ଭୁବନେଶ୍ୱର,୧।୧୦(ବ୍ୟୁରୋ): ଅବକାରୀ ନିର୍ଦ୍ଦେଶାଳୟ ପକ୍ଷରୁ ଅବକାରୀ ଆଇନ ଏବଂ ବଟଲିଂ ପ୍ଲାଣ୍ଟ ଅପରେଶନ ଉପରେ ଏକ ଦିନିକିଆ କର୍ମଶାଳା ଶୁକ୍ରବାର ଭର୍ଚୁଆଲରେ ଅନୁଷ୍ଠିତ ହୋଇଯାଇଛି। ଏଥିରେ ରାଜ୍ୟର ସମସ୍ତ ଅବକାରୀ ଅଧିକାରୀ ଅଂଶଗ୍ରହଣ କରିଥିଲେ ା କର୍ମଶାଳାକୁ ଉଦ୍ଘାଟନ କରି ଅବକାରୀ କମିଶନର ଆଶିଷ କୁମାର ସିଂହ ସମସ୍ତଙ୍କୁ ସକ୍ରିୟ ଭାବରେ କାର୍ଯ୍ୟ କରିବାକୁ କହିବା ସହ ଚଢାଉ, ଜବତ ଏବଂ ତଦନ୍ତ ସମୟରେ ଆଇନକୁ ଠିକ୍ ଭାବରେ ପାଳନ କରିବାକୁ ପରାମର୍ଶ ଦେଇଥିଲେ। ଏହାସହ ହାଇକୋର୍ଟର ସର୍ବଶେଷ ରାୟ ଆଧାରରେ କାର୍ଯ୍ୟ କରିବାକୁ ସେ ସମସ୍ତ ଅବକାରୀ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି ା ଏଥିସହ ସେ କହିଛନ୍ତି, ଅଭିଯୁକ୍ତଙ୍କ ବେଆଇନ କାରବାର ରୋକିବା ପାଇଁ ନୂତନ ବୈଷୟିକ ଜ୍ଞାନକୌଶଳର ଦକ୍ଷତା ରହିବା ଆବଶ୍ୟକ। ଏଥିସହ ଆଇନକୁ ପାଳନ କରିବା ତଥା କୋର୍ଟରେ ପ୍ରମାଣ ଉପସ୍ଥାପନ ପାଇଁ ସମସ୍ତେ ଗୁରୁତ୍ୱ ଦେବା ଉଚିତ ବୋଲି ସେ କହିଥିଲେ।
ଅବକାରୀ ଡେପୁଟୀ କମିଶନର ରାମଚନ୍ଦ୍ର ମିଶ୍ର ଯୋଗଦେଇ ଅନଲାଇନ୍ ମାଧ୍ୟମରେ ଅବକାରୀ ନିୟମ ଓ ଆଇନର ବିଭିନ୍ନ ଦିଗ ଉପରେ ଆଲୋଚନା କରିଥିଲେ। ଆଇନ୍ ଅନୁଯାୟୀ ଚଢାଉ, ଗିରଫଦାରୀ, ତଦନ୍ତ ଓ ସାକ୍ଷ୍ୟପ୍ରଦାନ ତଥା ମାମଲାର ଏକୀକରଣ ଏବଂ ବାଜ୍ୟାପ୍ତି ଉପରେ ତର୍ଜମା କରିବା ଆବଶ୍ୟକ ବୋଲି ମିଶ୍ର ମତ ରଖିଥିଲେ। ସେହିଭଳି ଡେପୁଟି କମିଶନର ରଜତ କୁମାର ପ୍ରହରାଜ ବଟଲିଂ ପ୍ଲାଣ୍ଟ ପରିଚାଳନା ପ୍ରଣାଳୀ ଉପସ୍ଥାପନ କରିଥିଲେ। ଅତିରିକ୍ତ ଅବକାରୀ କମିଶନର ରାମଚନ୍ଦ୍ର ପାଲଟା, ଯୁଗ୍ମ କମିଶନର ଡକ୍ଟର ଦିବ୍ୟ ଲୋଚନ ମହାନ୍ତି, ଡେପୁଟୀ କମିଶନର ଦଣ୍ଡପାଣି ବେହେରା ଓ ଡମ୍ବରୁଧର ଖଣ୍ଡା କର୍ମଶାଳାରେ ନିଜ ମତ କରିଥିଲେ। ଅବକାରୀ ଅଧିକାରୀମାନେ ବରିଷ୍ଠ ଅଧିକାରୀଙ୍କଠାରୁ ବିଭିନ୍ନ ପ୍ରସଙ୍ଗରେ ପଚାରି ବୁଝିଥିଲେ। ଚଢାଉ, ଜବତ, ଅନୁସନ୍ଧାନ ଏବଂ ପ୍ରମାଣ ଯୋଗାଡ କରିବାର କୌଶଳ ବିଷୟରେ ପ୍ରଶିକ୍ଷଣ ଦିଆଯାଇଥିଲା। କର୍ମଶାଳାରେ ଅବକାରୀ କମିଶନର ସିଂହ ପ୍ରତି ମାସରେ ଏହିପରି ତାଲିମ ଶିବିର ଆୟୋଜନ କରିବା ଉପରେ ଗୁରୁତ୍ୱାରୋପ କରିଥିଲେ। ଆଗାମୀ ଦିନରେ ସମସ୍ତ ଅବକାରୀ ଅଫିସରଙ୍କୁ ତାଲିମ ଦେବା ପାଇଁ ପଦକ୍ଷେପ ନିଆଯାଉଛି ବୋଲି କହିବା ସହିତ ସେମାନଙ୍କର ଦୈନନ୍ଦିନ ଏନ୍ଫୋର୍ସମେଣ୍ଟ କାର୍ଯ୍ୟରେ ଏହା ସହାୟତା କରିବ ବୋଲି କହିଥିଲେ।
