ଦିଗପହଣ୍ଡି,୨୭ା୮(ଡି.ଏନ୍.ଏ.): ଗଞ୍ଜାମ ଜିଲା ଦିଗପହଣ୍ଡି ବ୍ଲକ ଚୌଧୁରିଟିକରପଡ଼ା ଗଁାରେ ତହସିଲଦାର ଅଦ୍ୱୈତ କୁମାର ସ୍ବାଇଁ ଏବଂ ଏନ୍ଫୋର୍ସମେଣ୍ଟ ସ୍କ୍ବାଡଙ୍କୁ ଆକ୍ରମଣ ଅଭିଯୋଗରେ କେ.ନୂଆଗାଁ ଥାନାରେ ୨୦ରୁ ଉର୍ଦ୍ଧ୍ୱ ଗ୍ରାମବାସୀଙ୍କ ନଁାରେ ହତ୍ୟା ଉଦ୍ୟମ ମାମଲା ରୁଜୁ କରାଯାଇଛି। ଗୁରୁବାର ଅପରାହ୍ନରେ ଚୌଧୁରି ଟିକରପଡ଼ା ପଞ୍ଚାୟତ ସରପଞ୍ଚ ପ୍ରତିନିଧି ପୀତବାସ ଚଣ୍ଡ, ପୂର୍ବତନ ସରପଞ୍ଚ ରଘୁନାଥ ପାତ୍ର, ଗୌଡଗଁା ସରପଞ୍ଚ କୃଷ୍ଣଚନ୍ଦ୍ର ସାହୁ, ତ୍ରିପତି ପାତ୍ରଙ୍କ ଉପସ୍ଥିତିରେ ଗାଁ କମିଟିର ସମସ୍ତ କାର୍ଯ୍ୟକର୍ତ୍ତା ବ୍ରହ୍ମପୁର ଉପଜିଲାପାଳଙ୍କୁ ଭେଟି ଘଟଣାକୁ ଘଟଣାକୁ ନେଇ ଦୁଃଖ ପ୍ରକାଶ କରିବାସହ କ୍ଷମା ଯାଚିକା ପ୍ରଦାନ କରିଛନ୍ତି। ପୂର୍ବାହ୍ନରେ ତହସିଲଦାରଙ୍କୁ ମଧ୍ୟ ସାକ୍ଷାତ କରି ଚିକିଟି ଏସ୍ଡିପିଓ ସୁରେନ୍ଦ୍ରନାଥ ମୁର୍ମୁଙ୍କ ଉପସ୍ଥିତିରେ ଭୂଲ ସ୍ବୀକାର ସହ ଲିଖିତ ଭାବେ କ୍ଷମାଯାଚିକା ପ୍ରଦାନ କରିଥିଲେ।
ସୂଚନା ଯୋଗ୍ୟ, ଶନିବାର ଗ୍ରାମରେ ସାମୂହିକ ଗଣେଶ ପୂଜା ଚାଲିଥିବାବେଳେ ଦୋକାନବଜାର ଖୋଲାଥିଲା। ତହସିଲଦାର ସ୍ବାଇଁ, ଅତିରିକ୍ତ ତହସିଲଦାର କଳାକୃଷ୍ଣ ପ୍ରଧାନ ପୋଲିସ ସହ ପହଞ୍ଚତ୍ ୨ ରାଶନ ଦୋକାନ ସିଲ୍ କରିବାବେଳେ ଗ୍ରାମବାସୀ ପହଞ୍ଚତ୍ ତହସିଲଦାରଙ୍କୁ ଆକ୍ରମଣ କରିଥିଲେ। ତହସିଲଦାରଙ୍କ ଏତଲା କ୍ରମେ କେ. ନୂଆଗଁା ପୋଲିସ ନଂ.୧୭୮/୨୦ ଦଫା – ୧୪୭/୧୪୮/୧୧୪/୨୬୯/୨୭୦/୨୮୩/୨୯୪/୩୦୭/୩୩୨/୩୪୧/୩୫୩/୫୦୬/୧୪୯ ଆଇପିସି, ୩ ପିଡିପିପି ଆକ୍ଟ, କ୍ରିମିନାଲ – ଲ ଆକ୍ଟ ର ଧାରା – ୭ ସମେତ ଏପିଡେମିକ ଡ଼ିଜିଜ ଆକ୍ଟ ଧାରା- ୩ ଅନୁଯାୟୀ ମାମଲା ରୁଜୁ କରିଥିଲା।
