ଫୁଲବାଣୀ ଅଫିସ, ୫ା୯:ରାଜ୍ୟ ସରକାର ଚାଷ, ଚାଷୀଙ୍କ ଉନ୍ନତି ପାଇଁ ବିଭିନ୍ନ ଯୋଜନା କାର୍ଯ୍ୟକାରୀ କରିଛନ୍ତି। ସେଥିମଧ୍ୟରୁ ‘ବଳରାମ’ ଯୋଜନା ଅନ୍ୟତମ ା ୨୦୨୧ ଆର୍ଥିକ ବର୍ଷରୁ ଏହି ଯୋଜନା କାର୍ଯ୍ୟକାରୀ ହୋଇଆସୁଛି ା ହେଲେ କନ୍ଧମାଳ ଜିଲାରେ ଏହି ଯୋଜନାର କାର୍ଯ୍ୟକାରିତା ବହୁ ପଛରେ ପଡ଼ିଯାଇଛି। କହିବାକୁ ଗଲେ ବଳରାମ ଯୋଜନା ସମ୍ପୂର୍ଣ୍ଣ ଦିଗହରା ହୋଇପଡ଼ିଛି ା ୨୦୨୨-୨୩ ଆର୍ଥିକ ବର୍ଷରେ ଲକ୍ଷ୍ୟଧାର୍ଯ୍ୟ ଥିବା ୯୨୦ ଜେଏଲ୍ଜି (ଜଏଣ୍ଟ ଲିଆବିଲିଟି ଗ୍ରୁପ୍)ଙ୍କ ମଧ୍ୟରୁ ବର୍ତ୍ତମାନ ସୁଦ୍ଧା ମାତ୍ର ୪ଟି ଜେଏଲ୍ଜିକୁ ଋଣ ପ୍ରଦାନ କରାଯାଇଛି ା
ଭୂମିହୀନ, ଭାଗଚାଷୀ, ନାମମାତ୍ର ଚାଷୀ, ଛୋଟଚାଷୀଙ୍କୁ ଚାଷକାର୍ଯ୍ୟରେ ସହାୟତା ଦେବା, ସେମାନଙ୍କ ଆର୍ଥିକ ବିକାଶ କରିବା ଲାଗି ବଳରାମ ଯୋଜନା ହୋଇଛି ା ଏହି ଯୋଜନାରେ ଋଣ ପାଇବାକୁ ହେଲେ ଏସ୍ଏଚ୍ଜି (ସ୍ବୟଂ ସହାୟକ ଗ୍ରୁପ୍) ଭଳି ଜେଏଲ୍ଜି ତିଆରି ହେବ ା ପ୍ରତି ଜେଏଲ୍ଜିର ନାମକରଣ ହେବ। ଏଥିରେ ସଭାପତି, ସମ୍ପାଦକ ବଛାହେବେ ା ଗୋଟିଏ ଗ୍ରୁପ୍ରେ ୫ ଜଣ ଚାଷୀ ରହିବେ ା ଗ୍ରୁପ୍ ତିଆରି ହେଲା ପରେ ଗ୍ରାମରେ ସଭା ହେବ ଏବଂ ନିୟମ ଅନୁସାରେ ଗୋଟିଏ ଜେଏଲ୍ଜି ଏକକ ଚାଷ କରିବେ, ଭିନ୍ନ ପ୍ରକାର ନୁହେଁ ା ଯାହା ଚାଷ କରିବେ ୫ ଜଣ ସମାନ କରିବେ, ତାହା ଧାନ, ମୁଗ, ବିରି ଇତ୍ୟାଦି ା ପୂର୍ବରୁ କୃଷକ ସାଥୀମାନେ ଏହି ଗ୍ରୁପ୍ ତିଆରି କରିବାରେ ସାହାଯ୍ୟ କରିବା ସହ ବଳରାମ ଯୋଜନା ଉପରେ ଅବଗତ କରୁଥିଲେ ା ହେଲେ ଏବେ ଜିଲା ପ୍ରଶାସନ ପକ୍ଷରୁ ଅନୁଷ୍ଠିତ ବୈଠକରେ କୃଷକ ସାଥୀଙ୍କ ସମେତ କୃଷି ମିତ୍ର, ବ୍ୟାଙ୍କ ମିତ୍ର ଏହି କାର୍ଯ୍ୟରେ ସାମିଲ ହେବାକୁ ଜିଲାପାଳ ପାଟିଲ ଆଶିଷ ଈଶ୍ୱର ନିର୍ଦ୍ଦେଶ ଦେଇଛନ୍ତି ା ସେମାନେ ଭାଗଚାଷୀଙ୍କ ସିଭିଲ ସ୍କୋର ଦେଖିବେ। ଯେଉଁମାନଙ୍କ ନାମରେ ଋଣ ନ ଥିବ ସେମାନଙ୍କୁ ଗ୍ରୁପ୍ରେ ସାମିଲ କରି ତୁରନ୍ତ ଋଣ ମିଳିବାରେ ସହାୟତା କରିବାକୁ ପରାମର୍ଶ ଦେଇଛନ୍ତି ା
ପୂର୍ବରୁ ଅଧିକାଂଶ ଗ୍ରୁପ୍ରେ ସାମିଲ ଥିବା ଚାଷୀଙ୍କ ନାମରେ ଋଣ ରହିଥିବାରୁ ବ୍ୟାଙ୍କ ପୁନର୍ବାର ଋଣ ପ୍ରଦାନ କରିବାକୁ ଆଗଭର ହେଉନାହାନ୍ତି ା ପୂର୍ବଋଣ ଚାଷୀ ଶୁଝୁ ନ ଥିବାରୁ ପୁଣି ଋଣ ଦେଇ ହଇରାଣ ହେବାକୁ ବ୍ୟାଙ୍କ କର୍ତ୍ତୃପକ୍ଷ ଚାହୁଁନାହାନ୍ତି। ଫଳରେ ଚଳିତଥର ଏଥିରେ ସୁଧାର ଅଣାଯାଇଛି ା ଯେଉଁମାନଙ୍କ ନାମରେ ଋଣ ନ ଥିବ, ସେମାନଙ୍କୁ ନେଇ ଗ୍ରୁପ୍ କଲେ ବଳରାମ ଯୋଜନାରେ ଉପକୃତ ହେବେ ବୋଲି ଆଶା କରାଯାଉଛି ା ୨୦୨୧-୨୨ରେ ସରକାର ଏଗ୍ରିକଲ୍ଚର ସେନ୍ସସ୍ ଅନୁସାରେ ଚାଷୀମାନଙ୍କ ଲିଷ୍ଟ ତିଆରି କରିଥିଲେ। ହେଲେ ଏବେ ସେଥିରେ ନୂତନତ୍ୱ ଅଣାଯାଇଛି ା ବାସ୍ତବତା ଅନୁସାରେ ଏବଂ ଚାଷକାର୍ଯ୍ୟ କରୁଥିବା ଅଗ୍ରାଧିକାର ଭିତ୍ତିରେ ଚାଷୀଙ୍କୁ ସାମିଲ କରିବାକୁ ସରକାର ଜିଲାପାଳମାନଙ୍କୁ ନିର୍ଦ୍ଦେଶ ଦେଇଛନ୍ତି ା
୨୦୨୨-୨୩ ଆର୍ଥିକ ବର୍ଷରେ କନ୍ଧମାଳ ଜିଲାର ୧୨ଟି ବ୍ଲକରେ ବଳରାମ ଯୋଜନାରେ ୯୨୦ ଜେଏଲ୍ଜିଙ୍କୁ ଋଣ ପ୍ରଦାନ ପାଇଁ ଲକ୍ଷ୍ୟଧାର୍ଯ୍ୟ ହୋଇଛି ା ସେମାନଙ୍କ ମଧ୍ୟରୁ ୧୩୪ ଜେଏଲ୍ଜି ଋଣ ପ୍ରଦାନ ନିମନ୍ତେ ବ୍ୟାଙ୍କରେ ଆବେଦନ କରିଛନ୍ତି ା ବର୍ତ୍ତମାନ ସୁଦ୍ଧା ୪ଟି ଜେଏଲ୍ଜିକୁ ଋଣ ପ୍ରଦାନ କରାଯାଇଛି ା ଏ ସଂକ୍ରାନ୍ତରେ ଜଣେ କୃଷି ଅଧିକାରୀ କୁହନ୍ତି, ବଳରାମ ଯୋଜନାରେ ଋଣ ପ୍ରଦାନ କରିବାକୁ ବ୍ୟାଙ୍କଗୁଡ଼ିକ ରାଜି ହେଉନାହାନ୍ତି ା ଜେଏଲ୍ଜିରେ ପୂର୍ବରୁ ଋଣ କରିଥିବା ଚାଷୀ ଅଛନ୍ତି ା ତେଣୁ ବ୍ୟାଙ୍କ କର୍ତ୍ତୃପକ୍ଷ ଋଣ ପ୍ରଦାନ କରୁନାହାନ୍ତି ା ଏବେ ନିଷ୍ପତ୍ତି ଅନୁସାରେ ଜେଏଲ୍ଜିରେ ଋଣ ନ ଥିବା ଚାଷୀ ସାମିଲ ହେବେ ା ଆଶା କରାଯାଉଛି କି, ବ୍ୟାଙ୍କ କର୍ତ୍ତୃପକ୍ଷ ସେମାନଙ୍କୁ ଋଣ ପ୍ରଦାନ କରିବେ ଏବଂ ଏହାଦ୍ୱାରା ଚାଷୀମାନଙ୍କର ଉନ୍ନତି ହେବ ା
