ଜଗତ୍ସିଂହପୁର ଅଫିସ,୨।୩: ତ୍ରିସ୍ତରୀୟ ପଞ୍ଚାୟତ ନିର୍ବାଚନ ପରେ ଏବେ ପୌର ନିର୍ବାଚନ ନେଇ ବିଜେଡି, କଂଗ୍ରେସ ଓ ଭାଜପା ପକ୍ଷରୁ ପ୍ରାର୍ଥୀ ଚୟନକୁ ନେଇ ପ୍ରକ୍ରିୟା ଜୋରଦାର କରାଯାଇଛି। ଯେହେତୁ ପୌରାଧ୍ୟକ୍ଷ ପଦବୀ ପାଇଁ ସିଧାସଳଖ ନିର୍ବାଚନ ହେଉଛି, ତେଣୁ କାହାକୁ ପ୍ରାର୍ଥୀ କଲେ ଅଧିକ ବିଜୟ ସମ୍ଭାବନା ରହିଛି ତାକୁ ନେଇ ଆଲୋଚନା, ବିଚାର ବିମର୍ଷ ଚାଲିଛି। ଜଗତ୍ସିଂହପୁର ପୌରାଧ୍ୟକ୍ଷା ପଦବୀ ସାଧାରଣବର୍ଗ ମହିଳାଙ୍କ ପାଇଁ ସଂରକ୍ଷିତ ରହିଛି ।
ପ୍ରାର୍ଥୀପତ୍ର ଦାଖଲ ନେଇ ସମୟ ପାଖେଇ ଆସୁଥିବାରୁ ଜଗତ୍ସିଂହପୁର ପୌରାଧ୍ୟକ୍ଷା ପଦବୀ ପାଇଁ କଂଗ୍ରେସ ପକ୍ଷରୁ ପ୍ରଥମେ ନାମ ଘୋଷଣା କରାଯାଇଛି। ଦଳର ଆଗଧାଡିଆ ନେତା ଦିଲୀପ ସିଂହ (ଅମ୍ବୁଆ)ଙ୍କ ସ୍ତ୍ରୀ ଅର୍ଚ୍ଚନାଙ୍କୁ ସର୍ବସମ୍ମତିକ୍ରମେ ଦଳୀୟ ପ୍ରାର୍ଥୀ କରାଯିବାକୁ ନିଷ୍ପତ୍ତି ନିଆଯାଇଛି। ଏ ପରିସ୍ଥିତିରେ ବିଜେଡି ଓ ଭାଜପା ପକ୍ଷରୁ କେଉଁମାନଙ୍କୁ ଏବଂ କେବେ ପ୍ରାର୍ଥୀ ଘୋଷଣା କରାଯିବ ତାକୁ ନେଇ ଚର୍ଚ୍ଚା ଚାଲିଛି।
ପୌର ନିର୍ବାଚନରେ ପ୍ରାର୍ଥୀ ଚୟନକୁ ନେଇ ସୋମବାର ସ୍ଥାନୀୟ ସିପିସ୍ଥିତ କଂଗ୍ରେସର ଜନସମ୍ପର୍କ କାର୍ଯ୍ୟାଳୟରେ ବୈଠକ ହୋଇଥିଲା। ଏଥିରେ ପୂର୍ବତନ ଜଗତ୍ସିଂହପୁର ବିଧାୟକ ତଥା ପ୍ରଦେଶ କଂଗ୍ରେସ କମିଟି ଉପସଭାପତି ଚିରଞ୍ଜୀବୀ ବିଶ୍ୱାଳଙ୍କ ଉପସ୍ଥିତିରେ ଦଳୀୟ ସ୍ଥିତିର ସମୀକ୍ଷା କରାଯାଇଥିଲା। ବୈଠକରେ ଜିଲା କଂଗ୍ରେସ ସଭାପତି ନଟବର ବାରିକ, ପୂର୍ବତନ ଜଗତ୍ସିଂହପୁର ପୌରାଧ୍ୟକ୍ଷ ବିପ୍ଳବ ଚୌଧୁରୀ, ପୂର୍ବତନ ଜିଲା କଂଗ୍ରେସ ସଭାପତି ରବୀନ୍ଦ୍ରନାଥ ମହାନ୍ତି, ଜଗତ୍ସିଂହପୁର ନଗର କଂଗ୍ରେସ ସଭାପତି ଅଭୟ ମହାନ୍ତି, ପୂର୍ବତନ ପାରିଷଦ ଦିଲୀପ ସିଂହ, ସୁବାସ ସାହୁ, ପ୍ରଶାନ୍ତ କୁମାରର ମଲ୍ଲିକ, ପ୍ରଦୀପ୍ତ ସାହୁ, ମିନୁ ଚୌଧୁରୀ, ରିତାଞ୍ଜଳୀ ଦାସ, ସୁମିତ୍ରା ବିଶ୍ୱାଳ, ନିକୁଞ୍ଜ କିଶୋର ବେହେରା, ରବି ଦାସ, ସଞ୍ଜୀବ ସ୍ବାଇଁ, ନିରଞ୍ଜନ ମହାପାତ୍ର, ପ୍ରମୋଦ କୁମାର ମହାପାତ୍ର, ବିଷ୍ଣୁ ଚରଣ ବେହେରା, ଜଗଦାନନ୍ଦ ବେହେରା, ଗଗନ ବିଶ୍ୱାଳ, ସୂର୍ଯ୍ୟକାନ୍ତ ସାହୁ, ଅନିଲ ଦାସ, ରାକେଶ ରାଉତ, ଆଶିଷ ଗୋଛାୟତ, ଚିତ୍ତରଞ୍ଜନ ମାଣିଆ, ଲିପୁ ମାଣିଆ, ମୁନା ଖଁା, ଦାଶରଥି ସ୍ବାଇଁ ପ୍ରମୁଖ ଉପସ୍ଥିତ ଥିଲେ। ଶେଷରେ ଅଧ୍ୟକ୍ଷ ପଦବୀ ପାଇଁ ଅର୍ଚ୍ଚନାଙ୍କୁ ପ୍ରାର୍ଥୀ କରାଯିବାକୁ ନିଷ୍ପତ୍ତି ହୋଇଥିଲା। ଅର୍ଚ୍ଚନାଙ୍କ ସ୍ବାମୀ ଅମ୍ବୁଆ ଜଗତ୍ସିଂହପୁର ପୌର ପରିଷଦ ଅନ୍ତର୍ଗତ ୪ନଂ. ୱାର୍ଡରୁ କଂଗ୍ରେସ ପ୍ରାର୍ଥୀ ହୋଇ ଲଗାତର ୨ ଥର କାଉନସିଲର ନିର୍ବାଚିତ ହୋଇଛନ୍ତି। ଏହା ପୂର୍ବରୁ ଏହି ୱାର୍ଡରୁ ୩ ଥର କଂଗ୍ରେସ ପ୍ରାର୍ଥୀମାନେ ଜିତିଛନ୍ତି। ତେଣୁ ୱାର୍ଡଟି କଂଗ୍ରେସର ଦୁର୍ଗ ବୋଲି ବିବେଚନା କରାଯାଏ। ଏଥିସହ ଅମ୍ବୁଆଙ୍କ ରାଜନୈତିକ ଦକ୍ଷତା ଓ ଆର୍ଥିକ ସ୍ଥିତି ସୁହାଇବ ବୋଲି କଂଗ୍ରେସର କେତେଜଣ ନେତା ପ୍ରକାଶ କରିଛନ୍ତି। ବୈଠକ ଆରମ୍ଭରେ ମିଶ୍ରଣ ପର୍ବ ହୋଇଥିଲା। ଏଥିରେ ଜଗତ୍ସିଂହପୁର ୧୨ନଂ. ୱାର୍ଡର ପୂର୍ବତନ ପାରିଷଦ ରଶ୍ମିରଞ୍ଜନ ମାଣିଆ, ପୂର୍ବତନ ପାରିଷଦ ମିନତି ମାଣିଆଙ୍କ ସମେତ ଶତାଧିକ ବିଜେଡି କର୍ମୀ କଂଗ୍ରେସରେ ସାମିଲ ହୋଇଥିଲେ।
ଜଗତ୍ସିଂହପୁର ପୌର ପରିଷଦ ଅଧୀନ ୨୧ଟି ୱାର୍ଡ ମଧ୍ୟରୁ ୧୩ଟିରେ କାଉନସିଲର ପଦବୀ ପାଇଁ ଆସନ ସଂରକ୍ଷଣ ହୋଇଛି। ୨୦୧୩ ନିର୍ବାଚନରେ କଂଗ୍ରେସ ପରିଷଦ ଦଖଲ କରିଥିଲା। ଆଗାମୀ ନିର୍ବାଚନରେ କ’ଣ ହେବ ତାକୁ ନେଇ ପ୍ରମୁଖ ରାଜନୈତିକ ଦଳଗୁଡିକ ପକ୍ଷରୁ ଅଙ୍କକଷା ଆରମ୍ଭ ହୋଇଯାଇଛି। ୨୦୧୩ ନିର୍ବାଚନରେ କଂଗ୍ରେସ ୧୨ଟି ୱାର୍ଡ ଦଖଲକୁ ନେଇଥିଲା। ସେଗୁଡିକ ହେଲା ୨, ୪, ୫, ୭, ୯, ୧୦, ୧୨, ୧୪, ୧୫, ୧୬ ଓ ୧୭, ୧୯ ନଂ. ୱାର୍ଡ। ବିଜେଡି ସପକ୍ଷରେ ୱାର୍ଡ ସଂଖ୍ୟା ୧, ୩, ୬, ୮, ୧୧, ୧୩, ୧୮, ୨୦ ଓ ୨୧କୁ ମିଶାଇ ମୋଟ ୯ଟି ଯାଇଥିଲା। ପରବର୍ତ୍ତୀ ସମୟରେ ୨୧ ନଂ. ୱାର୍ଡ କାଉନସିଲର ଦୀର୍ଘଦିନ ଅନୁପସ୍ଥିତ ରହିବାରୁ କଂଗ୍ରେସ ତାର ଦବଦବା ଜାହିର କରିବାକୁ ଅଧିକ ବଳ ପାଇଥିଲା। ୩୦ା୯ା୧୮ରେ ନିର୍ବାଚିତ ପ୍ରତିନିଧିମାନଙ୍କ କାର୍ଯ୍ୟକାଳ ସରି ଯାଇଥିଲା। ଏଥିମଧ୍ୟରେ ପାଖାପାଖି ୩ ବର୍ଷ ୪ ମାସ ଅତିକ୍ରାନ୍ତ ହୋଇଗଲାଣି। ଜିଲାପାଳ ପୌର ପ୍ରଶାସକ ଭାବେ ଦାୟିତ୍ୱ ନିର୍ବାହ କରୁଛନ୍ତି। ଆଗାମୀ ନିର୍ବାଚନରେ ପରିଷଦ ଅଧୀନ ୧ନଂ. ୱାର୍ଡ ଅନୁସୂଚିତ ଜାତି (ମହିଳା), ୨ନଂ. ମହିଳା, ୩ନଂ. ଅନୁସୂଚିତ ଜାତି (ମହିଳା), ୪ନଂ. ମହିଳା, ୫ନଂ. ମହିଳା, ୬ନଂ. ମହିଳା, ୮ନଂ. ମହିଳା, ୧୦ନଂ. ଅନୁସୂଚିତ ଜାତି, ୧୧ନଂ. ମହିଳା, ୧୩ନଂ. ଅନୁସୂଚିତ ଜନଜାତି (ମହିଳା), ୧୬ନଂ. ଅନୁସୂଚିତ ଜାତି, ୧୯ନଂ. ମହିଳା ଓ ୨୧ନଂ. ୱାର୍ଡ କାଉନସିଲର ପଦବୀ ମହିଳାଙ୍କ ପାଇଁ ସଂରକ୍ଷିତ ରହିଛି। ଉପାଧ୍ୟକ୍ଷ ପଦବୀ କିନ୍ତୁ କାଉନସିଲରମାନେ ବାଛିବେ।
