ଦୁବାଇ, ୭।୯: ବ୍ୟାଟିଂ, ବୋଲିଂ ଓ ଫିଲ୍ଡିଂରେ ଖରାପ ପ୍ରଦର୍ଶନ କରି ଭାରତ ଏସିଆ କପ୍ କ୍ରିକେଟର ମଙ୍ଗଳବାର ଅନୁଷ୍ଠିତ ସୁପର ଫୋର ମ୍ୟାଚରେ ଶ୍ରୀଲଙ୍କାଠାରୁ ୬ ଉଇକେଟରେ ପରାସ୍ତ ହୋଇଛି। ଏଥିସହ ଭାରତ ଟୁର୍ନାମେଣ୍ଟରୁ ବିଦାୟ ହେବା ପଥରେ ରହିଛି। ପୂର୍ବ ମ୍ୟାଚରେ ପାକିସ୍ତାନଠାରୁ ମଧ୍ୟ ଭାରତ ହାରିଥିଲା। ବୁଧବାର ପାକିସ୍ତାନ ଯଦି ଆଫଗାନିସ୍ତାନକୁ ପରାସ୍ତ କରିବ ତେବେ ଭାରତ ଓ ଆଫଗାନିସ୍ତାନ ଏଲିମିନେଟ ହେବେ। ଏଠାରେ ଭାରତ ୨୦ ଓଭରରେ ୮ ଉଇକେଟ ହରାଇ ୧୭୩ ରନ କରିଥିବାବେଳେ ଶ୍ରୀଲଙ୍କା ୧୯.୫ ଓଭରରେ ୪ ଉଇକେଟ ହରାଇ ବିଜୟ ଲକ୍ଷ୍ୟ ହାସଲ କରି ନେଇଥିଲା। ରନ ଚେଜ୍ ଅବସରରେ ପଥୁମ ନିଶଙ୍କା ଓ କୁଶାଲ ମେଣ୍ଡିସଙ୍କ ୬୭ ବଲ୍ରୁ ୯୭ ରନର ଓପନିଂ ଭାଗୀଦାରି ମ୍ୟାଚର ଟର୍ନିଂ ପଏଣ୍ଟ ଥିଲା। ୧୨ତମ ଓଭରରେ ଯାଇ ଭାରତୀୟ ବୋଲରମାନେ ଶ୍ରୀଲଙ୍କାର ଉଇକେଟ ପତନ ଘଟାଇବାକୁ ସକ୍ଷମ ହୋଇଥିଲେ। ୧୩ ରନ ବ୍ୟବଧାନରେ ଶ୍ରୀଲଙ୍କା ୪ଟି ଉଇକେଟ ହରାଇଥିଲେ ହେଁ ଭାନୁକା ରାଜପାକ୍ସା ଓ ଅଧିନାୟକ ଦଶୁନ ସନକା ଅସମାପ୍ତ ୫ମ ଉଇକେଟରେ ୩୪ ବଲ୍ରୁ ୬୪ ରନ ଯୋଗକରି ଦଳକୁ ବିଜୟୀ କରାଇଥିଲେ। କୁଶାଲ ସର୍ବାଧିକ ୫୭ ଓ ନିଶଙ୍କା ୫୨ ରନକରି ଆଉଟ ହୋଇଥିବାବେଳେ ସନକା ୩୩ ଓ ରାଜପାକ୍ସା ୨୫ ରନରେ ଅପରାଜିତ ରହିଥିଲେ। ଭାରତ ପକ୍ଷରୁ ୟୁଜବେନ୍ଦ୍ର ଚହଲ ସର୍ବାଧିକ ୩ଟି ଉଇକେଟ ନେଇଥିଲେ। ଟସ୍ ହାରି ବ୍ୟାଟିଂ ଆମନ୍ତ୍ରଣ ପାଇଥିବା ଭାରତ ୧୩ ରନରେ ୨ ଉଇକେଟ ହରାଇ ପ୍ରାରମ୍ଭିକ ବ୍ୟାଟିଂ ବିପର୍ଯ୍ୟୟରେ ପଡ଼ିଥିଲା। ଲୋକେଶ ରାହୁଲ ୬ ଓ ବିରାଟ କୋହଲି ଖାତା ଖୋଲିବା ପୂର୍ବରୁ ଆଉଟ ହୋଇଥିଲେ। ରୋହିତ ଓ ସୂର୍ଯ୍ୟକୁମାର ଯାଦବ ତୃତୀୟ ଉଇକେଟରେ ୫୮ ବଲ୍ରୁ ୯୭ ରନର ଭାଗୀଦାରି ଗଢ଼ି ଇନିଂସ ସମ୍ଭାଳିଥିଲେ। ରୋହିତ ୪୧ ବଲ୍ରୁ ୭୨ (୫ ଚୌକା, ୪ ଛକା) ରନ କରିଥିବାବେଳେ ଚାମିକା କରୁଣାରନେତ୍ଙ୍କ ସ୍ଲୋୟର ଶର୍ଟ ବଲ୍କୁ ଅପର କଟ୍ ଖେଳି ଆଉଟ ହୋଇଥିଲେ। ଶଟ୍ରେ ପର୍ଯ୍ୟପ୍ତ ପାଓ୍ବାର ନ ଥିବାରୁ ଡିପ୍ ପଏଣ୍ଟ ଅଞ୍ଚଳରେ ପଥୁମ ନିଶଙ୍କା କ୍ୟାଚ ଧରି ନେଇଥିଲେ। ମିଡିଲ ଅର୍ଡରରେ ସେଟ୍ ବ୍ୟାଟର ସୂର୍ଯ୍ୟକୁମାର ଯାଦବ ୩୪, ହାର୍ଦ୍ଦିକ ପାଣ୍ଡ୍ୟା ୧୭, ରିଷଭ ପନ୍ତ ୧୭ ଓ ଦୀପକ ହୁଦା ମାତ୍ର ୩ ରନ କରି ଆଉଟ ହୋଇଥିଲେ। ଶେଷ ଭାଗରେ ରବିଚନ୍ଦ୍ରନ ଅଶ୍ୱିନ ୭ ବଲ୍ରୁ ୧୫ ରନକରି ଅପରାଜିତ ରହିବାରୁ ଭାରତ ସମ୍ମାନଜନକ ସ୍କୋରରେ ପହଞ୍ଚତ୍ଥିଲା। ଶ୍ରୀଲଙ୍କା ପକ୍ଷରୁ ଦିଲସାନ ମଦୁଶନକା ୩ଟି, ଚାମିକା କରୁଣାରନେତ୍ ଓ ଦସୁନ ସନକା ୨ଟି ଲେଖାଏ ଏବଂ ମହେଶ ଥିକଶାନା ଗୋଟିଏ ଉଇକେଟ ନେଇଥିଲେ।
ସଂକ୍ଷିପ୍ତ ସ୍କୋର
ଭାରତ ୨୦ ଓଭରରେ ୧୭୩/୮ (ରୋହିତ ଶର୍ମା-୭୨, ସୂର୍ଯ୍ୟକୁମାର ଯାଦବ-୩୪, ଦିଲସାନ ମଦୁଶନକା-୩/୨୪, ଚାମିକା କରୁଣାରନେତ୍-୨/୨୭, ଦସୁନ ସନକା-୨/୨୬, ମହେଶ ଥିକଶାନା-୧/୨୯)। ଶ୍ରୀଲଙ୍କା ୧୯.୫ ଓଭରରେ ୧୭୪/୪ (କୁଶାଲ ମେଣ୍ଡିସ-୫୭, ପଥୁମ ନିଶଙ୍କା-୫୨, ଦଶୁନ ସନକା-୩୩*, ଭାନୁକା ରାଜପାକ୍ସା-୨୫*, ୟୁଜବେନ୍ଦ୍ର ଚହଲ-୩/୩୪, ରବିଚନ୍ଦ୍ରନ ଅଶ୍ୱିନ-୧/୩୨)।
