ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିଓ୍ବାଲଙ୍କୁ ସୁପ୍ରିମକୋର୍ଟ ୧୩ ସେପ୍ଟେମ୍ବରରେ ଦିଲ୍ଲୀ ଅବକାରୀ ନୀତି ନେଇ ମନି ଲ2ଣ୍ଡରିଂ ଅଭିଯୋଗ ସଂକ୍ରାନ୍ତ କେନ୍ଦ୍ରୀୟ ତଦନ୍ତ ବ୍ୟୁରୋ(ସିବିଆଇ) ମାମଲାରେ ସର୍ତ୍ତମୂଳକ ଜାମିନ ଦେଇଛନ୍ତି। ଜେଲରୁ ମୁକ୍ତ ହେବା ପରେ ୧୫ ସେପ୍ଟେମ୍ବରରେ ସେ କହିଛନ୍ତି, ଆସନ୍ତା ଦୁଇଦିନ ପରେ ପଦବୀରୁ ଇସ୍ତଫା ଦେବେ। ଏଥିସହିତ ଦିଲ୍ଲୀରେ ଶୀଘ୍ର ନିର୍ବାଚନ କରିବା ପାଇଁ ଆହ୍ବାନ ଦେଇଛନ୍ତି। ଦିଲ୍ଲୀ ବିଧାନସଭା ନିର୍ବାଚନ ଫେବୃୟାରୀ ୨୦୨୫ରେ ହେବାକୁ ଥିବାବେଳେ ୨୦୨୪ ନଭେମ୍ବରରେ ମହାରାଷ୍ଟ୍ର ବିଧାନସଭା ନିର୍ବାଚନ ସହ ମତଦାନ କରିବା ସକାଶେ କେଜରିଓ୍ବାଲ ଦାବି କରିଛନ୍ତି।
ଉଲ୍ଲେଖଯୋଗ୍ୟ, ଉପରଲିଖିତ ମାମଲାରେ ପ୍ରଥମେ ୨୧ ମାର୍ଚ୍ଚ ୨୦୨୪ରେ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) କେଜ୍ରିଓ୍ବାଲ୍ଙ୍କୁ ଗିରଫ କରିଥିବା ବେଳେ ୨୬ ଜୁନ୍ରେ ସିବିଆଇ ମଧ୍ୟ ଗିରଫ କରିଥିଲା। ଦର୍ଶାଯାଇପାରେ, ଇଡି ଏବଂ ସିବିଆଇ ମାମଲା ମିଶିଲେ ସେ ୧୨୫ ଦିନ ଜେଲରେ ରହିଥିଲେ। ୨୦୨୪ ନିର୍ବାଚନ ବେଳେ ୨୧ ଦିନ ପ୍ରଚାର ପାଇଁ ତାଙ୍କୁ ଛଡ଼ାଯାଇଥିଲା। ପୂର୍ବରୁ ଇଡି ମାମଲାରେ ତାଙ୍କୁ ଜାମିନ ମିଳିଥିବାବେଳେ ସଦ୍ୟ ଘଟଣା କ୍ରମରେ ସିବିଆଇ ମାମଲାରେ ସୁପ୍ରିମକୋର୍ଟ ଏବେ ତାଙ୍କୁ ଜାମିନ ଦେଇଛନ୍ତି। ଜାମିନ ଦେବାବେଳେ ସିବିଆଇର ଭୂମିକାକୁ ସର୍ବୋଚ୍ଚ ଅଦାଲତ ଭର୍ତ୍ସନା କରିଥିଲେ। ସିବିଆଇକୁ ପଞ୍ଜୁରି ଭିତରେ ଶୁଆ ବୋଲି ସୁପ୍ରିମକୋର୍ଟ ବହୁ ଆଗରୁ ଆଖ୍ୟା ଦେଇଥିଲେ। କେଜ୍ରିଓ୍ବାଲଙ୍କ ମାମଲାରେ କହିଛନ୍ତି, ଏବେ ସମୟ ଆସିଛି ତଦନ୍ତ ସଂସ୍ଥା ନିଜ ଭାବମୂର୍ତ୍ତିକୁ ସୁଧାରି ନିଜକୁ ଏକ ମୁକ୍ତ ଶୁଆ ଭାବେ ପ୍ରମାଣିତ କରିବା ଦରକାର। ଅବଶ୍ୟ ସୁପ୍ରିମକୋର୍ଟ ଏହିସବୁ କହୁଥିଲାବେଳେ କେଜ୍ରିଓ୍ବାଲଙ୍କ ପାଇଁ ଅନେକ ସର୍ତ୍ତ ରଖିଛନ୍ତି। ସେ ସେକ୍ରେଟାରିଏଟ୍କୁ ଯାଇପାରିବେ ନାହିଁ। କୌଣସି ଫାଇଲ୍ରେ ଦସ୍ତଖତ କରିପାରିବେ ନାହିଁ। ସେ ସାକ୍ଷୀମାନଙ୍କୁ ମଧ୍ୟ ଦେଖାକରିପାରିବେ ନାହିଁ। ଏଥିରୁ ସ୍ବାଭାବିକ ଭାବେ ବୁଝାପଡ଼ୁଛି ଯେ, ମୁଖ୍ୟମନ୍ତ୍ରୀ ଭାବେ କାର୍ଯ୍ୟ କରିବା ତାଙ୍କ ପାଇଁ କଷ୍ଟକର ହୋଇପଡ଼ିବ। ଏଥିସହିତ ଏହା ମଧ୍ୟ ଆଲୋଚନା ହେଉଛି, କେଜ୍ରିଓ୍ବାଲଙ୍କୁ ସର୍ତ୍ତମୂଳକ ଜାମିନ ଦିଆଯିବା ପୂର୍ବରୁ ସେପ୍ଟେମ୍ବର ୧୧ରେ ସୁପ୍ରିମକୋର୍ଟ ପ୍ରଧାନ ବିଚାରପତି ଡି.ଓ୍ବାଇ. ଚନ୍ଦ୍ରଚୂଡ଼ଙ୍କ ବାସଭବନକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଯାଇ ଗଣେଶ ପୂଜା କରିଥିଲେ। ଏହି ଘଟଣା ନ୍ୟାୟପାଳିକାର ନିରପେକ୍ଷତା ଉପରେ ପ୍ରଶ୍ନ ଉଠାଇଛି।
କେଜ୍ରିଓ୍ବାଲଙ୍କୁ ସିବିଆଇ ଗିରଫ କରିବା ରାଜନୈତିକ ଚାପ ଯୋଗୁ ଘଟିଥିବା କୁହାଯାଉଛି । ଏପଟେ କେଜ୍ରିଓ୍ବାଲ ଦିଲ୍ଲୀ ମୁଖ୍ୟମନ୍ତ୍ରୀ ହେବା ଦିନୁ ସେଠାକାର ଉପରାଜ୍ୟପାଳ ତାଙ୍କୁ ବିଭିନ୍ନ କ୍ଷେତ୍ରରେ ବିରୋଧ କରି ଆସୁଛନ୍ତି। ତାଙ୍କ ଲୋକପ୍ରିୟତା କମାଇବା ପାଇଁ ବାରମ୍ବାର ପ୍ରଚେଷ୍ଟା ହେଉଥିବାରୁ କେଜ୍ରିଓ୍ବାଲ ଆଗାମୀ ନିର୍ବାଚନରେ ଜନସମର୍ଥନ ହାସଲ ଲକ୍ଷ୍ୟରେ ଇସ୍ତଫା ଦେବାକୁ କହିଛନ୍ତିି। ବିରୋଧୀ କହୁଛନ୍ତି ଯେ ଲୋକଙ୍କ ଅନୁକମ୍ପା ହାସଲ କରିବା ଲାଗି ସେ କାଳେ ଏଭଳି କରୁଛନ୍ତି। ଏହା ସତ୍ୟ ହୋଇପାରେ। ତେବେ କେଜ୍ରିଓ୍ବାଲଙ୍କ ଗିରଫର ସମୟ ଦେଖିଲେ ସେଥିରେ ରାଜନୈତିକ ଉଦ୍ଦେଶ୍ୟ ରହିଥିବା ଫୁଟି ଦିଶୁଛି। କାରଣ ୨୦୨୪ ନିର୍ବାଚନ ପୂର୍ବରୁ ତାଙ୍କୁ ଗିରଫ କରାଯାଇଥିଲା। ଏବେ ସୁପ୍ରିମକୋର୍ଟ ସିବିଆଇକୁ ଗାଳିକରି ଯେତେବେଳେ ତାଙ୍କୁ ଜାମିନ ଦେଇଛନ୍ତି, କେଜ୍ରିଓ୍ବାଲ ମୁଣ୍ଡ ଟେକି ନିଜର ସଚ୍ଚୋଟତାର ପ୍ରମାଣ ଦେବାକୁ ଆଗଭର ହେଉଛନ୍ତି। ସୁପ୍ରିମକୋର୍ଟ ସର୍ତ୍ତମୂଳକ ଜାମିନ ଦେଇଥିବାରୁ ମୁଖ୍ୟମନ୍ତ୍ରୀ ଭାବେ ତାଙ୍କ ପାଇଁ ଅନେକ କଟକଣା ରହିଛି। ସେଥିପାଇଁ ଅସହାୟ ମୁଖ୍ୟମନ୍ତ୍ରୀ ଭାବେ ନ ରହି ସେ ଇସ୍ତଫା ଦେବା ଲାଗି ଉଚିତ ମଣିଛନ୍ତି ବୋଲି ଚର୍ଚ୍ଚା ହେଉଛି। ସେ ତାଙ୍କ ସ୍ତ୍ରୀ ସୁନୀତା କେଜ୍ରିଓ୍ବାଲଙ୍କୁ ମୁଖ୍ୟମନ୍ତ୍ରୀ ଦାୟିତ୍ୱ ଦେଇପାରନ୍ତି। କେଜ୍ରିଓ୍ବାଲ୍ ଏହା ମଧ୍ୟ କହୁଛନ୍ତି ଯେ ଯଦି ଜନସାଧାରଣ ଭାବୁଛନ୍ତି ସେ ଦୋଷୀ, ତେବେ ତାଙ୍କୁ କେହି ଭୋଟ ନ ଦିଅନ୍ତୁ। ଲୋକଙ୍କ ଦ୍ୱାରା ନିର୍ଦ୍ଦୋଷ ପ୍ରମାଣିତ ହୋଇ ଭୋଟରେ ଜିତିଲେ ଯାଇ ସେ ମୁଖ୍ୟମନ୍ତ୍ରୀ ଆସନରେ ବସିବେ ବୋଲି କହିବା ପରେ ରାଜନୀତିରେ ନୂଆ ମୋଡ଼ ଆସିବାର ଅନୁମାନ କରାଯାଉଛି। ବର୍ତ୍ତମାନ ଜନସାଧାରଣଙ୍କ କୋର୍ଟରେ ବଲ୍ ଅଟକିଛି। ସେମାନେ କେଉଁ ନିଷ୍ପତ୍ତି ନେବେ ତାହାକୁ ଅପେକ୍ଷା।
