ନାଗାଲାଣ୍ଡ ମନ୍ ଜିଲାର ଟିରୁ ଅଞ୍ଚଳରେ ୪ ଡିସେମ୍ବର ସନ୍ଧ୍ୟାରେ ସେନାର ଅତର୍କିତ ଆକ୍ରମଣରେ ୧୩ ଜଣ ସାଧାରଣ ଲୋକଙ୍କ ପ୍ରାଣହାନି ଘଟିଥିବା ବେଳେ ୧୧ ଜଣ ଆହତ ହୋଇ ଚିକିତ୍ସିତ ହେଉଛନ୍ତି। ଏହି ଘଟଣାର ପ୍ରତିକ୍ରିୟାରେ ସ୍ଥାନୀୟ ଲୋକଙ୍କ ପ୍ରତିଆକ୍ରମଣରେ ଜଣେ ଯବାନଙ୍କ ମୃତ୍ୟୁ ହୋଇଥିବା ଖବର ମିଳିଛି। ବେଆଇନ ଘୋଷିତ ନ୍ୟାଶନାଲିଷ୍ଟ ସୋସିଆଲିଷ୍ଟ କାଉନ୍ସିଲ୍ ଅଫ୍ ନାଗାଲାଣ୍ଡ ବା ଏନଏସ୍ସିଏନ୍ (ଖାପଲଙ୍ଗ୍ ୟୁଙ୍ଗ୍-ଅଙ୍ଗ୍)ର ଉଗ୍ରପନ୍ଥୀମାନେ ସମ୍ପୃକ୍ତ ଅଞ୍ଚଳରେ ଆତଯାତ କରୁଛନ୍ତି ବୋଲି ସେନାକୁ ଗୋଇନ୍ଦା ସୂଚନା ମିଳିଥିଲା। ତଦନୁଯାୟୀ ଯବାନମାନେ କାର୍ଯ୍ୟାନୁଷ୍ଠାନ କରିବା ସକାଶେ ଛପି ରହିଥିଲେ। ସେହି ବାଟ ଦେଇ ଯାଉଥିବା ଗାଡ଼ିରେ ଉଗ୍ରପନ୍ଥୀ ଅଛନ୍ତି ଭାବି ସେନା ପକ୍ଷରୁ ଗୁଳିଚାଳନା କରାଯାଇଥିଲା। ହେଲେ ସେଥିରେ ସ୍ଥାନୀୟ ଏକ କୋଇଲା ଖଣିରୁ କାମ ସାରି ଶ୍ରମିକମାନେ ଘରକୁ ଫେରୁଥିଲେ। ଯବାନଙ୍କ ଆକ୍ରମଣ ଯୋଗୁ ଘଟଣାସ୍ଥଳରେ ୬ ଜଣଙ୍କ ମୃତ୍ୟୁ ଘଟିଥିବା ବେଳେ ପରେ ଆଉ ୭ ଜଣଙ୍କ ପ୍ରାଣହାନି ହୋଇଥିଲା। ପ୍ରାରମ୍ଭିକ ଅବସ୍ଥାରେ ୧୩ ଜଣ ସାଧାରଣ ଲୋକଙ୍କ ମୃତ୍ୟୁ ହୋଇଥିବା ବିଷୟକୁ ସେନା ସ୍ବୀକାର କରି ନ ଥିଲା। ପରେ ଜଣାପଡ଼ିଥିଲା ଯେ ସେନା ଆକ୍ରମଣର ଶିକାର ହୋଇଥିବା ଶ୍ରମିକମାନେ ନିୟମିତ ଖଣିରେ କାମ କରିଥାଆନ୍ତି। ସେମାନେ ସାପ୍ତାହିକ କାର୍ଯ୍ୟ ସାରି ଶନିବାର ଘରକୁ ଫେରନ୍ତି ଓ ରବିବାର ପରିବାର ସହ ରହିବା ପରେ ପୁନଶ୍ଚ ସୋମବାର କାମରେ ଯୋଗ ଦେଇଥାଆନ୍ତି।
ସେନା ଦ୍ୱାରା ଘଟାଯାଇଥିବା ସଂହାର ଯୋଗୁ ଟିରୁ ଅଞ୍ଚଳରେ ଉତ୍ତେଜନା ଲାଗି ରହିଛି। ଇତିମଧ୍ୟରେ ରାଜ୍ୟ ସରକାରଙ୍କ ପକ୍ଷରୁ ଘଟଣାର ତଦନ୍ତ ଲାଗି ସ୍ବତନ୍ତ୍ର ତଦନ୍ତକାରୀ ଦଳ (ଏସ୍ଆଇଟି) ଗଠନ କରାଯାଇଛି। ନାଗାଲାଣ୍ଡ ମୁଖ୍ୟମନ୍ତ୍ରୀ ନିଫ୍ୟୁ ରିଓ ଉକ୍ତ ଘଟଣାକୁ ନିନ୍ଦା କରି ଶାନ୍ତି ବଜାୟ ରଖିବାକୁ ନିବେଦନ କରିଛନ୍ତି। ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହା ସାଧାରଣ ଲୋକଙ୍କ ମୃତ୍ୟୁରେ ଗଭୀର ଶୋକବ୍ୟକ୍ତ କରିବା ସହ ଶୀଘ୍ର ମୃତକଙ୍କ ପରିବାରକୁ ନ୍ୟାୟ ମିଳିବ ବୋଲି ଆଶା କରିଛନ୍ତି। ବାସ୍ତବରେ ମୃତକଙ୍କ ପରିବାର କେବେ ନ୍ୟାୟ ପାଇବେ ସମୟ କହିବ। ତେବେ ଏଠାରେ ଏସ୍ଆଇଟି କେଉଁ ବିଷୟ ତଦାରଖ ବା ତନାଘନା କରିବ କହିବା କଷ୍ଟକର। ଆଜିର ପରିସ୍ଥିତିରେ ଭାରତୀୟ ସେନାର କୌଣସି ଦୋଷ ଦୁର୍ବଳତାକୁ ଦର୍ଶାଇଲେ ତାହା ଦେଶ ବିରୋଧୀ କାର୍ଯ୍ୟର ଆଖ୍ୟା ଦିଆଯାଉଛି। ଓଡ଼ିଶାବାସୀଙ୍କ ପାଇଁ ସେନାର ବିଭିନ୍ନ ତ୍ରୁଟିପୂର୍ଣ୍ଣ କାର୍ଯ୍ୟ ବୁଝିବା କଷ୍ଟକର ନୁହେଁ। ତାହାର ଝଲକ ଏହି ରାଜ୍ୟର ବିଭିନ୍ନ ଜିଲାରେ ସୀମା ସୁରକ୍ଷା ବଳ (ବିଏସ୍ଏଫ୍) ଓ କେନ୍ଦ୍ରୀୟ ରିଜର୍ଭ ପୋଲିସ ବଳ (ସିଆର୍ପିଏଫ୍) ଦ୍ୱାରା କରାଯାଇଥିବା ଭୁଲ୍ କାର୍ଯ୍ୟରୁ ବାରି ହୋଇପଡ଼େ। ଏଥିସହିତ ସେନା ଯବାନମାନଙ୍କ ପ୍ରତି ଯେଉଁଭଳି ବ୍ୟବହାର ସରକାରଙ୍କ ଦ୍ୱାରା ପ୍ରଦର୍ଶନ କରାଯାଏ ଏବଂ ତାଙ୍କ କାର୍ଯ୍ୟରେ ଯେତିକି ଦୁଶ୍ଚିନ୍ତା ରହିଥାଏ, ସେଥିଯୋଗୁ ସେମାନେ ଅତ୍ୟନ୍ତ ବିଚଳିତ ରହିବା ସ୍ବାଭାବିକ। ବ୍ୟତିବ୍ୟସ୍ତ ମଣିଷ ଅନେକ ଭୁଲ୍ ଘଟାଇବା ସହଜ ହୋଇଥାଏ।
ଟିରୁ ଘଟଣାକୁ ଦେଖିଲେ ସେନା ପକ୍ଷରୁ କୁହାଯାଇଛି ଯେ, ଯେଉଁଠାରେ ଯବାନମାନେ ସମ୍ପୃକ୍ତ ଗାଡ଼ି ଉପରେ ଆକ୍ରମଣ କଲେ ସେଥିରେ ଉଗ୍ରପନ୍ଥୀ ଥିବା ବିଶ୍ୱାସଯୋଗ୍ୟ ଥିଲା। କାରଣ ବିଶ୍ୱସ୍ତ ସୂତ୍ରରୁ ଗୋଇନ୍ଦା ସୂଚନା ମିଳିଥିଲା। ଏହି ଘଟଣାରୁ ଭାରତୀୟ ସେନାର ଗୋଇନ୍ଦା ବ୍ୟବସ୍ଥା କେତେ ଶକ୍ତିଶାଳୀ ତାହା ଅନୁମାନ କରିହେଉଛି। ଦେଶ ଭିତରେ ଉଗ୍ରପନ୍ଥୀଙ୍କ ଗତିବିଧି ବିଷୟରେ ଅଜ୍ଞ ରହିଯାଉଥିବା ସେନା ସୀମାପାର ଆତଙ୍କବାଦ ଓ ଅନ୍ୟ ରାଷ୍ଟ୍ର ସହ ଅପ୍ରୀତିକର ସ୍ଥିତି ସୃଷ୍ଟି ହେଲେ ତାହାର ମୁକାବିଲା କିଭଳି କରିପାରିବ ପ୍ରଶ୍ନ ସୃଷ୍ଟି ହେବା ସ୍ବାଭାବିକ।
