ଥୁଆମୂଳ ରାମପୁର,୨୫।୭ (ଦୁର୍ଗା କୀର୍ତ୍ତି): କଳାହାଣ୍ଡି ଜିଲା ଥୁଆମୂଳ ରାମପୁର ବ୍ଲକର ସଦର ମହକୁମା ସମେତ ଗୋପୀନାଥପୁର, ମହୁଲପାଟଣା, କର୍ଲାପାଟ ଓ ଗୁଣୁପୁର ଆଦି ସ୍ଥାନରେ ମହାପ୍ରଭୁ ଶ୍ରୀଜଗନ୍ନାଥଙ୍କ ପବିତ୍ର ବାହୁଡ଼ା ଯାତ୍ରା ଶାନ୍ତିଶୃଙ୍ଖଳା ଓ ଭକ୍ତିପୂର୍ଣ୍ଣ ପରିବେଶ ମଧ୍ୟରେ ସମ୍ପନ୍ନ ଶୁକ୍ରବାର ହୋଇଯାଇଛି। ନବଦିନାତ୍ମକ ଯାତ୍ରା ଶେଷ କରି ମହାପ୍ରଭୁ ଜନ୍ମବେଦୀ ଗୁଣ୍ଡିଚା ମନ୍ଦିରରୁ ନିଜର ମୂଳ ପୀଠ ରତ୍ନବେଦୀକୁ ବାହୁଡ଼ିଛନ୍ତି। ସକାଳୁ ମାଉସୀ ମାଁ ମନ୍ଦିରରେ ମଙ୍ଗଳ ଆଳତି, ମହାସ୍ନାନ, ସୂର୍ଯ୍ୟପୂଜା, ଦ୍ୱାରପାଳ ପୂଜା ଓ ଗୋପାଳବଲ୍ଲଭ ଭୋଗ ଅନୁଷ୍ଠିତ ହୋଇଥିଲା। ଏହାପରେ ରୀତିନୀତି ଅନୁଯାୟୀ ମହାପ୍ରଭୁଙ୍କ ସେବାୟତମାନଙ୍କ ଦ୍ୱାରା ହରିବୋଲ, ଘଣ୍ଟ ଓ ହୁଳହୁଳି ଧ୍ୱନି ସଂକୀର୍ତ୍ତନ ବାଦ୍ୟ ମଧ୍ୟରେ ଧାଡ଼ି ପହଣ୍ଡି କରାଯାଇ ଚତୁର୍ଦ୍ଧାମୂର୍ତ୍ତିଙ୍କୁ ରଥାରୂଢ଼ କରାଯାଇଥିଲା। ରଥଯାତ୍ରା କମିଟିର ସଭାପତି ଶତ୍ରୁଘନ ଗହୀର ଓ ସମ୍ପାଦକ ଅକ୍ଷୟ ପାତ୍ରଙ୍କ ସୁଚାରୁ ପରିଚାଳନାରେ ସମସ୍ତ ନୀତି ସମ୍ପାଦିତ ହୋଇଥିଲା। ରଥ ଉପରେ ପବିତ୍ର ଛେରାପହଁରା ନୀତି ସମ୍ପନ୍ନ ହେବା ପରେ ଶ୍ରଦ୍ଧାଳୁମାନେ ଜୟ ଜଗନ୍ନାଥ ଧ୍ୱନି ଦେଇ ରଥ ଟାଣିଥିଲେ। ଥୁଆମୂଳ ରାମପୁର ସଦର ବ୍ୟତୀତ ବ୍ଲକର ଅନ୍ୟାନ୍ୟ ପ୍ରମୁଖ ସ୍ଥାନ ଗୋପୀନାଥପୁର, ମହୁଲପାଟଣା, କର୍ଲାପାଟ ଓ ଗୁଣୁପୁରଠାରେ ମଧ୍ୟ ବାହୁଡ଼ା ଯାତ୍ରା ବେଶ୍ ଆଡ଼ମ୍ବରର ସହ ପାଳିତ ହୋଇଯାଇଛି। ମହାପ୍ରଭୁଙ୍କ ବାହୁଡ଼ା ରଥ ଦର୍ଶନ କରିବା ପାଇଁ ଆଖପାଖ ଅଞ୍ଚଳରୁ ହଜାର ହଜାର ଭକ୍ତଙ୍କ ସମାଗମ ହୋଇଥିଲା। ବାହୁଡ଼ା ଯାତ୍ରାକୁ ଶାନ୍ତିଶୃଙ୍ଖଳାର ସହ ଶେଷ କରିବା ପାଇଁ ପ୍ରଶାସନ ପକ୍ଷରୁ ବ୍ୟାପକ ସୁରକ୍ଷା ବ୍ୟବସ୍ଥା କରାଯାଇଥିଲା। ଥୁଆମୂଳ ରାମପୁର ଥାନା ଅଧିକାରୀ କୈବଲ୍ୟ ସେଠ୍ଙ୍କ ନେତୃତ୍ୱରେ ସଦର ଅଞ୍ଚଳରେ, କର୍ଲାପାଟ ଥାନା ଅଧିକାରୀ ଶ୍ରୀକାନ୍ତ କୋଳକାଙ୍କ ନେତୃତ୍ୱରେ କର୍ଲାପାଟ ଓ ଗୁଣୁପୁର ଅଞ୍ଚଳରେ ଏବଂ ମହୁଲପାଟଣା ଫାଣ୍ଡି ଅଧିକାରୀଙ୍କ ନେତୃତ୍ୱରେ ଗୋପୀନାଥପୁର ଓ ମହୁଲପାଟଣା ଅଞ୍ଚଳରେ ପୋଲିସ ବାହିନୀ ମୁତୟନ ରହିଥିଲେ। ଏଥିସହିତ ବିଦ୍ୟୁତ ବିଭାଗ, ଅଗ୍ନିଶମ ବାହିନୀ ଓ ସ୍ୱାସ୍ଥ୍ୟ ବିଭାଗର ଜରୁରୀ କାଳୀନ ଗାଡ଼ି ନିୟୋଜିତ ରହି ଯାତ୍ରାକୁ ସୁରକ୍ଷିତ ଭାବେ ସମ୍ପନ୍ନ କରିବାରେ ସହଯୋଗ କରିଥିଲେ।
