ପୁରୁଷୋତ୍ତମପୁର, ୫।୩ (ସବିତା ମିଶ୍ର): ଗଞ୍ଜାମ ଜିଲା ପୁରୁଷୋତ୍ତମପୁର ଥାନା ଅନ୍ତର୍ଗତ ଅରଖପୁର ଗ୍ରାମରେ ଚାଞ୍ଚଲ୍ୟ ଖେଳାଇଥିବା ଗୁଳିକାଣ୍ଡ ଘଟଣାର ରହସ୍ୟ ଉପରୁ ପରଦା ହଟାଇଛି ପୋଲିସ। ଯେଉଁ ଯୁବକ ଜଣକ ଗୁଳିମାଡ଼ର ଶିକାର ହୋଇଥିବା ଅଭିଯୋଗ କରିଥିଲେ, ସେ ନିଜେ ହିଁ ଏହି ସମଗ୍ର କାଣ୍ଡର ମୁଖ୍ୟ ସୂତ୍ରଧର ବୋଲି ଜଣାପଡ଼ିଛି। ପୋଲିସ ଏହି ମାମଲାରେ ଜଣେ ନାବାଳକ ସମେତ ଦୁଇଜଣଙ୍କୁ ଗିରଫ କରିବା ସହ ବ୍ୟବହୃତ ବାଇକ ଜବତ କରିଥିବା ଗୁରୁବାର ଏକ ଖବରଦାତା ସମ୍ମିଳନୀରେ ଏସ୍ଡିପିଓ ସୁଜିତ କୁମାର ନାୟକ କହିଛନ୍ତି।
ଅଭିଯୋଗକାରୀ ସାଗର ବେହେରା ପୋଲିସକୁ କହିଥିଲେ ଯେ, ଶିକୁଳା ରାସ୍ତାର ଶୁଣ୍ଡିବାଙ୍କ ନିକଟରେ ଦୁଇଜଣ ମୁଖାଧାରୀ ଯୁବକ ତାଙ୍କୁ ଗୁଳିମାଡ଼ କରିଛନ୍ତି। ତେବେ ପୁରୁଷୋତ୍ତମପୁର ଏସଡିପିଓ ସୁଜିତ କୁମାର ନାୟକ ଏବଂ ଆଇଆଇସି କୁଳମଣୀ ସେଠୀଙ୍କ ନେତୃତ୍ୱରେ ଗଠିତ ସ୍ବତନ୍ତ୍ର ଟିମ ତଦନ୍ତ କରିବା ପରେ ପ୍ରକୃତ ସତ ସାମ୍ନାକୁ ଆସିଥିଲା।
ସାଗର ବେହେରା ନିଜେ ଏକ ଅପରାଧୀ ଗ୍ୟାଙ୍ଗର ସଦସ୍ୟ ଏବଂ ତାଙ୍କ ନାମରେ ପୂର୍ବରୁ ଅନେକ ମାମଲା ରହିଛି। ବ୍ରହ୍ମପୁର ପୋଲିସ ଜିଲାର ଏକ ସ୍ଥାନରେ କୌଣସି ଅପରାଧ ଘଟାଇବା ପାଇଁ ବନ୍ଧୁକ ସଜାଡୁଥିବା ବେଳେ ହଠାତ ଗୁଳି ଫୁଟି ତାଙ୍କ ଗୋଡ଼ରେ ବାଜିଥିଲା। ନିଜର ଅପରାଧକୁ ଲୁଚାଇବା ଏବଂ ଅନ୍ୟ ଉପରେ ଦୋଷ ଲଦିବା ପାଇଁ ସେ ମୁଖାଧାରୀ ଯୁବକଙ୍କ ଗୁଳିମାଡ଼ର କପୋଳକଳ୍ପିତ କାହାଣୀ ରଚିଥିଲେ।
ପୋଲିସ ଏହି ମାମଲାରେ ସାଗରଙ୍କୁ ସହଯୋଗ କରିଥିବା ଅରଖପୁର ଗ୍ରାମର ରାହୁଲ ପ୍ରଧାନ (୨୩)ଙ୍କୁ ଗିରଫ କରିଛି। ଏଥିସହ ଘଟଣା ସହ ସମ୍ପୃକ୍ତ ନାବାଳକକୁ ସୁଧାର ଗୃହକୁ ପଠାଯାଇଛି। ଚିକିତ୍ସା ପରେ ମୁଖ୍ୟ ଅଭିଯୁକ୍ତ ସାଗରଙ୍କୁ ମଧ୍ୟ ଗିରଫ କରାଯିବ ବୋଲି ଏସ୍ଡିପିଓ ସୂଚନା ଦେଇଛନ୍ତି। ପୂର୍ବରୁ ଗଣମାଧ୍ୟମ (ଧରିତ୍ରୀ) ପକ୍ଷରୁ ଏହି ଘଟଣାକୁ ନେଇ ସନ୍ଦେହ ପ୍ରକାଶ କରାଯାଇଥିଲା। ସ୍ପଷ୍ଟ ଦିବାଲୋକରେ ଏଭଳି ଗୁଳିକାଣ୍ଡ ଘଟିଥିଲେ ହେଁ କିଭଳି କିଏ ଜାଣିପାରିଲେ ନାହିଁ ତାହା ପ୍ରକାଶ ପାଇଥିଲା। ଏବେ ତାହା ବାସ୍ତବ ରୂପ ନେବା ସହ ପ୍ରକୃତ ଘଟଣା ଉପରୁ ପରଦା ଉଠିଛି।
