ଦେବଗଡ଼,୩।୧୨(ଡି.ଏନ.ଏ)- ମଦ ଦେବାରେ ବିଳମ୍ବ ହେବାରୁ ଦେବଗଡ଼ ଜିଲା ବାରକୋଟ ବ୍ଲକ ସଦର ମହକୁମାରେ ଥିବା ବିଦେଶୀ ମଦ ଦୋକାନରେ ମଦ ବୋତଲ ଭାଙ୍ଗି ମ୍ୟାନେଜରଙ୍କୁ ମରଣାନ୍ତକ ଆକ୍ରମଣ କରିବା ଓ ନଗଦ ୧୫ ହଜାର ଟଙ୍କା ଲୁଟି ନେଇଥିବା ଅଭିଯୋଗ ହୋଇଛି। ଅଭିଯୋଗ ଆଧାରରେ ବାରକୋଟ ଥାନା ପୋଲିସ ଏକ ଲୁଟ୍ ମାମଲା ଋଜୁ କରି ଏ ମାମଲାରେ ୨ ଜଣଙ୍କୁ ଗିରଫ କରିଥିବା ବେଳେ ଅନ୍ୟ ୨ଜଣ ଫେରାର ଥିବା ଜଣାପଡିଛି। ପୋଲିସ ସୂତ୍ରରୁ ମିଳିଥିବା ସୂଚନା ଅନୁଯାୟୀ ବାରକୋଟ (ଡଁରା)ର କୃଷ୍ଣଚନ୍ଦ୍ର ସାହୁ, ଗରଗଡବାହାଲ ଗ୍ରାମର କ୍ଷେତ୍ରବାସୀ ନାୟକ, ସୁନ୍ଦରଗଡ ଜିଲା ବଣାଁଇ ଥାନା ଅନ୍ତର୍ଗତ ଟେଣ୍ଡରା ଗ୍ରାମର ରାଜୀବ ଓ ଅନ୍ୟ ଜଣେ ଯୁବକ ମଙ୍ଗଳବାର ଅପରାହ୍ନରେ ବାରକୋଟ ବିଦେଶୀ ମଦ ଦୋକାନକୁ ଆସି ମଦ ମାଗିଥିଲେ ା ମାତ୍ର ଦୋକାନ ମ୍ୟାନେଜର ଗୋପାଳ ଗୁପ୍ତା ଖାଉଥିବାରୁ ଅପେକ୍ଷା କରିବାକୁ ସେମାନଙ୍କୁ କହିଥିଲେ ା ତେବେ ଯୁବକମାନେ ତାଙ୍କ କଥା ନ ଶୁଣି ଶୀଘ୍ର ମଦ ଦେବାକୁ ଜିଦ ଧରିବା ସହ ଗାଳିଗୁଲଜ କରିଥିଲେ। ମଦ ଦୋକାନ ମ୍ୟାନେଜର ଗୋପାଳ ସେମାନଙ୍କୁ ବୁଝାଇବାକୁ ଚେଷ୍ଟା କରୁଥିବା ବେଳେ ସେମାନେ ଗୋପାଳଙ୍କୁ ଆକ୍ରମଣ ପାଇଁ ଉଦ୍ୟତ ହୋଇଥିଲେ। ଏହି ସମୟରେ ସେମାନଙ୍କ ମଧ୍ୟରୁ ଜଣେ ଏକ ବିୟର ବୋତଲ ଭାଙ୍ଗି ଉକ୍ତ ଭଙ୍ଗା ବୋତଲ ସାହାଯ୍ୟରେ ଗୋପାଳଙ୍କୁ ମରଣାନ୍ତକ ଆକ୍ରମଣ କରିଥିଲା ା ଫଳରେ ମ୍ୟାନେଜର ଗୋପାଳଙ୍କର ମୁଣ୍ଡ, ଗାଲ ଓ ନାକ ଆଦିରେ ଗଭୀର କ୍ଷତ ସୃଷ୍ଟି ହୋଇଥିଲା। ଅନ୍ୟପକ୍ଷରେ ଦୋକାନର କ୍ୟାଶ ଡ୍ରରୁ ମଧ୍ୟ ୧୫ ହଜାର ଟଙ୍କା ଲୁଟିନେଇଥିଲେ ା ମଦ ଦୋକାନ କର୍ମଚାରୀମାନେ ଚିକିତ୍ସା ନିମନ୍ତେ ତାଙ୍କୁ ବାରକୋଟ ଡାକ୍ତରଖାନାରେ ଭର୍ତ୍ତୀ କରିବା ସହ ଏ ସମ୍ପର୍କରେ ବାରକୋଟ ଥାନା ପୋଲିସକୁ ସୂଚନା ଦେଇଥିଲେ ା ମଦଦୋକାନ ମ୍ୟାନେଜର ଗୋପାଲ ମଧ୍ୟ ଏନେଇ ବାରକୋଟ ଥାନାରେ ଲିଖିତ ଅଭିଯୋଗ କରିଥିଲେ ା ଅଭିଯୋଗ ଆଧାରରେ ବାରକୋଟ ଥାନା ପୋଲିସ ଅଭିଯୁକ୍ତମାନଙ୍କ ବିରୁଦ୍ଧରେ ଲୁଟ ମାମଲା ସମେତ ବିଭିନ୍ନ ଦଫାରେ ଏକ ମାମଲା ରୁଜୁକରିବା ସହ ବୁଧବାର ଅଭିଯୁକ୍ତ କୃଷ୍ଣଚନ୍ଦ୍ର ଓ କ୍ଷେତ୍ରବାସୀକୁ ଗିରଫ କରିଛି। ଗିରଫ ଯୁବକ ଦ୍ୱୟଙ୍କୁ ଗୁରୁବାର କୋର୍ଟ ଚାଲାଣ କରାଯିବ ବୋଲି ବାରକୋଟ ଥାନା ଭାରପ୍ରାପ୍ତ ଅଧିକାରୀ ରାଜେନ୍ଦ୍ର ମହାପାତ୍ର ସୂଚନା ଦେଇଛନ୍ତି ା ତେବେ ଟଙ୍କା ଲୁଟ ଅଭିିଯୋଗକୁ ଅଭିଯୁକ୍ତମାନଙ୍କ ପରିବାର ଲୋକେ ଅସ୍ବୀକାର କରିବା ସହ ମଦ ଦୋକାନ ମ୍ୟାନେଜର ମଦର ଧାର୍ଯ୍ୟ ଦରଠାରୁ ଢେର ଅଧିକ ମୂଲ୍ୟ ମାଗିବାକୁ କେନ୍ଦ୍ରକରି ଏହି ଗଣ୍ଡଗୋଳ ଘଟିଥିବା ପ୍ରକାଶ କରିଛନ୍ତି ା
