ଜୟପୁର,୨୧।୫: କୋରାପୁଟ ଜିଲା ଜୟପୁରର ଓଏସଏପି ତୃତୀୟ ବାଟାଲିୟନର ହାବଲଦାରକୁ ମାରଣାସ୍ତ୍ରରେ ଆକ୍ରମଣ ଅଭିଯୋଗରେ ଜୟପୁର ଏୟାରପୋର୍ଟର ଇଣ୍ଡିଆ -୧ ଏୟାରଲାଇନ୍ସର ଷ୍ଟେଶନ ମ୍ୟାନେଜରଙ୍କୁ ଗିରଫ କରି ଅପରାହ୍ନ ୩ଟାରେ କୋର୍ଟ ଚାଲାଣ କରିଛି ଜୟପୁର ସଦର ପୋଲିସ । ଅଭିଯୁକ୍ତ ଜଣକ ହେଲେ ଚନ୍ଦୁ ବେହେରା। ସୂଚନା ଅନୁଯାଇ ଓଏସଏପି ତୃତୀୟ ବାଟାଲିୟନ କୋରାପୁଟର ହାବଲଦାର ରାଜେଶ କୁମାର ସାହୁ ବର୍ତ୍ତମାନ ଜୟପୁର ଏୟାର ପୋର୍ଟରେ ସୁରକ୍ଷା ଡ୍ୟୁଟିରେ ନିୟୋଜିତ ଅଛନ୍ତି । ଏନେଇ ସେ ବୁଧବାର ଜୟପୁର ସଦର ଥାନାରେ ଲିଖିତ ଅଭିଯୋଗ କରିଛନ୍ତି । ତାଙ୍କ ଅଭିଯୋଗ ପତ୍ରରେ ଉଲ୍ଲେଖ କରିଛନ୍ତି ଯେ ବୁଧବାର ସକାଳ ୬ଟାରୁ ଅପରାହ୍ନ ୧ ଘଣ୍ଟା ଯାଏ ତାଙ୍କର ଡ୍ୟୁଟି ଥିଲା । ସକାଳ ୮ ଟା ୩୦ ମନିଟ ସମୟରେ ଜୟପୁର ଏୟାରପୋର୍ଟର ଇଣ୍ଡିଆ -୧ ଏୟାରଲାଇନ୍ସର ଷ୍ଟେଶନ ମ୍ୟାନେଜର ଚନ୍ଦୁ ବେହେରା ଆସି କାରରୁ ଓହ୍ଲାଇ ତାଙ୍କୁ ଆକ୍ରମଣ କରି ରକ୍ତାକ୍ତ କରିଥିଲେ । ଖରାପ ଭାଷାରେ ଗାଳି ଗୁଲଜ କରିଥିଲେ। ବିମାନ ସେବା ବୁଧବାର ବନ୍ଦ ଥିବା ବେଳେ ଗେଟ ବନ୍ଦ ରହିଥିଲା। ଅଭିଯୁକ୍ତ ଜଣକ କାରକୁ ଭିତରକୁ ପୁରାଇବାକୁ ଚେଷ୍ଟା କରିଥିବା ବେଳେ ହାବିଲଦାର ଏହାକୁ ବିରୋଧ କରିଥିଲେ। ପରେ ଷ୍ଟେଶନ ମ୍ୟାନେଜର ଚନ୍ଦୁ ବେହେରା ଏକ ଧାରୁଆ ଅସ୍ତ୍ର ଧରି ହାବିଲଦାର ରାଜେଶଙ୍କର ବେକରେ ଆକ୍ରମଣ କରି ତାଙ୍କୁ ରକ୍ତାକ୍ତ କରିଥିଲେ । ଏହା ସହ ତାଙ୍କୁ ଓ ତାଙ୍କ ପରିବାରର ସଦସ୍ୟଙ୍କୁ ମଧ୍ୟ ଜୀବନରୁ ମାରିଦେବାକୁ ଧମକ ଦେଇଥିଲେ । ପୁଣି ଅଭିଯୁକ୍ତ ଚନ୍ଦୁ ହାବିଲଦାର ତଳେ ପଡିଯିବାରୁ ଲାତ ଗୋଇଠା ମଧ୍ୟ ମାରିଥିଲେ। ଏହା ଦେଖି ଅନ୍ୟ କର୍ମଚାରି ମାନେ ହାବିଲଦାରଙ୍କୁ ରକ୍ଷା କରିବାକୁ ଚେଷ୍ଟା କରି ମଧ୍ୟ ସଫଳ ହୋଇ ପାରି ନଥିଲେ। ଅଭିଯୁକ୍ତ ଜଣକ ଆଗରୁ ମଧ୍ୟ ବହୁ କର୍ମଚାରିଙ୍କ ସହ ଏପରି ବ୍ୟବହାର କରୁଥିବା ଅଭିଯୋଗ ପତ୍ରରେ ଉଲ୍ଲେଖ କରାଯାଇଛି । ଅଭିଯୋଗକୁ ଭିତ୍ତି କରି ପୋଲିସ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା ଏହାସହ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରାଯାଇଛି। ଗିରଫ ଅଭିଯୁକ୍ତ ଜଣକ ଆନ୍ଧ୍ର ପ୍ରଦେଶର ଶ୍ରୀକାକୁଲମ ଜିଲାର ବୋଲି ପୋଲିସ ତଦନ୍ତରୁ ଜାଣିବାକୁ ପାଇ ଥିବା ବିଷୟ ଜୟପୁର ସଦର ଥାନା ଅଧିକାରି ସଚିନ୍ଦ୍ର ପ୍ରଧାନ ସୂଚନା ଦେଇଛନ୍ତି ।
