କୋଲକାତା,୧୮।୯: ଭାଜପାର ଆସାନସୋଲ ଆସନର ଲୋକ ସଭା ଏମ୍ପି ତଥା ପୂର୍ବତନ କେନ୍ଦ୍ର ମନ୍ତ୍ରୀ ବାବୁଲ ସୁପ୍ରିୟୋ ବାଡ଼ ଡେଇଁ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ତୃଣମୂଳ କଂଗ୍ରେସ (ଟିଏମ୍ସି)ରେ ସାମିଲ ହୋଇଛନ୍ତିି। ଏନେଇ ତୃଣମୂଳର ଟୁଇଟର ହ୍ୟାଣ୍ଡେଲରେ ସୂଚନା ପ୍ରଦାନ କରାଯାଇଛି।
ବାବୁଲଙ୍କୁ ତୃଣମୂଳ ରାଷ୍ଟ୍ରୀୟ ମହାସଚିବ ତଥା ଲୋକ ସଭା ଏମ୍ପି ଅଭିଷେକ ବାନାର୍ଜୀ ଏବଂ ରାଜ୍ୟ ସଭା ଏମ୍ପି ଡେରେକ୍ ଓ ବ୍ରାୟନ ସ୍ବାଗତ କରିବା ସହିତ ଦଳର ପ୍ରାଥମିକ ସଦସ୍ୟତା ପ୍ରଦାନ କରିଛନ୍ତି।
କେନ୍ଦ୍ରୀୟ କ୍ୟାବିନେଟ୍ର ସମ୍ପ୍ରସାରଣ ପୂର୍ବରୁ ସେ ନିଜ ପଦରୁ ଇସ୍ତଫା ଦେଇଥିଲେ। ଏହାପରେ ରାଜନୀତିରୁ ସନ୍ୟାସ ନେବା ପାଇଁ ମଧ୍ୟ ଘୋଷଣା କରିଥିଲେ। ଏହା ସହିତ ଏମ୍ପି ପଦରୁ ମଧ୍ୟ ଇସ୍ତଫା ଦେବାକୁ କହିଥିଲେ।
ମାତ୍ର ପରବର୍ତ୍ତୀ ସମୟରେ ବାବୁଲ ସେଭଳି କୌଣସି ପଦକ୍ଷେପ ଗ୍ରହଣ କରି ନ ଥିଲେ। ଏମ୍ପି ଭାବେ ଲୋକଙ୍କ ସେବା କରିବାକୁ ସେ କହିଥିଲେ।
ସେପ୍ଟେମ୍ବର ୩୦ରେ ଭବାନୀପୁର ଉପନିର୍ବାଚନ ପୂର୍ବରୁ ବାବୁଲ ତୃଣମୂଳରେ ସାମିଲ ହୋଇ ନୂଆ ଇନିଂସ୍ ଆରମ୍ଭ କରିଥିବାରୁ ରାଜ୍ୟ ରାଜନୀତିରେ ଚର୍ଚ୍ଚା ଆରମ୍ଭ ହୋଇଛି।
