ପୃଥିବୀରେ ଅନେକ ପ୍ରକାରର ଛତୁ ରହିଛି। କାହାର ରଙ୍ଗ ଧଳା କିମ୍ବା ଧୂସର ହୋଇଥିବା ବେଳେ ଆଉ କେତେକ ରଙ୍ଗିନ୍ ଏବଂ ଖୁବ୍ ସୁନ୍ଦର। ତା’ ଭିତରୁ କେତେକ ଛତୁକୁ ଆମେ ଖାଉଥିବା ବେଳେ ଆଉ କେତେକ ବିଷାକ୍ତ ହୋଇଥିବାରୁ ଖାଦ୍ୟ ଭାବେ ଗ୍ରହଣ କରାଯାଇ ନ ଥାଏ। ତେବେ ଜାଣିଲେ ଆଶ୍ଚର୍ଯ୍ୟ ହେବେ, ଏମିତି କେତେକ ଛତୁ ପ୍ରଜାତି ରହିଛି; ଯାହାକି ଅନ୍ଧାର ରାତିରେ ଜଳିଥାଏ, ଯାହାକି ଦେଖିବାକୁ ଅତ୍ୟନ୍ତ ମନୋରମ। ଜାଣିବା ଏଭଳି ଛତୁ ସମ୍ପର୍କରେ…
ଗୋଆରେ ଥିବା ମାଡ଼େଇ ଅଭୟାରଣ୍ୟ ବା ମୋଲେମ୍ ନ୍ୟାଶନାଲ୍ ପାର୍କରେ ଦେଖାଯାଏ ରାତିରେ ଆଲୋକ ପ୍ରଦାନ କରୁଥିବା ଏହି ଦୁର୍ଲଭ ପ୍ରଜାତିର ଛତୁ। ଏହାକୁ ଜୈବ ବିଶେଷଜ୍ଞମାନେ ମାସେନ୍ ଜେନସ୍ ଭାବେ ନାମ କରଣ କରିଛନ୍ତି। ତେବେ ଏହା ରାତିରେ ଜଳିବାର କାରଣ ହେଉଛି ଏଥିରେ ଥିବା ବାୟୋ ଲୁମିନିସେଣ୍ଟ ନାମକ ଉପଦାନ, ଯାହାକି ଜୁଳୁଜୁଳିଆ ପୋକ ଦେହରେ ମଧ୍ୟ ରହିଛି। ବର୍ଷାଦିନେ ହେଉଥିବା ଏହି ଛତୁ ଦିନରେ ଅନ୍ୟ ସାଧାରଣ ଛତୁ ଭଳି ଦେଖାଦେଉଥିବା ବେଳେ ଅନ୍ଧାର ରାତିରେ ସେଥିରୁ ହାଲୁକା ନୀଳ, ବାଇଗଣୀ କିମ୍ବା ହଳଦିଆ ରଙ୍ଗର ଆଲୋକ ବାହାରିଥାଏ।
ବର୍ତ୍ତମାନ ସୁଦ୍ଧା ସମଗ୍ର ପୃଥିବୀରେ ପ୍ରାୟ ୮୦ ପ୍ରଜାତିର ବାୟୋ ଲୁମିନେସେଣ୍ଟ ଛତୁ ଠାବ କରାଯାଇଛି। ତେବେ ଏହା ମଧ୍ୟରୁ ଉତ୍ତର ଆମେରିକା ଏବଂ ଏସିଆର କେତେକ ସ୍ଥାନରେ ଦେଖାଦେଉଥିବା ଆର୍ମିଲାରିଆ ମିଲିଆ ନାମକ ଛତୁ ଅଧିକ ଜଣାଶୁଣା। ସେହିପରି ବ୍ରାଜିଲ୍ରେ ମିଳୁଥିବା ମାଇସିନା ଲକ୍ଜାଏଟର୍ନା ବା ଏଟର୍ନାଲ୍ ଲାଇଟ୍ ମଶରୁମ୍ରେ ମଧ୍ୟ ରାତିରେ ଖୁବ୍ ସୁନ୍ଦର ଆଲୋକ ଦେଖାଯାଏ।
