ଢେଙ୍କାନାଳ ଅଫିସ,୮।୫: ଢେଙ୍କାନାଳ ଜିଲା ପର୍ଯ୍ୟଟନର ବିକାଶ ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ୫୦ କୋଟି ଟଙ୍କା ଅନୁଦାନ ମଞ୍ଜୁର କରିଛନ୍ତି। ଏହାପରେ ଜିଲା ପ୍ରଶାସନ ପକ୍ଷରୁ ଏଥିଲାଗି ତତ୍ପରତା ପ୍ରକାଶ ପାଇଛି। ବିଶେଷକରି କଳାକୃତି ଗ୍ରାମ ସଦେଇବେରେଣୀ-ନବଜୀବନପୁରକୁ ବିଶ୍ୱସ୍ତରୀୟ ପର୍ଯ୍ୟଟନସ୍ଥଳୀରେ ପରିଣତ କରିବା ପାଇଁ ଉଦ୍ୟମ ଆରମ୍ଭ ହୋଇଛି। ଏଠାରେ ଖୁବ୍ଶୀଘ୍ର ଏକ ଓ୍ବାଟରପାର୍କ ନିର୍ମାଣ କରାଯିବ। ଏଥିସହ ପର୍ଯ୍ୟଟକଙ୍କ ପାଇଁ ହର୍ସ ରାଇଡିଂ, ବୋଟିଂ ବ୍ୟବସ୍ଥା କରାଯିବ ବୋଲି ନିଷ୍ପତ୍ତି ହୋଇଛି।
ଢେଙ୍କାନାଳ ସଦର ବ୍ଲକର ପ୍ରସିଦ୍ଧ ପର୍ଯ୍ୟଟନସ୍ଥଳୀ ସପ୍ତଶଯ୍ୟା ନିକଟରେ ରହିଛି ଡୋକ୍ରା ହସ୍ତଶିଳ୍ପୀଙ୍କ ଗଁା ସଦେଇବେରେଣୀ-ନବଜୀବନପୁର। ଡୋକ୍ରା କାରିଗରି ପାଇଁ ପ୍ରସିଦ୍ଧ ଏହି ଗ୍ରାମର ଶିଳ୍ପୀଙ୍କ ଜୀବନଧାରଣ ମାନରେ ଉନ୍ନତି ଆଣିବା ଲାଗି ରାଜ୍ୟ ସରକାର ଉଦ୍ୟମ କରୁଛନ୍ତି। ଏଥିଲାଗି ଜିଲା ପ୍ରଶାସନ ସହାୟତାରେ ଏଠାରେ ୬ କୋଟି ଟଙ୍କା ବ୍ୟୟରେ ବିକଶିତ କରାଯାଇଛି କଳାକୃତି ଗ୍ରାମ। ଏହାକୁ ଅଧିକ ଆକର୍ଷଣୀୟ କରି ପର୍ଯ୍ୟଟନ ଅନୁକୂଳ ବାତାବରଣ ସୃଷ୍ଟି କରିବା ଲାଗି ପ୍ରଶାସନ ପକ୍ଷରୁ ଯୋଜନା ପ୍ରସ୍ତୁତ କରାଯାଇଛି। ଏହି କ୍ରମରେ କଳାକୃତି ଗ୍ରାମରେ ଏକ ଓ୍ବାଟରପାର୍କ ନିର୍ମାଣ କରାଯିବ। ପୁରୀରେ ଥିବା ଓ୍ବାଟରପାର୍କ ଭଳି ଏଠାରେ ସମସ୍ତ ଅତ୍ୟାଧୁନିକ ବ୍ୟବସ୍ଥା ରହିବ। ଗ୍ରୀଷ୍ମ ଅବକାଶ ଏବଂ ପର୍ଯ୍ୟଟନ ଋତୁରେ ସପ୍ତଶଯ୍ୟାକୁ ବୁଲି ଆସୁଥିବା ଯାତ୍ରୀମାନେ ଏଠାକୁ ଆସି ଏହାର ମଜା ନେଇପାରିବେ ବୋଲି ଜିଲାପାଳ ସରୋଜ କୁମାର ସେଠୀ ସୂଚନା ଦେଇଛନ୍ତି। କେବଳ ଏତିକି ନୁହେଁ, ନିକଟ ଭବିଷ୍ୟତରେ ଏଠାରେ ହର୍ସ ରାଇଡିଂ ବ୍ୟବସ୍ଥା କରାଯିବ। ଶିକ୍ଷାନୁଷ୍ଠାନର ଏନ୍ସିସି କ୍ୟାଡେଟ୍, ସେନାରେ ଯୋଗଦେବା ଲାଗି ପ୍ରସ୍ତୁତ ହେଉଥିବା ଆଶାୟୀଙ୍କୁ ଘୋଡ଼ା ଦୌଡ଼ ତାଲିମ ଦିଆଯିବ। ପର୍ଯ୍ୟଟକମାନେ ମଧ୍ୟ ଏହାର ଲାଭ ଉଠାଇପାରିବେ। ଏଥିଲାଗି ଖୁବ୍ଶୀଘ୍ର ଘୋଡ଼ା ଏବଂ ପ୍ରଶିକ୍ଷକ ଆଣିବା ବ୍ୟବସ୍ଥା କରାଯାଉଥିବା ଜଣାପଡ଼ିଛି। କଳାକୃତି ଗ୍ରାମ ପରିସରରେ ବୋଟିଂ ସୁବିଧା ମଧ୍ୟ କରାଯିବାକୁ ବ୍ଲୁପ୍ରିଣ୍ଟ ପ୍ରସ୍ତୁତ କରାଯାଉଛି।
ସୂଚନାଯୋଗ୍ୟ, ୬ କୋଟି ଟଙ୍କା ବ୍ୟୟରେ ନିର୍ମିତ କଳାକୃତି ଗ୍ରାମ ଅବହେଳିତ ଅବସ୍ଥାରେ ପଡ଼ିରହିଥିଲା। ଏହାକୁ ନେଇ ଅସନ୍ତୋଷ ବଢ଼ିବା ପରେ ପ୍ରଶାସନ ଏହାର ପୁନରୁଦ୍ଧାର କାର୍ଯ୍ୟ ହାତକୁ ନେଇଛି। ଏଠାରେ ଡୋକ୍ରା କାରିଗର, ବିଭିନ୍ନ ସ୍ବୟଂ ସହାୟକ ଗୋଷ୍ଠୀ ଦ୍ୱାରା ଉତ୍ପାଦିତ ହସ୍ତଶିଳ୍ପ ପ୍ରଦର୍ଶନ ବ୍ୟବସ୍ଥା କରାଯାଇଛି। ଏଠାରେ ଥିବା ଅତ୍ୟାଧୁନିକ ସମ୍ମିଳନୀ କକ୍ଷରେ ବିଭିନ୍ନ ବିଭାଗର ସରକାରୀ କାର୍ଯ୍ୟକ୍ରମ ଆୟୋଜିତ ହେଉଛି। ଏଭଳି ଅଭିନବ ପଦକ୍ଷେପ ଦ୍ୱାରା କଳାକୃତି ଗ୍ରାମ ପ୍ରତି ପର୍ଯ୍ୟଟକ ଆକୃଷ୍ଟ ହେଉଛନ୍ତି।
