ସୁନ୍ଦରଗଡ,୨୬ା୮(ଡି.ଏନ.ଏ.):ଓଡିଶା ପୁଷ୍ଟିଶସ୍ୟ ମିଶନ ଅଧୀନରେ ଚଳିତବର୍ଷ ସୁନ୍ଦରଗଡ ଜିଲାର ବଣାଇଁ ବ୍ଲକକୁ ସାମିଲ କରାଯାଇଛି। ଏଥିପାଇଁ ସୁନ୍ଦରଗଡ କୃଷି ଓ କୃଷକ ସଶକ୍ତିକରଣ ବିଭାଗ ଅଧୀନରେ ଥିବା ‘ଆତ୍ମା’, ବୈଷୟିକ ପରାମର୍ଶକାରୀ ସଂସ୍ଥା ୱାସନ ଏବଂ ସ୍ଥାନୀୟ ସ୍ବେଚ୍ଛାସେବୀ ଅନୁଷ୍ଠାନ ମଧ୍ୟରେ ଏକ ତ୍ରିପାକ୍ଷିକ ଏମଓୟୁ ସ୍ବାକ୍ଷର ହୋଇଛି। ଫଳରେ ମାଣ୍ଡିଆ ଏବଂ ଅନ୍ୟାନ୍ୟ ପୁଷ୍ଟିଶସ୍ୟ ଚାଷ ପାଇଁ ବଣାଇଁ ବ୍ଲକରେ ପ୍ରକ୍ରିୟା ଆରମ୍ଭ ହୋଇଛି।
ବଣାଇଁ ବ୍ଲକକୁ ମିଶାଇ ବର୍ତ୍ତମାନ ଜିଲାର ମୋଟ ୧୨ଟି ବ୍ଲକରେ ଏହି ଚାଷ କରାଯାଉଛି। ୨୦୨୨-୨୩ ଖରିଫ ଋ଼ତୁରେ ୬ ହଜାରରୁ ଅଧିକ ହେକ୍ଟର ଜମିରେ ପୁଷ୍ଟିଶସ୍ୟ ଚାଷ କରାଯାଉଥିବା ବେଳେ ଏଥିରେ ୧୩ ହଜାରରୁ ଅଧିକ ଚାଷୀଙ୍କୁ ଯୋଡା ଯାଇଛି ା ଓଡିଶା ପୁଷ୍ଟିଶସ୍ୟ ମିଶନ ଅଧୀନରେ ବଣାଇଁ ବ୍ଲକ ନୂଆକରି ଯୋଡି ହୋଇଛି। ତେଣୁ ଏହି ବ୍ଲକରେ ଚଳିତ ବର୍ଷ ୧୦୦ ହେକ୍ଟର ଜମିରେ ପୁଷ୍ଟିଶସ୍ୟ ଚାଷ କରାଯାଉଛି। ୨୫୦ରୁ ଅଧିକ ଚାଷୀଙ୍କୁ ଏଥିରେ ଯୋଡିବା ଲକ୍ଷ୍ୟ ରଖାଯାଇଛି। ମୋଟ ୧୨ଟି ବ୍ଲକ ଭିତରୁ ୮ଟି ବ୍ଲକରେ ପୁଷ୍ଟିଶସ୍ୟ ଚାଷ ପାଇଁ ଜିଲା ଖଣିଜ ପ୍ରତିଷ୍ଠାନ ପାଣ୍ଠିରୁ ଆର୍ଥିକ ସହାୟତା ଯୋଗାଇ ଦିଆଯାଉଛି।
ମାଣ୍ଡିଆରେ ପ୍ରଚୁର ମାତ୍ରାରେ ପୁଷ୍ଟିକର ଗୁଣ ଭରି ରହିଛି। ଏହା ଏକ ଲାଭଜନକ ଚାଷ ହୋଇଥିବାରୁ ଆଦିବାସୀ ବହୁଳ ସୁନ୍ଦରଗଡ଼ ଜିଲାରେ ମାଣ୍ଡିଆ ସହିତ ବିଭିନ୍ନ ପୁଷ୍ଟିଶସ୍ୟ ଚାଷ କରାଯାଉଛି। ରାଜ୍ୟ ସରକାରଙ୍କ କୃଷି ଓ କୃଷକ ସଶକ୍ତିକରଣ ବିଭାଗ ଅଧୀନରେ ’ଓଡ଼ିଶା ପୁଷ୍ଟିଶସ୍ୟ ମିଶନ’ ଗଠନ କରାଯାଇ ଏହି ଚାଷକୁ ପ୍ରୋତ୍ସାହନ ଦିଆଯାଉଛି।୨୦୧୮-୧୯ରେ ସୁନ୍ଦରଗଡ଼ ଜିଲା ଓଡ଼ିଶା ପୁଷ୍ଟିଶସ୍ୟ ମିଶନ ମାନଚିତ୍ରରେ ସ୍ଥାନ ପାଇଥିଲା। ଏହା ଅଧୀନରେ ପ୍ରଥମେ ୪ଟି ବ୍ଲକ କୁତ୍ରା, ନୂଆଗାଁ, କୁଅଁାରମୁଣ୍ଡା ଓ ରାଜଗାଙ୍ଗପୁରରେ ପୁଷ୍ଟିଶସ୍ୟ ଚାଷ ଆରମ୍ଭ କରାଯାଇଥିଲା।
୨୦୨୦-୨୧ରେ ଆଉ ୪ଟି ବ୍ଲକ ଟାଙ୍ଗରପାଲି, ହେମଗିର, ଲେଫ୍ରିପଡା ଏବଂ ବାଲିଶଙ୍କରାକୁ ଯୋଡ଼ା ଯାଇଥିଲା। ୨୦୨୧-୨୨ରେ ଗୁରୁଣ୍ଡିଆ, ଲାଠିକଟା ଏବଂ ଲହୁଣୀପଡ଼ା ବ୍ଲକକୁ ପୁଷ୍ଟିଶସ୍ୟ ମିଶନର କାର୍ଯ୍ୟକ୍ରମ ସଂପ୍ରସାରଣ କରାଯାଇଥିଲା। ପୁଷ୍ଟିଶସ୍ୟ ଚାଷ ପାଇଁ ପ୍ରଶାସନ ପକ୍ଷରୁ ବିଭିନ୍ନ ପ୍ରକାରର ପ୍ରୋତ୍ସାହନ ଯୋଗାଇ ଦିଆଯାଉଥିବାରୁ ଯୁବ ଏବଂ ମହିଳା ଚାଷୀମାନେ ଏଥିପ୍ରତି ଆଗ୍ରହ ଦେଖାଉଛନ୍ତି।
ମାଣ୍ଡିଆକୁ ରାଜ୍ୟ ସରକାର ସାଧାରଣ ବଣ୍ଟନ ବ୍ୟବସ୍ଥାରେ ସାମିଲ କରିଛନ୍ତି। ଏହାସହ ମାଣ୍ଡିଆରୁ ଭଳିକି ଭଳି ସୁଆଦିଆ ଖାଦ୍ୟ ପ୍ରସ୍ତୁତ କରିବା ପାଇଁ ମହିଳା ସ୍ବୟଂ ସହାୟକ ଗୋଷ୍ଠୀର ସଦସ୍ୟାମାନଙ୍କୁ ତାଲିମ ଦିଆଯାଉଛି। ଏହି ଖାଦ୍ୟକୁ ଆହୁରି ଲୋକପ୍ରିୟ କରିବା ସହ ମିଶନଶକ୍ତି ମା’ମାନଙ୍କୁ ରୋଜଗାର ଦେବା ଲକ୍ଷ୍ୟରେ ଜିଲାର ବିଭିନ୍ନ ସ୍ଥାନରେ ମିଲେଟ ଶକ୍ତି କିଓସ୍କ ଖୋଲାଯାଉଛି। ବର୍ତ୍ତମାନ ଜିଲାରେ ୨୧ଟି ମିଲେଟ ଶକ୍ତି କିଓସ୍କ ଏବଂ ରାଉରକେଲାରେ ଗୋଟିଏ କାଫେ ଖୋଲାଯାଇଛି।
