ନୂଆଦିଲ୍ଲୀ, ୨୫ା୯ (ପି.ଟି.)-ଭାରତୀୟ କ୍ରିକେଟରମାନଙ୍କ ଫିଟ୍ନେସ୍ ବଜାୟ ରଖିବା କ୍ଷେତ୍ରରେ ୟୋ ୟୋ ଟେଷ୍ଟର ଭୂମିକା କ’ଣ ରହିଛି ସେ ସମ୍ପର୍କରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଅଧିନାୟକ ବିରାଟ କୋହଲିଙ୍କୁ ପଚାରି ବୁଝିଛନ୍ତି। ବାଧ୍ୟତାମୂଳକ ଏରୋବିକ୍ ଫିଟ୍ନେସ୍ ରୁଟିନ ଉପରେ ମଧ୍ୟ ସେ ଜାଣିବାକୁ ଚାହିଁଥିଲେ। ‘ଫିଟ୍ ଇଣ୍ଡିଆ ମୁଭମେଣ୍ଟ’ର ଏକବର୍ଷ ପୂରଣ ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଫିଟ୍ନେସ୍ ଏକ୍ସପର୍ଟ ଏବଂ ଦେଶର କେତେଜଣ ପ୍ରଭାବଶାଳୀ ବ୍ୟକ୍ତିତ୍ୱଙ୍କ ସହ ବାର୍ତ୍ତାଳାପ କରିଥିଲେ। ମୋଦି ବିଶେଷ କରି ୟୋ ୟୋ ଟେଷ୍ଟ ଉପରେ କୋହଲିଙ୍କଠାରୁ ଜାଣିବାକୁ ଚାହିଁଥିଲେ। ଦଳର ଅଧିନାୟକଙ୍କୁ ଏହି ଟେଷ୍ଟ ଦେବାକୁ ହୋଇ ଥାଏ କି ନା ତାହା ପଚାରିଥିଲେ। ଭର୍ଚୁଆଲ ବାର୍ତ୍ତାଳାପ ସମୟରେ କୋହଲି କହିଥିଲେ, ଫିଟ୍ନେସ୍ ଦୃଷ୍ଟିକୋଣରୁ ଏହି ଟେଷ୍ଟ ଗୁରୁତ୍ୱ ବହନ କରୁଛି। ଆମେ ଯଦି ଗ୍ଲୋବାଲ ଫିଟ୍ନେସ୍ ସ୍ତର ଉପରେ ଆଲୋଚନା କରିବା ତେବେ ଆମ ଦଳର ଫିଟ୍ନେସ୍ ସ୍ତର ଅନ୍ୟ ଦଳଗୁଡ଼ିକଠାରୁ ଏବେ ସୁଦ୍ଧା କମ୍ ରହିଛି। ଆମକୁ ଏହି ସ୍ତରରେ ବୃଦ୍ଧି ଆଣିବାକୁ ହେବ। ୟୋ ୟୋ ଟେଷ୍ଟ କଷ୍ଟସାଧ୍ୟ। ଏଥିରେ ଦୁଇ ସେଟ୍ କୋନ୍ ୨୦ମିଟର ଛାଡ଼ି ରଖା ଯାଇଥାଏ। ବିପ୍ ସାଉଣ୍ଡ ହେବାମାତ୍ରେ ଆଥଲେଟ୍ଙ୍କୁ ପରବର୍ତ୍ତୀ ବିପ୍ ସାଉଣ୍ଡ ଆସିବା ପୂର୍ବରୁ ଅନ୍ୟ ପାର୍ଶ୍ୱରେ ରହିଥିବା ମାର୍କରରେ ପହଞ୍ଚତ୍ବାକୁ ପଡ଼ିଥାଏ। ତୃତୀୟ ବିପ୍ ସାଉଣ୍ଡ୍ ପୂର୍ବରୁ ଆଥଲେଟ୍ଙ୍କୁ ସେ ରେସ୍ ଆରମ୍ଭ କରିଥିବା ସ୍ଥାନକୁ ଫେରିବାକୁ ହୋଇଥାଏ। ପରବର୍ତ୍ତୀ ଦୌଡ଼ ପାଇଁ କ୍ରମେ ବିପ୍ ସାଉଣ୍ଡର ବ୍ୟବଧାନ କମାଇ ଦିଆଯାଇଥାଏ।
ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍)ର ୧୩ତମ ସଂସ୍କରଣ ଖେଳିବା ଲାଗି କୋହଲି ବର୍ତ୍ତମାନ ସଂଯୁକ୍ତ ଆରବ ଏମିରେଟ୍ସ (ୟୁଏଇ)ରେ ଅଛନ୍ତି। କୋହଲି କହିଥିଲେ ସେ ନିଜେ ଯଦି ଏହି ଟେଷ୍ଟରେ ଉତ୍ତୀର୍ଣ୍ଣ ନ ହୁଅନ୍ତି ତେବେ ସିଲେକ୍ସନ ପାଇଁ ଉପଲବ୍ଧ ହୋଇ ପାରିବେ ନାହିଁ। ଉନ୍ନତ ଫିଟ୍ନେସ୍ ଦ୍ୱାରା ବିଶେଷ କରି ଫାଷ୍ଟ ବୋଲରମାନେ ଉପକୃତ ହୋଇଥାନ୍ତି। ଭର୍ଚୁଆଲ ବାର୍ତ୍ତାଳାପ ସେସନରେ ଅଂଶଗ୍ରହଣ କରିଥିବା ଅନ୍ୟ କ୍ରୀଡ଼ାବିତ୍ଙ୍କ ମଧ୍ୟରେ ରହିଥିଲେ ପାରା ଅଲିମ୍ପିକ ଜାଭେଲିନ୍ ସ୍ବର୍ଣ୍ଣ ବିଜୟୀ ଦେବେନ୍ଦ୍ର ଝାଝାରିଆ ଏବଂ ଜମ୍ମୁ-କଶ୍ମୀର ମହିଳା ଫୁଟ୍ବଲର ଅଫସାନ ଆଶିକ୍। ଅଭିନେତା, ମଡେଲ ତଥା ଧାବକ ମିଲିନ୍ଦ ସୋମନ ଏବଂ ନ୍ୟୁଟ୍ରିଶନିଷ୍ଟ ରୁଜୁତା ଦିଓ୍ବେକର ପ୍ରମୁଖ ଉପସ୍ଥିତ ଥିଲେ। ପ୍ରଧାନମନ୍ତ୍ରୀ ମୋଦି ଆହୁରି ମଧ୍ୟ ଅଫସାନଙ୍କ ସହ କଥା ହୋଇଥିଲେ, ଯିଏକି ୨୦୧୭ରେ ଶ୍ରୀନଗରରେ ସୁରକ୍ଷାକର୍ମୀଙ୍କ ଉପରେ ଟେକା ପକାଇବା ଘଟଣାରେ ଚର୍ଚ୍ଚିତ ହୋଇଥିଲେ। ଏହି ୨୫ ବର୍ଷୀୟା ଜମ୍ମୁ-କଶ୍ମୀର ମହିଳା ଫୁଟ୍ବଲ ଟିମ୍ର ଗୋଲକିପର ଭାବେ ଖେଳିଛନ୍ତି। ପରେ ସେ ୨୦୧୯ରେ ଇଣ୍ଡିଆନ ଓମେନ୍ସ ଲିଗ୍ରେ ଏଫ୍ସି କୋହ୍ଲାପୁର ସିଟି ଦଳ ତରଫରୁ ଖେଳିଥିଲେ। ଶ୍ରୀନଗରରେ ସେ ୟଙ୍ଗଷ୍ଟରମାନଙ୍କୁ ଟ୍ରେନିଂ ଦେଉଛନ୍ତି। ମୋଦି ତାଙ୍କର ଉଚ୍ଚ ପ୍ରଶଂସା କରିଛନ୍ତି। ଅଫ୍ସାନ କହିଥିଲେ, ‘କ୍ୟାପଟେନ କୁଲ୍’ ଭାବେ ପରିଚିତ ପୂର୍ବତନ ଭାରତ ଅଧିନାୟକ ମହେନ୍ଦ୍ର ସିଂ ଧୋନୀଙ୍କଠାରୁ ସେ ପ୍ରେରଣା ଲାଭ କରିଛନ୍ତି।
