ରଘୁନାଥପୁର,୨୩ା୭(ଡି.ଏନ୍ଏ.): ରଘୁନାଥପୁର ବ୍ଲକର ୭ଟି ବିଦ୍ୟାଳୟକୁ ତୃତୀୟ ପର୍ଯ୍ୟାୟରେ ରୂପାନ୍ତରଣ ନେଇ ବ୍ଲକ ପ୍ରଶାସନର ତତ୍ପରତା ପ୍ରକାଶ ପାଇଛି। ଏନେଇ ଶୁକ୍ରବାର ବିଡିଓ ଜିତେନ୍ଦ୍ର କୁମାର ନାୟକ ଗୋକୁଳପୁରସ୍ଥିତ ସାରଦା ସରକାରୀ ଉଚ୍ଚ ବିଦ୍ୟାଳୟ ଗସ୍ତ କରି ଆଲୁମନି କମିଟି, ଏସ୍ଏମ୍ସି, ପଞ୍ଚାୟତ ପ୍ରତିନିଧି, ୨ ଛାତ୍ର ପ୍ରତିନିଧିଙ୍କ ସମେତ ଶିକ୍ଷୟିତ୍ରୀ ଓ ଶିକ୍ଷକଙ୍କ ଉପସ୍ଥିତିରେ ବିଦ୍ୟାଳୟ ରୂପାନ୍ତରଣ ନେଇ ବୈଠକ କରିଥିଲେ। ପବିତ୍ର ଶିକ୍ଷାନୁଷ୍ଠାନର ନବୀକରଣ କାର୍ଯ୍ୟ କିପରି ସମସ୍ତଙ୍କ ସହଯୋଗରେ ସମ୍ପାଦନ ହେବ ସେ ନେଇ ଆଶା ପ୍ରକଟ କରିଥିଲେ। ଏଥିପାଇଁ ବ୍ଲକ ପ୍ରଶାସନ ପକ୍ଷରୁ ସହଯୋଗ ଯୋଗାଇ ଦିଆଯିବ ବୋଲି ବିଡିଓ ନାୟକ ପ୍ରତିଶ୍ରୁତି ଦେଇଥିଲେ। ଏହି ଅବସରରେ ବିଡିଓ ନାୟକଙ୍କୁ ଭାଙ୍ଗି ଯାଇଥିବା ଶ୍ରେଣୀଗୃହ,ରୋଷେଇ ଘର, ସାଇକେଲ ଶେଡ ଓ ଫଟା ଆଜବେଷ୍ଟସ ଘରେ କିପରି ପିଲାମାନେ ପାଠ ପଢୁଛନ୍ତି ସେସମ୍ପର୍କରେ ବୁଲାଇ ଦେଖାଯାଇଥିଲା। ବିଦ୍ୟାଳୟର ବାସ୍ତବ ଚିତ୍ର ଦେଖି ବିଡିଓ ନାୟକ ଦୁଃଖ ପ୍ରକାଶ କରିବା ସହ ସମସ୍ୟା ସମ୍ପର୍କରେ ଜିଲାପାଳଙ୍କୁ ଅବଗତ କରାଇବେ ବୋଲି କହିଥିଲେ। ବୈଠକରେ ସ୍ଥାନୀୟ ସରପଞ୍ଚ ତଥା ବିଦ୍ୟାଳୟର ପୂର୍ବତନ ଛାତ୍ରୀ ସୁଷମା ମଲ୍ଲିକ ଯୋଗଦେଇ ଶିକ୍ଷାନୁଷ୍ଠାନରେ ଥିବା ସମସ୍ୟାର ସମାଧାନ ପାଇଁ ସହାୟତା ଯୋଗାଇଦେବାକୁ କହିଥିଲେ। ଅନ୍ୟମାନଙ୍କ ମଧ୍ୟରେ ବୈଠକରେ ସହକାରୀ ବ୍ଲକ ଶିକ୍ଷାଧିକାରୀ ସବିତା ଦାସ, ଟିସି ରାଜଲକ୍ଷ୍ମୀ ସ୍ବାଇଁ, ପ୍ରଧାନଶିକ୍ଷକ ବିଶ୍ୱଜିତ ଓଝା, ଆଲୁମନି ସଭାପତି ବିନୋଦ ବିହାରୀ ମହାନ୍ତି ଓ ଉପ ସଭାପତି ଚନ୍ଦ୍ରଶେଖର ସିଂହ,ସମିତି ସଭ୍ୟା ପୂଜାଲତା ଦାସ, ଏସ୍ଏମ୍ସି ଚେୟାରପର୍ସନ ରାଜେନ୍ଦ୍ର ନାରାୟଣ ସିଂହ ପ୍ରମୁଖ ଉପସ୍ଥିତ ଥିଲେ। ବିଦ୍ୟାଳୟକୁ ୫-ଟି ଯୋଜନାରେ ଅନ୍ତର୍ଭୁକ୍ତ କରାଯାଇଥିବାରୁ ମୁଖ୍ୟମନ୍ତ୍ରୀ ଓ ୫-ଟି ସଚିବଙ୍କୁ କୃତଜ୍ଞତା ଜ୍ଞାମ୍ପନ କରାଯାଇଥିଲା।
