ଦେଶର ସ୍ଥିରତାକୁ ସୁନିଶ୍ଚିତ କରିପାରିବ। ସେ କହିଛନ୍ତି, ଆଗକୁ ବଢିବାକୁ ହେଲେ ଏଭଳି ଭାବନାରୁ ଭାରତକୁ ବାହାରକୁ ଆସିବାକୁ ପଡ଼ିବ।
ନିକଟରେ ବାଂଲାଦେଶରେ ହିନ୍ଦୁ ସଂଖ୍ୟାଲଘୁଙ୍କ ଉପରେ ହୋଇଥିବା ଆକ୍ରମଣ ତଥା ଭାରତର ଚିନ୍ତା ବିଷୟରେ ମହମ୍ମଦ ୟୁନୁସ୍ କହିଛନ୍ତି ଯେ ଏହା କେବଳ ଏକ ବାହାନା। ବାଂଲାଦେଶରେ ବିଶୃଙ୍ଖଳା ପରିସ୍ଥିତି ମଧ୍ୟରେ ସଂଖ୍ୟାଲଘୁ ହିନ୍ଦୁମାନଙ୍କର ଦୋକାନ ଏବଂ ସମ୍ପତ୍ତି ନଷ୍ଟ ହୋଇଯାଇଥିଲା ଏବଂ ହିନ୍ଦୁ ମନ୍ଦିର ମଧ୍ୟ ନଷ୍ଟ ହୋଇଯାଇଥିଲା। ଭାରତ ଏବଂ ବାଂଲାଦେଶ ମଧ୍ୟରେ ସମ୍ପର୍କକୁ ସୁଦୃଢ଼ କରିବାର ଉପାୟ ବିଷୟରେ ପଚରାଯିବାରୁ ମହମ୍ମଦ ୟୁନୁସ କହିଛନ୍ତି ଯେ ଉଭୟ ଦେଶ ମିଳିତ ଭାବେ କାମ କରିବା ଆବଶ୍ୟକ ଏବଂ ବର୍ତ୍ତମାନ ଏହି ସମ୍ପର୍କ ଖରାପ ହୋଇଯାଇଛି।
ସେ କହିଛନ୍ତି, ବର୍ତ୍ତମାନ ସମୟରେ ସମ୍ପର୍କକୁ ସୁଦୃଢ ଼ କରିବା ପାଇଁ ଆମେ ମିଳିତ ଭାବେ କାର୍ଯ୍ୟ କରିବା ଆବଶ୍ୟକ । ଭାରତ ସହ ଦ୍ୱିପାକ୍ଷିକ ଚୁକ୍ତିନାମାର ଭବିଷ୍ୟତ ବିଷୟରେ ମହମ୍ମଦ ୟୁନୁସ କହିଛନ୍ତି , ଗମନାଗମନ ଏବଂ ଆଦାନୀ ଶକ୍ତି ଚୁକ୍ତିନାମା ଭଳି କିଛି ଚୁକ୍ତିନାମାକୁ ପୁନର୍ବିଚାର କରିବାକୁ ଦାବି ରହିଛି।
