ଲଖନପୁର,୧୨।୪(ଗୌତମ ସାହୁ): ପଡ଼ୋଶୀ ଛତିଶଗଡ଼ରେ ସ୍ଥାପିତ ଅନେକ କଳକାରଖାନା ବିଭିନ୍ନ ଉପାୟରେ ମହାନଦୀକୁ ପ୍ରଦୂଷିତ କରୁଛି। ଏହି ପରିପ୍ରେକ୍ଷୀରେ ଝାରସୁଗୁଡା ଜିଲା ଲଖନପୁର ବ୍ଲକ ସୀମାନ୍ତ ଜିରୋ ପଏଣ୍ଟରେ ସ୍ଥାପିତ ହୋଇଛି ପଡ଼ୋଶୀ ଛତିଶଗଡ଼ ରାଇଗଡ଼ ଜିଲା ଏନ୍ଟିପିସି। ଏନ୍ଟିପିସି ଲରା ୧୬ଶହ ମେଗାୱାଟ ବିଜୁଳି ଉତ୍ପାଦନ ପାଇଁ ପ୍ରାୟ ୬ଟି ବୃହତ କାୟ ଆଶ୍ପଣ୍ଡ ନିର୍ମାଣ କରିଛି। ଯାହାକି ଓଡ଼ିଶା ସୀମା ଜିରୋ ପଏଣ୍ଟରେ ରହିଛି। ଏହି ଆସପଣ୍ଡରୁ ନିର୍ଗତ ପାଉଁଶ ପାଣି ଆସପଣ୍ଡକୁ ଲାଗି ରହିଥିବା ସୁଖାନରା ନାଳ ଦେଇ ପାଖାପାଖି ୫୦୦ମିଟର ଦୂରରେ ଥିବା ସୀମାନ୍ତ ଅଞ୍ଚଳର ଜୀବନ ରେଖା କେଲୋ ନଦୀରେ ଅମାପାଲିସ୍ଥିତ ଗାଧୁଆ ଘାଟ ମୁହାଣରେ ମିଶି କୁସମେଲ ନିକଟର ମହାନଦୀ ମୁହାଣରେ ଓଡ଼ିଶାର ଜୀବନରେଖା ମହାନଦୀରେ ମିଶୁଛି। ଏହି ପ୍ରଦୂଷିତ ଆସ ପାଣି ଉଭୟ କେଲୋ ନଦୀ ଓ ମହାନଦୀରେ ମିଶିବାରୁ ଏହି ନଦୀ ଦ୍ବୟ ସ୍ବଚ୍ଛ ପାଣି ଗୋଳିଆ ହେବା ସାଙ୍ଗକୁ ବିଭିନ୍ନ ପ୍ରଜାତିର ମାଛ ପ୍ରାୟ ବିଲୁପ୍ତ ହେବାକୁ ବସିଲେଣି ବୋଲି ସ୍ଥାନୀୟ ମଷ୍ୟଜୀବୀମାନେ ପ୍ରକାଶ କରିଛନ୍ତି। ପ୍ରକାଶ ଥାଉ କି ପୂର୍ବରୁ ଏହି ଆସପଣ୍ଡ ଭାଙ୍ଗି ଥିବା ନଜିର ରହିଛି। ନଦୀ ନାଳରୁ ବେଶ ଦୂରରେ ଆସପଣ୍ଡ ନିର୍ମାଣ ହେବା ବଦଳରେ କିଭଳି ଭାବେ କେଲୋ ନଦୀରୁ ଅଳ୍ପ ଦୂରରେ ଆସପଣ୍ଡ ନିର୍ମାଣ ହୋଇଛି ବୋଲି ଅଞ୍ଚଳ ବୁଦ୍ଧୀଜୀବୀମାନେ ପ୍ରଶ୍ନ କରିଛନ୍ତି। ଓଡ଼ିଶାର ମାତ୍ରାଧିକ ଜିଲାକୁ ମହାନଦୀ ବିଶୁଦ୍ଧ ପାନୀୟଜଳ ଯୋଗାଇଥିବା ବେଳେ ଉପର ମୁଣ୍ଡରେ ଥିବା ଏହି ବୃହତ ପ୍ରକଳ୍ପ ଯୋଗୁ ଆଗାମୀ ଦିନରେ ଜୀବନରେଖା ମହାନଦୀ ତାର ଅସ୍ତିତ୍ୱ ହରାଇବ ବୋଲି ଶଙ୍କା ଦେଖା ଦେଇଛି। ଜିଲା ସଦର ମହକୁମା ଏହି ସୀମାନ୍ତ ଅଞ୍ଚଳରୁ ଦୂରତା ପ୍ରାୟ ୮୦ କିଲୋମିଟରରୁ ଊର୍ଦ୍ଧ୍ୱ ହୋଇଥିବା ବେଳେ ଏହି ସବୁ ପ୍ରଦୂଷଣ ନିୟନ୍ତ୍ରଣ କରିବା ପାଇଁ ନିଯୁକ୍ତ କର୍ମଚାରୀଙ୍କ ଏଭଳି ସମସ୍ୟା ପ୍ରତି ନଜର ପଡୁ ନ ଥିବା ସାଧାରଣରେ ଚର୍ଚ୍ଚା ହେଉଛି। ଏହି ସମସ୍ୟା ସ୍ଥାୟୀ ସମାଧାନ କରିବା ସହିତ ପ୍ରଦୂଷଣ କରୁଥିବା ସଂସ୍ଥା ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ଅଞ୍ଚଳର ପରିବେଶ ପ୍ରେମମାନେ ଦାବି କରିଛନ୍ତି। ଝାରସୁଗୁଡ଼ା ପ୍ରଦୂଷଣ ବିଭାଗ ଅଧିକାରୀଙ୍କୁ ପଚାରିବାରୁ ପୂର୍ବରୁ ମଧ୍ୟ ଏହା ଉପରେ ଅଭିଯୋଗ ହୋଇଛି। ଆମେ ଏନ୍ଟିପିସି ଲରାକୁ କାରଣ ଦର୍ଶାଅ ନୋଟିସ ଜାରି କରିଥିଲୁ ଓ ପୁଣି ଜାରି କରିବୁ ବୋଲି କହିଛନ୍ତି।
