ଫୁଲବାଣୀ ଅଫିସ, ୮ା୭-କନ୍ଧମାଳ ଜିଲା ତୁମୁଡିବନ୍ଧ ବ୍ଲକ ସିର୍ଲା ପଞ୍ଚାୟତ କିହାଲଗୁଡ଼ା ଜଙ୍ଗଲ କ୍ଲାଉଡଙ୍ଗା ଅଞ୍ଚଳରେ ଗତ ଶନିବାର ବିଳମ୍ବିତ ରାତିରେ ପୋଲିସ ଗୁଳିରେ ୪ ମାଓବାଦୀ ନିହତ ହୋଇଥିଲେ। ଏହି ଘଟଣା ପରେ ମାଓବାଦୀମାନେ ପ୍ରତିହିଂସା ପରାୟଣ ହୋଇପଡ଼ିଛନ୍ତି। ସେମାନେ ପୋଲିସକୁ ଚକ୍ମା ଦେଖାଇ ହିଂସା ଘଟାଇବାକୁ ଉଦ୍ୟମ କରୁଥିବା ବେଳେ ସୋମବାର ସନ୍ଧ୍ୟାରେ ପୁଣି ଗୁଳି ବିନିମୟ ହୋଇଛି। ଏଥିରେ ଆଉ ଜଣେ ମାଓବାଦୀଙ୍କ ମୃତ୍ୟୁ ଘଟିଛି। ତାଙ୍କ ନିକଟରୁ ଦୁଇଟି ଦେଶୀ ବନ୍ଧୁକ ଏବଂ ଅନ୍ୟାନ୍ୟ ମାଓବାଦୀ ସାମଗ୍ରୀ ଜବତ ହୋଇଛି ା ସିର୍ଲା ଜଙ୍ଗଲରେ କୋମ୍ବିଂ ବେଳେ ୩ ଦିନରେ ୨ ମହିଳାଙ୍କ ସମେତ ୫ ମାଓବାଦୀ ନିହତ ହୋଇଛନ୍ତି। ସେମାନଙ୍କ ମଧ୍ୟରୁ ୩ ଜଣଙ୍କୁ ଚିହ୍ନଟ କରାଯାଇଛି। ଚିହ୍ନଟଙ୍କ ମଧ୍ୟରେ ଅଛନ୍ତି ମାଲକାନଗିରିର ଷ୍ଟେଟ କ୍ୟାଡର ଶୁକ୍ରୁ ଓରଫ କୋଶାସୋଡି, ଛତିଶଗଡର ଏରିଆ କମିଟି ମେମ୍ବର ଇତେଶ ଏବଂ ରୀନା ା ରବିବାର ଭୋର୍ରେ ଏମାନଙ୍କ ମୃତଦେହ ମିଳିଥିଲା। ଶୁକ୍ରୁଙ୍କ ନାମରେ ୨୦ ଲକ୍ଷ ଟଙ୍କାର ପୁରସ୍କାର ରାଶି ଘୋଷଣା କରାଯାଇଥିଲା ା ଇତେଶ ଏବଂ ରୀନାଙ୍କ ନାମରେ ୪ ଲକ୍ଷ ଲେଖାଏ ଟଙ୍କା ପୁରସ୍କାର ରାଶି ଘୋଷଣା ହୋଇଥିଲା। କନ୍ଧମାଳ ଏସ୍ପି ପ୍ରତୀକ ଗୀତା ସିଂ ମଙ୍ଗଳବାର ଜିଲା ପୋଲିସ ରିଜର୍ଭ କାର୍ଯ୍ୟାଳୟରେ ଅନୁଷ୍ଠିତ ଖବରଦାତା ସମ୍ମିଳନୀରେ ଏହି ସୂଚନା ଦେଇଛନ୍ତି। ଏସ୍ପି ସିଂ ଆହୁରି କହିଛନ୍ତି, ୪ ମାଓବାଦୀଙ୍କ ନିହତ ହେବା ପରେ ଛତ୍ରଭଙ୍ଗ ଦେଇଥିବା ଅନ୍ୟ ମାଓବାଦୀମାନେ ପ୍ରତିହିଂସା ପରାୟଣ ହୋଇ ନିକଟସ୍ଥ ଗ୍ରାମକୁଯାଇ ଲୋକଙ୍କୁ ଧମକାଇଥିଲେ ା ପୋଲିସକୁ କିଏ ସୂଚନା ଦେଇଛ ବୋଲି କହିବା ସହ ପୋଲିସକୁ ମାରିବା ପାଇଁ ଯୋଜନା କରିଥିଲେ ା ଏ ସମ୍ପର୍କରେ ସୂଚନା ମିଳିବା ପରେ ଏସ୍ଓଜି ଏବଂ ଡିଭିଏଫ (ଡିଷ୍ଟ୍ରିକ୍ଟ ଭଲ୍ୟୁଣ୍ଟାରି ଫୋର୍ସ) କୋମ୍ବିଂ ଜୋରଦାର କରିଥିଲେ। ଜଙ୍ଗଲ ମଧ୍ୟରେ ମାଓବାଦୀମାନେ ପ୍ରଥମେ ଗୁଳି ଚଳାଇଥିଲେ। ସେମାନଙ୍କୁ ଆତ୍ମସମର୍ପଣ କରିବାକୁ କୁହାଯାଇଥିଲା। ହେଲେ ସେମାନେ ନ ମାନି ଗୁଳିଚାଳନା ଜାରି ରଖିଥିଲେ। ଯବାନମାନେ ସଜାଗ ହୋଇ ପାଲଟା ଜବାବ ଦେଇଥିଲେ। ଗୁଳି ବନ୍ଦ ହେବା ପରେ ସର୍ଚ୍ଚ ଅପରେଶନ ବେଳେ ଆଉ ଜଣେ ମାଓବାଦୀଙ୍କ ମୃତଦେହ ମିଳିଥିଲା ା ମାଓବାଦୀମାନେ ବଡ଼ ଧରଣର ହିଂସା ପାଇଁ ଯୋଜନା କରୁଥିବା ଅନୁମାନ କରାଯାଉଛି। ଘଟଣାସ୍ଥଳରେ ଷ୍ଟେଟ କ୍ୟାଡର ନିଖିଲ ଏବଂ ଇନ୍ଦୁ ଥିବା ଜଣାପଡିଛି ା କେକେବିଏନ୍ ଏବଂ ବିଜିଏନ୍ର ସଦସ୍ୟ କାର୍ଯ୍ୟକ୍ରମ ଜାରି ରଖିଥିବା ସୂଚନା ମିଳିଛି ା ସେମାନେ କାହିଁକି ଏକାଠି ହୋଇଥିଲେ ତାହାର ତଦନ୍ତ ଚାଲିଥିବା ଏସ୍ପି କହିଛନ୍ତି। ମାଓବାଦୀମାନେ ସରକାରଙ୍କ ନିୟମ ଅନୁସାରେ ଆତ୍ମସମର୍ପଣ କରି ସୁବିଧା ନେବାକୁ ଏସ୍ପି ନିବେଦନ କରିଛନ୍ତି।
