ଖୁଣ୍ଟୁଣୀ,୨୦ା୧(ଡି.ଏନ.ଏ.):ବହୁ ଚର୍ଚ୍ଚିତ ଓ ପ୍ରତୀକ୍ଷିତ ମହିଳା କ୍ରିକେଟର ରାଜଶ୍ରୀ ସ୍ବାଇଁଙ୍କ ମୃତ୍ୟୁର ୮ ଦିନ ପରେ ବି ରହସ୍ୟ ଉନ୍ମୋଚିତ ହୋଇନାହିଁ। ମଙ୍ଗଳବାର ବ୍ୟବଚ୍ଛେଦ ରିପୋର୍ଟ ପୋଲିସର ହସ୍ତଗତ ହୋଇଥିଲେ ସୁଦ୍ଧା ଏହାକୁ ସାର୍ବଜନିନ କରାଯାଇନାହିଁ। ପୋଲିସ ଭିସେରା ରିପୋର୍ଟକୁ ଅପେକ୍ଷା କରିଛି। ଆସନ୍ତା ୩ରୁ ୪ଦିନ ମଧ୍ୟରେ ଭିସେରା ରିପୋର୍ଟ ଓ ଏକ୍ସପର୍ଟ ଟିମ୍ର ମତାମତ ଆସିବା ପରେ ଉଭୟ ରିପୋର୍ଟକୁ ଆଧାର କରି ମୃତ୍ୟୁ ରହସ୍ୟ ସାର୍ବଜନୀନ କରାଯିବ ବୋଲି ଗୁରୁଡିଝାଟିଆ ଥାନା ଆଇଆଇସି ରଞ୍ଜନ କୁମାର ପ୍ରଧାନ କହିଛନ୍ତି।
ଉଲ୍ଲେଖଯୋଗ୍ୟ, ପୁରୀ ଜିଲା ରାମଚଣ୍ଡୀ ଥାନା ଭୁଆଗାଁର ଗୁଣନିଧି ସ୍ବାଇଁଙ୍କ ଝିଅ ରାଜଶ୍ରୀ କଟକ ବଜ୍ରକବାଟିଠାରେ ରହି ତାଙ୍କର ୨୫ ଜଣ ସାଙ୍ଗଙ୍କ ସହିତ କ୍ରିକେଟ ପ୍ରଶିକ୍ଷଣ ନେଉଥିଲେ। ଜାନୁୟାରୀ ୧୫ ତାରିଖରେ ପୁଡୁଚେରୀଠାରେ ହେବାକୁ ଥିବା ବରିଷ୍ଠ ମହିଳା କ୍ରିକେଟ ଟିମ୍ ପାଇଁ ଓଡିଶା ପକ୍ଷରୁ ୧୦ତାରିଖରେ ଟିମ୍ ସଦସ୍ୟ ଚୟନ କରାଯାଇଥିଲା। ହେଲେ ଚୟନ ଲିଷ୍ଟରେ ରାଜଶ୍ରୀଙ୍କ ନାମ ନ ଥିବାରୁ ସେ ଅତ୍ୟନ୍ତ ଭାଙ୍ଗି ପଡ଼ିଥିଲେ। ୧୧ ତାରିଖରେ ଟାଙ୍ଗିସ୍ଥିତ ଡ୍ରିମ୍ସ ଗ୍ରାଉଣ୍ଡଠାରେ ଅଭ୍ୟାସ ମ୍ୟାଚ ପାଇଁ ତାଙ୍କୁ କୋଚ୍ ଡାକିଥିଲେ। ରାଜଶ୍ରୀ କିନ୍ତୁ ମନା କରିବା ସହିତ ଘରକୁ ଯାଉଛି ବୋଲି କହି ଚାଲି ଯାଇଥିଲେ। ସେ ଫେରିବା ବିଳମ୍ବ ହେବାରୁ କୋଚ୍ ତାଙ୍କ ଘର ସହ ଯୋଗାଯୋଗ କରିଥିଲେ। ହେଲେ ସେ ଘରକୁ ଯାଇ ନ ଥିବା ପରିବାର ଲୋକଙ୍କଠାରୁ ଶୁଣିବାକୁ ପାଇଥିଲେ। କୋଚ୍ ସେହି ଦିନ ମଙ୍ଗଳାବାଗ ଥାନାରେ ଏତଲା ଦେଇଥିଲେ। ୧୨ ତାରିଖ ସକାଳୁ ଖୁଣ୍ଟୁଣୀ ବନାଞ୍ଚଳର ଜଣେ କର୍ମଚାରୀ ଏକ ସ୍କୁଟି ବ୍ରାହ୍ମଣବସ୍ତ ସଂରକ୍ଷିତ ଜଙ୍ଗଲରେ ଥୁଆ ହୋଇଥିବା ଦେଖି ଗୁରୁଡ଼ିଝାଟିଆ ପୋଲିସକୁ ଖବର ଦେଇଥିଲେ। ଖବରପାଇ ଆଇଆଇସି ପ୍ରଧାନ ମଙ୍ଗଳାବାଗ ଥାନାକୁ ଏହା ଜଣାଇଥିଲେ। ଉଭୟ ପୋଲିସ ଜଙ୍ଗଲ ମଧ୍ୟରେ ବହୁ ଖୋଜାଖୋଜି କରି ରାତି ହୋଇଯିବାରୁ ଫେରି ଆସିଥିଲେ ଓ ପରଦିନ ୧୩ ତାରିଖରେ ସ୍କୁଟିଥିବା ସ୍ଥାନରୁ ୩ଶହ ମିଟର ଦୂର ଘଞ୍ଚ ଜଙ୍ଗଲ ମଧ୍ୟରୁ ରାଜଶ୍ରୀଙ୍କ ମୃତ ଶରୀର ଝୁଲନ୍ତା ଅବସ୍ଥାରେ ଏକ ଗଛରୁ ଠାବ କରିଥିଲା। ସେତେବେଳେ ରାଜଶ୍ରୀଙ୍କ ପରିବାର ଲୋକେ ଝିଅକୁ ହତ୍ୟା କରାଯାଇ ଗଛରେ ଟାଙ୍ଗି ଦିଆ ଯାଇଥିବା ସଙ୍ଗିନ ଅଭିଯୋଗ ଆଣିବା ସହ ରାଜଶ୍ରୀଙ୍କ ମୃତ୍ୟୁପାଇଁ ଓସିଏକୁ ଦାୟୀ କରିଥିଲେ।
