ଅରୈୟା,୧୬।୫: ସାରା ଦେଶରେ କରୋନା ମହାମାରୀ ତାଣ୍ଡବ ରଚୁଥିବା ବେଳେ ଏପର୍ଯ୍ୟନ୍ତ ଏହାର ଭୟାବହତାକୁ ବୁଝିପାରୁନାହାନ୍ତି ଲୋକେ। କରୋନା ସଂକ୍ରମଣକୁ ରୋକିବା ପାଇଁ ସରକାର ବିଭିନ୍ନ ପଦକ୍ଷେପ ଗ୍ରହଣ କରୁଥିବା ବେଳେ କେତେକ ଅମାନିଆ କୋଭିଡ ନିୟମ ଉଲ୍ଲଂଘନ କରୁଥିବା ଦେଖିବାକୁ ମିଳିଛି। ସହରଗୁଡ଼ିକର ଅବସ୍ଥା ଅତ୍ୟନ୍ତ ଭୟାନକ ରହିଥିବା ବେଳେ ବର୍ତ୍ତମାନ କରୋନା କବଳରେ ଗାଁ ରହିଛି। ବର୍ଦ୍ଧିତ କରୋନା ସଂକ୍ରମଣକୁ ଦୃଷ୍ଟିରେ ରଖି ଗଁାଗୁଡ଼ିକରେ ଘରେ ଘରେ ପରୀକ୍ଷା ଓ ସର୍ଭିଲାନ୍ସ ଉପରେ ସରକାର ଜୋର ଦେଇଛନ୍ତି। ଏଥିସହ କରୋନାକୁ ରୋକିବା ପାଇଁ ଟିକାକରଣ ଅଭିଯାନ ମଧ୍ୟ ଚଲାଯାଇଛି। ଯେଉଁଠି ଟିକାକାରଣକୁ କରୋନାର ବିଶଲ୍ୟକରଣୀ କୁହାଯାଉଛି ସେଠାରେ ଲୋକମାନେ ଏହାକୁ ନେବା ପାଇଁ ଅମଙ୍ଗ ହେବା ସହ ସ୍ବାସ୍ଥ୍ୟକର୍ମୀଙ୍କ ଉପରକୁ ଆକ୍ରମଣ କରୁଛନ୍ତି। କିଛି ଏଭଳି ଦୃଶ୍ୟ ଦେଖିବାକୁ ମିଳିିଛି ଉତ୍ତରପ୍ରଦେଶ ଅରୈୟାରେ। ସୂଚନାଯୋଗ୍ୟ, ଅରୈୟା ଜିଲାର ସଦର କୋତଓ୍ବାଲି ଅଞ୍ଚଳର କାଦଲପୁର ଗାଁରେ ସ୍ବାସ୍ଥ୍ୟ ବିଭାଗର ଏକ ଟିମ୍ ଟିକାକରଣ ପାଇଁ ପହଞ୍ଚିଥିଲା। ସେହି ସମୟରେ ଗାଁର ମହିଳା, ପୁରୁଷ ଓ ପିଲାମାନେ ସେମାନଙ୍କ ଉପରକୁ ବାଡ଼ିଠେଙ୍ଗା ଧରି ଅତର୍କିତ ଆକ୍ରମଣ କରିଥିଲେ। ଆକ୍ରମଣ କରି ସେମାନଙ୍କୁ ଗାଁରୁ ବାହାରକୁ ବାହାର କରିଦେଇଥିଲେ। ଏହି ଘଟଣା ବାବଦରେ ସୂଚନା ମିଳିବା ପରେ ଏସ୍ଡିଏମ୍ ସଦର ରମେଶ ଯାଦବ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ନିର୍ଦ୍ଦେଶ ଦେଇଛନ୍ତି।
