ମୁମ୍ବାଇ: ବଲିଉଡ୍ ଅଭିନେତ୍ରୀ ଅନୁଷ୍କା ଶର୍ମା ଝିଅ ହେବା ପରେ ପୁଣିଥରେ ଚର୍ଚ୍ଚାରେ ଅଛନ୍ତି। ଏଥର ଅନୁଷ୍କା କୌଣସି ଫଟୋ, ଭିଡିଓ କିମ୍ବା ଫିଲ୍ମ ପାଇଁ ନୁହେଁ ବରଂ ସ୍ବଚ୍ଛ ଭାରତ ଅଭିଯାନରେ ଭାଗ ନେଇ ସେ ଚର୍ଚ୍ଚାରେ ଅଛନ୍ତି। ଅନୁଷ୍କା ତାଙ୍କ ଫିଲ୍ମ ସେଟରେ ବର୍ଜ୍ୟବସ୍ତୁ ପରିଚାଳନା ପାଇଁ ପଦକ୍ଷେପ ନେଇଛନ୍ତି। ଅନୁଷ୍କା କହିଛନ୍ତି ଯେ ପରିବେଶକୁ ବଞ୍ଚାଇବା ଆଜିର ସମୟରେ ସବୁଠାରୁ ବଡ ଆବଶ୍ୟକତା। ଫିଲ୍ମ ଶିଳ୍ପ ଏହି ଦିଗରେ ସହଯୋଗ କରିପାରିବ। ସଚେତନତା ପ୍ରସାର ପାଇଁ ଫିଲ୍ମ ଆଗେଇ ଆସିବା ଉଚିତ୍ ବୋଲି ସେ କହିଛନ୍ତି। ଅନୁଷ୍କା ଶର୍ମା ସବୁବେଳେ କିଛି ନୂଆ କରିବାକୁ ପ୍ରସ୍ତୁତ ଥାନ୍ତି। ‘କ୍ଲିନ ସ୍ଲେଟ ଫିଲ୍ମସ’ ପ୍ରଡକ୍ସନ ହାଉସରେ ଅନୁଷ୍କାଙ୍କ ଭାଇ ତଥା ସହଯୋଗୀ କର୍ଣ୍ଣେଶ ଶର୍ମା ଏହା ମଧ୍ୟ କହିଛନ୍ତି ଯେ ‘ମୁଁ ଏବଂ ଅନୁଷ୍କା’ କ୍ଲିନ ସ୍ଲେଟ ଫିଲ୍ମ’ ଆରମ୍ଭ କରିଛୁ। ଆମେ ଅନେକ କ୍ଷେତ୍ରରେ ପରିବର୍ତ୍ତନ ଆଣିବାକୁ ଚାହୁଁଛୁ। ଏଥିରେ ଏକ ପ୍ରମୁଖ ପଦକ୍ଷେପ ହେଉଛି ବର୍ଜ୍ୟବସ୍ତୁ ପରିଚାଳନା। ବର୍ଜ୍ୟବସ୍ତୁ ଯୋଗୁ ପ୍ରଦୂଷଣ ବୃଦ୍ଧି ପାଉଛି। ଆମେ ଫିଲ୍ମ ସେଟରେ ଜମା ହୋଇଥିବା ବର୍ଜ୍ୟବସ୍ତୁକୁ କେମିତି ହ୍ରାସ କରିପାରିବା ସେ ଦିଗରେ କାର୍ଯ୍ୟ କରିବୁ ବୋଲି ସେ କହିଛନ୍ତି।
ପ୍ରସବ ପରେ ଅନୁଷ୍କା ଶର୍ମା ଆଜିକାଲି ତାଙ୍କ ଝିଅ ଭାମିକା ସହିତ ସମୟ ବିତାଉଛନ୍ତି। ନିକଟରେ ଇନଷ୍ଟାଗ୍ରାମରେ ଝିଅ ଏବଂ ସ୍ବାମୀ ବିରାଟ କୋହଲିଙ୍କ ସହ ସେ ଏକ ଫଟୋ ଶେୟାର କରିଥିଲେ।
