ପାଟଣା,୪।୬(ବୀରକିଶୋର ଦାଶ): କେନ୍ଦୁଝର ଜିଲା ପାଟଣା ବ୍ଲକରେ ହେବାକୁ ଥିବା ପ୍ରସ୍ତାବିତ ଷ୍ଟିଲ ପ୍ଲାଣ୍ଟକୁ ବିରୋଧ କରି ଯମୁନାପଶି ଓ ଚେମେଣା ପଞ୍ଚାୟତର ୧୮ଟି ଗ୍ରାମରେ ବୁଧବାର ଜିନ୍ଦଲ ପ୍ରତିରୋଧ ମଞ୍ଚ ପକ୍ଷରୁ ବିଶାଳ ବାଇକ ରାଲି ସହ ପ୍ରତିବାଦ ସଭା ଅନୁଷ୍ଠିତ ହୋଇଯାଇଛି। ଚିଲିଦା ମନ୍ଦିର ପଡ଼ିଆରେ ଆୟୋଜିତ ପ୍ରତିବାଦ ସଭାରେ ମଞ୍ଚ ସଭାପତି ଘନ ଶ୍ୟାମ ମହାନ୍ତ ପାଟଣା ବିଧାୟକ ଅଖିଳ ଚନ୍ଦ୍ର ନାଏକଙ୍କ କୁଶ ପୁତ୍ତଳିକା ଦାହ କରିଥିଲେ।
ସୂଚନାଯୋଗ୍ୟ, ମେ ୨୪ ତାରିଖରେ ପାଟଣା ବିଧାୟକ ଅଖିଳ ଚନ୍ଦ୍ର ନାଏକ କିଆପଡା ଏବଂ ତୁରୁମୁଙ୍ଗା ଜେପି କଲ୍ୟାଣ ମଣ୍ଡପଠାରେ ଆହୁତ ସଭାରେ ଜିନ୍ଦଲ କମ୍ପାନୀ (ପ୍ଲାଣ୍ଟ)ସପକ୍ଷ ବାଦି ଏକ କମିଟି ଗଠନର ଆହ୍ବାନ ଦେଇଥିଲେ। ଏହାକୁ ମଞ୍ଚ ବିରୋଧ କରି ଯମୁନାପଶିଠାରୁ ୫ଶହରୁ ଊଦ୍ଧର୍ବ ପୁରୁଷ ବିଶାଳ ବାଇକ ରାଲି କରି ୧୮ ଗ୍ରାମ ପରିକ୍ରମା କରି ଚିଲିଦା ମନ୍ଦିର ପଡିଆରେ ପହଁଚିଥିଲେ। ସେଠାରେ ଶତାଧିକ ପୁରୁଷ ଓ ମହିଳା ପ୍ରତିବାଦ ସଭା କରିଥିଲେ।ଏହି ପ୍ରତିରୋଧ ସଭାରେ ମଞ୍ଚର ସମ୍ପାଦକ ବେଣୁଧର ସର୍ଦ୍ଦାର, ଉପସଭାପତି ସରୋଜ ସିଂ, ପ୍ରକାଶ ମଲ୍ଲିକ, ରବୀନ୍ଦ୍ର କୁମାର ମହାନ୍ତ ସେମାନଙ୍କ ବକ୍ତବ୍ୟରେ କହିଥିଲେ ଯେ, ଗତ୨୦୦୬ ରୁ ୨୦୧୩ ପର୍ଯ୍ୟନ୍ତ ଆର୍ସେଲର ମିତ୍ତଲ କମ୍ପାନୀ ବିରୁଦ୍ଧରେ ଲଢ଼େଇ ହୋଇଥିଲା। ଶେଷରେ କମ୍ପାନୀ ଏଠାରୁ ଛାଡ଼ି ଚାଲି ଯିବାକୁ ବାଧ୍ୟ ହୋଇଥିଲା l ରାଜ୍ୟରେ ଭାଜପା ଦଳ ସରକାରକୁ ଆସିବା ପରେ ଉକ୍ତ ଅଂଚଳର ମୂଲ୍ୟବାନ ଜମିକୁ ଜେଏସ୍ଡବ୍ଲୁ ଓ ପୋସ୍କୋ କମ୍ପାନୀକୁ ଟେକି ଦେବାକୁ ଏମ୍ଓୟୁ କରିଛନ୍ତି । ପୁରୁଷ ପୁରୁଷ ଧରି ଭୋଗ ଦଖଲ କରୁଥିବା ଚାଷପଯୋଗୀ ଉନ୍ନତ କିସମ ଓ ବାସପଯୋଗୀ ଜମିକୁ ଦଖଲଦାରଙ୍କ ନାମରେ ପଟ୍ଟା ଦେବା ପରିବର୍ତ୍ତେ କିସମ ପରିବର୍ତ୍ତନ କରି କମ୍ପାନୀକୁ କିଭଳି ସରକାର ଟେକି ଦେବେ ବକ୍ତାମାନେ ସେ ନେଇ ପ୍ରଶ୍ନ କରିଥିଲେ। ଏହି ଅଞ୍ଚଳର କେତେକ ଚାଷ ଜମି କାଂଝାରି ଡ୍ୟାମ ଦାରା ଜଳସେଚିତ ହେଉଥିବା ବେଳେ କେତେକ ଜମି ବୈତରଣୀ ନଦୀ ଦାରା ଜଳସେଚିତ ହୁଏ l କିଛି ଜମି ନାକି ନାଳ ଓ ନେଉଳି ଯୋଡି ନାଳ ଦାରା ଚାଷକାର୍ଯ୍ୟ ହୁଏ l ଏତଦ ବ୍ୟତୀତ ଏହି ଅଂଚଳରେ ବ୍ୟକ୍ତିଗତ ଉଠା ଜଳସେଚନର ସୁବିଧା ରହିଛି l କୌଣସି ପରିସ୍ଥିତିରେ ପୂର୍ବରୁ ଜଳସେଚିତ ଚାଷଜମିକୁ କମ୍ପାନୀକୁ ହସ୍ତାନ୍ତର କରାଇ ନଦେବାକୁ ବକ୍ତାମାନେ ଦୃଢ଼ୋକ୍ତି ପ୍ରକାଶ କରିଥିଲେ। ଜିନ୍ଦଲ ଓ ପୋସ୍କୋ କମ୍ପାନୀ ପକ୍ଷରୁ ରାଜ୍ୟ ସରକାରଙ୍କ ସହ ହୋଇଥିବା ଏମଓୟୁ ବାତିଲ ସହ ହେବାକୁ ଥିବା ଷ୍ଟିଲ ପ୍ଲାଣ୍ଟକୁ ବିରୋଧ କରିଛି ମଞ୍ଚ। ମଞ୍ଚ ପକ୍ଷରୁ ବାଇକ ରାଲି କରାଯିବା ସହ ପ୍ରତିବାଦ ସଭା କରି ଚାଷ ଜମିରେ ଶିଳ୍ପ ପ୍ରତିଷ୍ଠା ବନ୍ଦ କର , ଜିନ୍ଦଲ ପୋସ୍କୋ ସହ ହୋଇଥିବା ଏମଓୟୁ ବାତିଲ କର, ମରିବୁ ପଛେ ଭିଟା ମାଡି ଛାଡିବୁ ନାହିଁ ଆଦି ସ୍ଲୋଗାନ ଦେଇ ରାଲି କରିଥିଲେ।
