ଭଞ୍ଜନଗର,୧ା୭(ଡି.ଏନ.ଏ)- କୋଭିଡ୍ ପାଇଁ ଔଷଧ ନେବାଆଣିବାରେ ବ୍ୟବହୃତ ଏକ ଟ୍ରକରେ ବେନିୟମ ଭାବେ ଅରଗୁଣା କନ୍ଦା ଚୋରା ଚାଲାଣ ହେଉଥିଲା। ଗଞ୍ଜାମ ଜିଲା ଭଞ୍ଜନଗର ଉତ୍ତର ଘୁମୁସର ବନଖଣ୍ଡ କର୍ମଚାରୀ ସୋମବାର ରାତିରେ ଟ୍ରକଟିକୁ ଜବତ କରିଛନ୍ତି। ସେଥିରୁ ୧୮୦ ବସ୍ତା ଅରଗୁଣା କନ୍ଦା ଜବତ ହୋଇଛି। ଗାଡ଼ି ଚାଳକଙ୍କ ସମେତ ୨ଜଣଙ୍କୁ ଗିରଫ କରାଯାଇଛି। ସେମାନେ ହେଲେ ଚାଳକ ନୟାଗଡ଼ ଜିଲା ଚାଞ୍ଚରାପଲ୍ଲୀର ମୁନା ପ୍ରଧାନ ଓ ନୂଆପଲ୍ଲୀର ଟୁନା ନାଇକ। ଜବତ କନ୍ଦାର ଆନୁମାନିକ ମୁଲ୍ୟ ପ୍ରାୟ ଦେଢ଼ ଲକ୍ଷ ଟଙ୍କା ହେବ। ଉକ୍ତ କନ୍ଦା ମେଡ଼ିସିନ ତିଆରି ପାଇଁ ବ୍ୟବହାର ହୋଇଥାନ୍ତା। ପ୍ରକାଶ ଯେ, ଟ୍ରକ ଚାଳକ ଭୁବନେଶ୍ୱରରୁ କରୋନା ରୋଗୀଙ୍କ ପାଇଁ ଔଷଧ ସହ ଅନ୍ୟାନ୍ୟ ଜିନିଷ ନେଇ ଶନିବାର କୋରାପୁଟ ଯାଇଥିଲେ। ଫେରିବା ବାଟରେ ନୂଆପଲ୍ଲୀରୁ ଅରଗୁଣା କନ୍ଦା ଚାଳକ ଗାଡ଼ିରେ ଭର୍ତ୍ତି କରି ବାଲେଶ୍ୱର ଜିଲା ଜଳେଶ୍ୱର ଅଭିମୁଖେ ବାହାରିଥିଲେ। ରେଞ୍ଜର କୁମର ବେହେରାଙ୍କ ନିର୍ଦ୍ଦେଶରେ ବନ ବିଭାଗ କର୍ମଚାରୀ ରାତିରେ ଗାଡିକୁ ପିଛାକରି ଧରିଥିଲେ।
