ଅଲ୍ମାଟି (କାଜାଖସ୍ତାନ),୧୧ା୪(ପି.ଟି.)-ଏଠାରେ ଚାଲିଥିବା ଏସିଆନ ଅଲିମ୍ପିକ କ୍ୱାଲିଫାୟର୍ସରେ ପ୍ରଭାବୀ ପ୍ରଦର୍ଶନ ସହ ଭାରତର ଯୁବ ରେସ୍ଲର ଅଂଶୁ ମଲିକ ଓ ସୋନମ ମଲିକ ଟୋକିଓ ଗେମ୍ସ ପାଇଁ ଯୋଗ୍ୟତା ଅର୍ଜନ କରିଛନ୍ତି। ୧୯ ବର୍ଷୀୟା ଅଂଶୁ ଓ ୧୮ ବର୍ଷୀୟା ସୋନମ ଜୁନିୟରରୁ ଯାଇ ସିନିୟର ବିଭାଗରେ ଭାଗ ନେଇଥିଲେ। ଦୁହେଁ ପୂର୍ବରୁ ଯୋଗ୍ୟତା ହାସଲ କରିସାରିଥିବା ଭିନେଶ ଫୋଗତ (୫୩କେଜି) ସହ ଯୋଗ ଦେଇଛନ୍ତି। ଫଳରେ ଭାରତର ବର୍ତ୍ତମାନ ୩ଜଣ ରେସ୍ଲର ଅଲିମ୍ପିକ୍ସରେ ଭାଗନେବେ। ଭିନେଶ ପୂର୍ବରୁ ୨୦୧୯ ବିଶ୍ୱଚାମ୍ପିୟନଶିପ୍ ଜରିଆରେ ଯୋଗ୍ୟତା ଅର୍ଜନ କରିଥିଲେ। ଆସନ୍ତା ଟୋକିଓ ଗେମ୍ସ ପାଇଁ ପୁରୁଷ ବିଭାଗରେ ବଜରଙ୍ଗ ପୁନିଆ (୬୫କେଜି), ରବି ଡାହିୟା (୫୭କେଜି) ଏବଂ ଦୀପକ ପୁନିଆ (୮୬କେଜି) ପ୍ରମୁଖ ଫ୍ରିଷ୍ଟାଇଲରେ ଯୋଗ୍ୟତା ଅର୍ଜନ କରିଛନ୍ତି। ପ୍ରତିଯୋଗିତାରେ ଅଂଶୁ ୫୭କେଜି ଶ୍ରେଣୀରେ ପ୍ରାଧାନ୍ୟ ବିସ୍ତାର କରିଥିଲେ। ସେହିପରି ସୋନମ ପ୍ରଭାବୀ ପ୍ରଦର୍ଶନ ସହ ଅଲିମ୍ପିକ କୋଟା ହାସଲ କରି ରିଓ ଅଲିମ୍ପିକ ପଦକ ବିଜୟିନୀ ସାଖୀ ମଲିକଙ୍କ ପଥରୋଧ କରିଛନ୍ତି। ସୋନମ ନିକଟରେ ଟ୍ରାଏଲ୍ରେ ସାଖୀ ମଲିକଙ୍କୁ ୪ଥର ପରାସ୍ତ କରିବା ପରେ ୬୨କେଜି ଶ୍ରେଣୀ କାଟେଗୋରିରେ ନିଜକୁ ସାମିଲ କରିଥିଲେ। ଅଂଶୁ ତାଙ୍କ ଫାଇନାଲ ପଥରେ ମାତ୍ର ୨ ପଏଣ୍ଟ ବରଣ କରିଥିଲେ। ସେ ପ୍ରଥମେ କୋରିଆର ଜିଉନ୍ ଉମ୍ ପରେ କାଜାଖସ୍ତାନ ରେସଲର ଇମା ତିସିନା ଏବଂ ସେମିଫାଇନାଲରେ ଉଜବେକିସ୍ତାନର ଶୋଖିଡା ଅଖମେଦୋଭାଙ୍କୁ ସହଜରେ ପରାସ୍ତ କରିଥିଲେ। ଅନ୍ୟପକ୍ଷରେ ସୋନମ ତାଇପେର ହିନ୍ ପିଙ୍ଗ୍ ପାଇଙ୍କୁ ପରାସ୍ତ କରିବା ପୂର୍ବରୁ ଚାଇନାର ଜିଆ ଲଙ୍ଗ୍ଙ୍କ ବିପକ୍ଷରେ ୫-୨ରେ ବିଜୟ ହାସଲ କରିଥିଲେ।
