ଚେନ୍ନାଇ,୧୩।୨: ଇଂଲଣ୍ଡ ବିପକ୍ଷ ଦ୍ୱିତୀୟ ଟେଷ୍ଟରେ ଡେବ୍ୟୁ କରିଛନ୍ତି ବାମହାତୀ ସ୍ପିନ୍ ଅଲରାଉଣ୍ଡର ଅକ୍ଷର ପଟେଲ। ୨୭ ବର୍ଷୀୟ ଏହି କ୍ରିକେଟର ଏହାପୂର୍ବରୁ ୩୮ ଏକଦିବସୀୟ ଏବଂ ୧୧ ଟି୨୦ ଅନ୍ତରାଷ୍ଟ୍ରୀୟ ମ୍ୟାଚ୍ରେ ରାଷ୍ଟ୍ରୀୟ ଟିମ୍ର ପ୍ରତିନିଧିତ୍ୱ କରିଛନ୍ତି। ଅକ୍ଷରଙ୍କୁ ପ୍ରଥମ ଟେଷ୍ଟରେ ଖେଳିବାର ସୁଯୋଗ ଦିଆଯାଇଥାନ୍ତା। ହେଲେ ଆହତ ହୋଇଥିବା କାରଣରୁ ସେ ବାହାର ହୋଇଥିଲେ। ଏବେ ତାଙ୍କର ଟେଷ୍ଟ ମ୍ୟାଚ୍ ଖେଳିବାର ସ୍ବପ୍ନ ସତ ହୋଇଛି।
ପ୍ରତି କ୍ରିକେଟର ଭାବେ ଟେଷ୍ଟ କ୍ରିକେଟ ଖେଳିବାର ସ୍ବପ୍ନ ଦେଖିଥିଲେ ଅକ୍ଷର। ସ୍କୁଲରେ ପଢ଼ୁଥିବା ବେଳେ ୯ମ ଶ୍ରେଣୀ ପର୍ଯ୍ୟନ୍ତ ସେ ଭଲ ପଢ଼ୁଥିଲେ। ସେ କ୍ଲାସରେ ଟପ୍ କରୁଥିଲେ। ସେତେବେଳେ ସେ ଭବିଷ୍ୟତରେ କ୍ରିକେଟର ହେବେ ବୋଲି ଭାବି ନ ଥିଲେ। ଏପରିକି ସେ ବହୁତ ପତଳା ଥିବାରୁ ପରିବାରଲୋକେ ଚିନ୍ତାରେ ପଡ଼ିଥିଲେ। ଏହାକୁ ନେଇ ତାଙ୍କ ବାପା ତାଙ୍କୁ ଜିମ୍ ପଠାଇବାକୁ ଚିନ୍ତା କରିଥିଲେ। ଅକ୍ଷରଙ୍କୁ ତାହା ପସନ୍ଦ ନ ଥିଲା। କିଛି ଦିନ ଜିମ୍ ଯିବା ପରେ ସେ ବନ୍ଦ କରିଦେଇଥିଲେ। ଡମ୍ବଲ ଉଠାଇ ପାରୁ ନ ଥିବାରୁ ସେ ବେଶ ନିରାଶ ହେଉଥିଲେ।
ଜିମ୍ ଛାଡ଼ିବା ପରେ ନିଜ ଫିଟ୍ନେସରେ ସୁଧାର ଆଣିବା ପାଇଁ ସେ କ୍ରିକେଟ ଖେଳିବା ଆରମ୍ଭ କରିଥିଲେ। ଏହା ତାଙ୍କର ଜୀବନର ଟର୍ନିଂ ପଏଣ୍ଟ ଥିଲା। ସେ ଭଲ କ୍ରିକେଟ ଖେଳୁଥିଲେ। ତାଙ୍କ ବାପାଙ୍କୁ ଏହା ବେଶ ପ୍ରଭାବିତ କରିଥିଲା। ଶେଷରେ ସେ ପୁଅଙ୍କୁ ଟ୍ରେନିଂ ଦେବା ପାଇଁ କୋଚ୍ଙ୍କୁ ଅନୁରୋଧ କରିଥିଲେ।
୧୮ ବର୍ଷ ୧ ମାସ ହୋଇଥିବା ବେଳେ ସେ ଗୁଜରାଟ ରଣଜୀ ଦଳ ପାଇଁ ଖେଳିବାର ସୁଯୋଗ ପାଇଥିଲେ। ଅଣ୍ଡର-୧୯ ପାଇଁ ସେ ଏନ୍ସିଏ ଯାଇଥିଲେ। ସେଠାରେ ବୋଲର୍ କମ୍ ଏବଂ ବ୍ୟାଟ୍ସମ୍ୟାନ୍ ଅଧିକ ଥିବା କୋଚ୍ ତାଙ୍କୁ କହିଥିଲେ। ଏହାର ଜବାବରେ ଅକ୍ଷର ବ୍ୟାଟ୍ସମ୍ୟାନ୍ ଭାବେ ଖେଳିବାକୁ ସେ ଚାହାନ୍ତି, ହେଲେ ସେ କିଛି କିଛି ବୋଲିଂ ମଧ୍ୟ କରୁଥିବା କହିଥିଲେ। ହେଲେ କୋଚ୍ ତାଙ୍କୁ ବୋଲିଂରେ ଧ୍ୟାନ ଦେବାକୁ କହିଥିଲେ। ବାଧ୍ୟହୋଇ ଅକ୍ଷର ବୋଲିଂ କରିଥିଲେ। ପରେ ତାଙ୍କୁ ମଜା ଲାଗିଥିଲା। ଏବେ ସେ ଜଣେ ସଫଳ ଅଲରାଉଣ୍ଡର ଭାବେ ପରିଗଣିତ ହେଉଛନ୍ତି।
