ଲଣ୍ଡନ,୨୦।୮(ପି.ଟି.): ଆସନ୍ତା ୨୮ତାରିଖରୁ ଆରମ୍ଭ ହେବାକୁ ଥିବା ପାକିସ୍ତାନ ବିପକ୍ଷ ୩ ମ୍ୟାଚ୍ ବିଶିଷ୍ଟ ଟି୨୦ ସିରିଜ ପାଇଁ ଆୟୋଜକ ଇଂଲଣ୍ଡ ଏକ ଭିନ୍ନ ପ୍ରକାର ରଣନୀତି ଆପଣାଇଛି। ପାକିସ୍ତାନ ପୂର୍ବତନ ଅଲରାଉଣ୍ଡର ଅଝାର ମେହମୁଦ୍ଙ୍କୁ ଇଂଲଣ୍ଡ ତା’ର କୋଚିଂ ଷ୍ଟାଫ୍ରେ ସାମିଲ କରିଛି। ଏଥି ସହିତ ଇଂଲଣ୍ଡ ମଧ୍ୟ ଏହି ସିରିଜ ପାଇଁ ଏକ ୧୪ ଜଣିଆ ଦଳ ଘୋଷଣା କରିଛି।
ମେହମୁଦ୍ ଏବେ ଜଣେ ବ୍ରିଟିଶ ନାଗରିକ। ଗତବର୍ଷ ସେ କୋଚ୍ ମକି ଆର୍ଥରଙ୍କ ତତ୍ତ୍ୱାବଧାନରେ ପାକିସ୍ତାନ କୋଚିଂ ଷ୍ଟାଫ୍ର ସଦସ୍ୟ ଥିଲେ। ଇଂଲଣ୍ଡ ଆସିଷ୍ଟାଣ୍ଟ କୋଚ୍ ଗ୍ରାହାମ ଥୋର୍ପେ ଏହି ସିରିଜରେ କ୍ରିସ୍ ସିଲଭରଉଡ୍ଙ୍କ ସ୍ଥାନରେ ମୁଖ୍ୟ କୋଚ୍ର ଦାୟିତ୍ୱ ତୁଲାଇବେ। ସିଲଭରଉଡ୍ଙ୍କୁ ଏବେ ବିଶ୍ରାମ ଦିଆଯାଇଛି। ପଲ କଲିଂଉଡ୍ ଆସିଷ୍ଟାଣ୍ଟ କୋଚ୍ ଭାବେ ତାଙ୍କ ସହଯୋଗ କରିବେ। ତେବେ ୪୫ ବର୍ଷୀୟ ଆଝାର ମେହମୁଦ୍ ଇଂଲଣ୍ଡ ବୋଲିଂ କୋଚ୍ ଜନ ଲୁଇସ୍ଙ୍କୁ ସହାୟତା ପ୍ରଦାନ କରିବେ ବୋଲି ଇଂଲଣ୍ଡ ଓ ଓ୍ବେଲ୍ସ କ୍ରିକେଟ ବୋର୍ଡ (ଇସିବି) ତରଫରୁ ମଙ୍ଗଳବାର ସୂଚନା ଦିଆଯାଇଛି। ପୂର୍ବତନ ଓପନର ମାର୍କସ ଟ୍ରେସ୍କୋଥିକ୍ ବ୍ୟାଟିଂ କୋଚ୍ର ଦାୟିତ୍ୱ ତୁଲାଇବେ। ପୂର୍ବତନ ଏସେକ୍ସ ଉଇକେଟକିପର ଜେମ୍ସ ଫୋଷ୍ଟର ସିରିଜ୍ରେ ଉଇକେଟକିପିଂ କୋଚ୍ ଭାବେ ଦାୟିତ୍ୱ ନିର୍ବାହ କରିବେ।
ଏହି ସିରିଜ ପାଇଁ ଇଂଲଣ୍ଡ ଇଅନ ମୋର୍ଗାନ୍ଙ୍କ ନେତୃତ୍ୱରେ ଏକ ଶକ୍ତିଶାଳୀ ୧୪ ଜଣିଆ ଦଳ ଘୋଷଣା କରିଛି। ଆୟର୍ଲାଣ୍ଡ ବିପକ୍ଷରେ ଦୁର୍ବଳ ପ୍ରଦର୍ଶନ ପାଇଁ ଦଳରୁ ଜେମ୍ସ ଭିନ୍ସଙ୍କୁ ଦଳରୁ ବାଦ୍ ଦିଆଯାଇଛି ଓ ତାଙ୍କ ସ୍ଥାନରେ ଡେଭିଡ ମଲାନଙ୍କୁ ସାମିଲ କରାଯାଇଛି। ପାକିସ୍ତାନ ବିପକ୍ଷ ଟେଷ୍ଟ ସିରିଜ ପାଇଁ ଜୈବ ସୁରକ୍ଷିତ ପରିବେଶରେ ଥିବା ଖେଳାଳିଙ୍କୁ ଏହି ଦଳରେ ସାମିଲ କରାଯାଇ ନାହିଁ ବୋଲି ଇଂଲଣ୍ଡ ଜାତୀୟ ଚୟନକର୍ତ୍ତା ଏଡ୍ ସ୍ମିଥ୍ କହିଛନ୍ତି। ଏକାଧିକ ଫର୍ମାଟ୍ରେ ଭଲ ପ୍ରଦର୍ଶନ କରୁଥିବା ଖେଳାଳିଙ୍କୁ ଅଧିକ ସୁଯୋଗ ଦେବାକୁ ଚାହୁଁଛୁ ଓ ପ୍ରତ୍ୟେକ ସିରିଜ ପାଇଁ ଏକ ଶକ୍ତିଶାଳୀ ଦଳ ଚୟନ ଉପରେ ଗୁରୁତ୍ୱ ଦେଉଛୁ । ଆଗକୁ ଖେଳାଯିବକୁ ଥିବା ଅଷ୍ଟ୍ରେଲିଆ ବିପକ୍ଷ ଟି୨୦ ସିରିଜ ପାଇଁ ପରେ ଦଳ ଘୋଷଣା କରାଯିବ ବୋଲି ସେ କହିଛନ୍ତି। ପାକିସ୍ତାନ ବିପକ୍ଷରେ ପ୍ରଥମ, ଦ୍ୱିତୀୟ ଓ ତୃତୀୟ ଟି୨୦ ମ୍ୟାଚ୍ ଯଥାକ୍ରମେ ଅଗଷ୍ଟ ୨୮, ୩୦ ଓ ସେପ୍ଟେମ୍ବର ୧ରେ ଖେଳାଯିବ।
ଇଂଲଣ୍ଡ ଦଳ: ଇଅନ ମୋର୍ଗାନ (ଅଧିନାୟକ), ମୋଇନ ଅଲୀ, ଜୋନଥନ ବେୟାରଷ୍ଟୋ, ଟମ୍ ବାଣ୍ଟନ, ସାମ୍ ବିଲିଙ୍ଗ୍ସ, ଟମ୍ କୁରାନ, ଜୋନ ଡେନ୍ଲି, ଲୁଇସ୍ ଗ୍ରେଗୋରି, କ୍ରିସ୍ ଜୋର୍ଡାନ, ସାକିବ୍ ମେହମୁଦ, ଡଓ୍ବେିଡ୍ ମଲାନ, ଆଦିଲ ରସିଦ୍, ଜାସନ ରଏ ଓ ଡେଭିଡ୍ ଓ୍ବିଲି।
ରିଜର୍ଭ ଖେଳାଳି: ପ୍ୟାଟ୍ ବ୍ରାଉନ୍, ଲିଆମ ଲିଭିଙ୍ଗଉଡ୍, ରିସି ଟପ୍ଲି।
