ବିଦ୍ୟୁତ କର୍ମଚାରୀଙ୍କୁ ଆକ୍ରମଣ, ଜଣେ ଗିରଫ
9:12 pmJuly 26, 2023July 26, 2023 / 05

ହିଞ୍ଜିଳିକାଟୁ,୨୬ା୭(ଦ୍ୱିତୀକୃଷ୍ଣ ପଣ୍ଡା): ଟିପିଏସ୍‌ଓଡିଏଲ ଭିଜିଲାନ୍ସ ଟିମ୍‌କୁ ହିଞ୍ଜିଳି ଥାନା କାଞ୍ଜିଆମା ଗ୍ରାମରେ ଆକ୍ରମଣ ଘଟଣାରେ ବୁଧବାର ଜଣଙ୍କୁ ପୋଲିସ ଗିରଫ କରିଛି। ଗିରଫ ବ୍ୟକ୍ତି ହେଲେ ଉକ୍ତ ଗ୍ରାମର ରାମକୃଷ୍ଣ ସାହୁ । ମଙ୍ଗଳବାର ବିଦ୍ୟୁତ ଭିଜିଲାନ୍ସର ଏକ ଟିମ୍‌ ବିଦ୍ୟୁତ ଟାମ୍ପରିଂ ଯାଞ୍ଚ ପାଇଁ କାଞ୍ଜିଆମା ଗାଁ ଯାଇଥିଲେ। ରାମକୃଷ୍ଣଙ୍କ ଘରର ମିଟର ଯାଞ୍ଚ ବେଳେ ସେ ଉତ୍ତ୍ୟକ୍ତ ହୋଇ ଭିଜିଲାନ୍ସ କର୍ମଚାରୀଙ୍କୁ ଗାଳିଗୁଲଜ କରିଥିଲେ। ପରେ ଗ୍ରାମର କିଛି ଲୋକେ ମିଶି ଭିଜିଲାନ୍ସ ଏନ୍‌ଫୋର୍ସମେଣ୍ଟ ଟିମ୍‌ର ଲାଇନମ୍ୟାନ୍‌ ବରେନ୍ଦ୍ର କୁମାର ନିଶଙ୍କଙ୍କୁ ଆକ୍ରମଣ କରିବା ସହ ତାଙ୍କର ଫୋନ ନେଇ ଯାଇଥିବା ଥାନାରେ ଅଭିଯୋଗ ହୋଇଥିଲା। ଟିପିଏସ୍‌ଓଡିଏଏଲ୍‌ ଭିଜିଲାନ୍ସ ଏନ୍‌ଫୋର୍ସମେଣ୍ଟ ସହକାରୀ ନିର୍ବାହୀ ଯନ୍ତ୍ରୀ ନନ୍ଦ କିଶୋର ଦାଶ ହିଞ୍ଜିଳି ଥାନାରେ ଅଭିଯୋଗ କରିଥିଲେ। ଅଭିଯୋଗ ଭିତ୍ତିରେ ହିଞ୍ଜିଳି ଥାନାରେ କେସ୍‌ ନଂ- ୫୩୪/୨୩ରେ ଏକ ମାମଲା ରୁଜୁ କରି ପୋଲିସ ଘଟଣାର ତଦନ୍ତ ଚଳାଇଥିଲା। ବୁଧବାର ରାମକୃଷ୍ଣଙ୍କୁ ପୋଲିସ ଗିରଫ କରିବା ସହ ଲୁଟ୍‌ ମୋବାଇଲ ଜବତ କରିଛି। ତାଙ୍କୁ କୋର୍ଟ ଚାଲାଣ କରାଯାଇଥିବା ଥାନା ଆଇଆଇସି ଅଭିମନ୍ୟୁ ଦାସଙ୍କ ସୂତ୍ରରୁ ପ୍ରକାଶ।