ପଟ୍ଟାମୁଣ୍ଡାଇ,୧୫।୨(ସ୍ବ.ପ୍ର.): ପଟ୍ଟାମୁଣ୍ଡାଇର ଐତିହ୍ୟ ପରମ୍ପରା ଓ ମର୍ଯ୍ୟାଦା କ୍ଷୂର୍ଣ୍ଣ କରିବାକୁ ଏକ ଚକ୍ରାନ୍ତକାରୀ ଗୋଷ୍ଠୀ ଉଦ୍ୟମ ଚଳାଇଛନ୍ତି। ସବ୍ଡିଭିଜନ ମାନ୍ୟତା ଦାବିରୁ ନଜର ହଟାଇବାକୁ ପଟ୍ଟାମୁଣ୍ଡାଇ ପୌରାଞ୍ଚଳକୁ ପ୍ରବେଶ ପଥରେ ପ୍ଲମ୍ବିଂ ସହର ତୋରଣ ରାସ୍ତାରେ ଲଗାଯାଇଛି। ଏହାକୁ ପୌରାଞ୍ଚଳବାସୀଙ୍କ ସହ ସବୁ ମହଲରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି। ୧୯୫୧ରୁ ପଟ୍ଟାମୁଣ୍ଡାଇକୁ ନିର୍ବାଚନ ମଣ୍ଡଳୀ ଘୋଷଣା ହୋଇଥିବା ବେଳେ ପରବର୍ତ୍ତୀ ସମୟରେ ୨୦୦୯ରେ ଏହାକୁ ଉଚ୍ଛେଦ କରାଯାଇଛି। ଫଳରେ ପଟ୍ଟାମୁଣ୍ଡାଇର ସ୍ବାଭିମାନ ଓ ମର୍ଯ୍ୟାଦା ବଜାଇ ରଖିବାକୁ ପଟ୍ଟାମୁଣ୍ଡାଇ-ରାଜନଗର ବିକାଶ ପରିଷଦ ପକ୍ଷରୁ ୧୧ବର୍ଷ ହେଲା ପଟ୍ଟାମୁଣ୍ଡାଇକୁ ରାଜସ୍ବ ସବ୍ଡିଭିଜନ ଘୋଷଣା କରିବାକୁ ଦାବି ହୋଇଆସୁଛି। ଏଥିପାଇଁ ବହୁ ଆନ୍ଦୋଳନ, ଅନଶନ, ଧାରଣା, ପ୍ରତିବାଦ ସଭା ଜାରି ରହିଥିବା ବେଳେ ଓଡ଼ିଶା ହାଇକୋର୍ଟରେ ବିକାଶ ପରିଷଦ ପକ୍ଷରୁ ଜନସ୍ବାର୍ଥ ମାମଲା କରାଯାଇଛି। ଏଥିପ୍ରତି ସବୁ ରାଜନୈତିକ ଦଳର ସମର୍ଥନ ରହିଛି। ରାଜ୍ୟ ସରକାରଙ୍କ ରାଜସ୍ବ ସବ୍ଡିଭିଜନ ଘୋଷଣା କରିବା ବାକି ରହିଛି।
ଏଭଳିସ୍ଥିତିରେ ପଟ୍ଟାମୁଣ୍ଡାଇ ପୌର ପରିଷଦକୁ ପ୍ଲମ୍ବିଂ ସହର ଭାବେ ବିବେଚନା କରି ତୋରଣ ତିଆରି କରିବା ପଟ୍ଟାମୁଣ୍ଡାଇବାସୀଙ୍କୁ ବ୍ୟଥିତ ଓ ଲଜ୍ଜିତ କରିଛି। ଏ ସମ୍ପର୍କରେ ବିକାଶ ପରିଷଦର ଆବାହକ ଆଇନଜୀବୀ କ୍ଷୀରୋଦ ପ୍ରଧାନଙ୍କୁ ଯୋଗାଯୋଗ କରିବାରେ ଏହା ଏକ ରାଜନୈତିକ ହୀନ ଚକ୍ରାନ୍ତ ବୋଲି କହିଛନ୍ତି। ବିକାଶ ପରିଷଦର ସବ୍ଡିଭିଜନ ମାନ୍ୟତା ଦାବିକୁ ଚପାଇ ଦେଇ ନଜର ହଟାଇବାକୁ ଗେଟ ତିଆରି କରାଯାଇଛି। ଏହା ଛଡା ପଟ୍ଟାମୁଣ୍ଡାଇ ପୌରପରିଷଦର ୨୧ ୱାର୍ଡକୁ ବିଶୁଦ୍ଧ ପାନୀୟ ଜଳ ଯୋଗାଇ ଦେବାରେ ପୌର କର୍ତ୍ତୃପକ୍ଷ ଓ ବିଭାଗୀୟ ଯନ୍ତ୍ରୀ ବିଫଳ ହୋଇଥିବା ବେଳେ ପ୍ଲମ୍ବିଂ ସହର ଫଳକ ଲଗାଇ ହସ୍ୟାସ୍ପଦ ବୋଲି ଆଇନଜୀବୀ ପ୍ରଧାନ କହିଛନ୍ତି। ପଟ୍ଟାମୁଣ୍ଡାଇ କଲେଜ ପ୍ରାକ୍ତନ ଅଧ୍ୟକ୍ଷ ପ୍ରଫେସର ଅନିରୁଦ୍ଧ ରାଉଳ କହିଛନ୍ତି, ପଟ୍ଟାମୁଣ୍ଡାଇ ଏକ ଐତିହ୍ୟ ସମ୍ପୂର୍ଣ୍ଣ ଅଞ୍ଚଳ ଭାବେ ପରିଚିତ ବଜାୟ ରଖିଛି। ମାତ୍ର ପଟ୍ଟାମୁଣ୍ଡାଇ ପୌରାଞ୍ଚଳକୁ ପ୍ଲମ୍ବିଂ ସହରର ଆଖ୍ୟା ଦେବା ଏକ ନିନ୍ଦନୀୟ ଘଟଣା ବୋଲି ସେ କହିଛନ୍ତି। ପଟ୍ଟାମୁଣ୍ଡାଇ ବାର ଆସୋସିଏଶନ ପୂର୍ବତନ ଉପସଭାପତି ପ୍ରମୋଦ କୁମାର ସାହୁ କହିଛନ୍ତି, ଏଭଳି ନିନ୍ଦନୀୟ ଘଟଣାକୁ ବରିଷ୍ଠ ନାଗରିକମାନେ ଦୃଢ଼ ବିରୋଧ କରୁଛନ୍ତି। ଖୁବ୍ଶୀଘ୍ର ଏଭଳି ନାମକରଣକୁ ପରିବର୍ତ୍ତନ କରା ନ ଗଲେ ବ୍ୟାପକ ଜନଆନ୍ଦୋଳନ ହେବ ବୋଲି ସେ ଚେତାଇ ଦେଇଛନ୍ତି। ଏ ସମ୍ପର୍କରେ ପୌର କାର୍ଯ୍ୟନିର୍ବାହୀ ଅଧିକାରୀ ସମ୍ପଦ କୁମାର ସ୍ବାଇଁଙ୍କୁ ପଚାରିବାରେ ଖୁବ୍ଶୀଘ୍ର ଏ ଫଳକ ପରିବର୍ତ୍ତନ କରାଯିବ ବୋଲି ସେ କହିଛନ୍ତି। ତେବେ ଏଭଳି କଦର୍ଥ ଭାବେ ନାମକରଣ କରିବାକୁ ପଟ୍ଟାମୁଣ୍ଡାଇ ସହରବାସୀ ଦୃଢ ବିରୋଧ କରିଛନ୍ତି।
