ବାରଙ୍ଗ,୬।୧(ଡି.ଏନ୍.ଏ.): ଦୀର୍ଘଦିନ ଧରି ଅସୁସ୍ଥ ହୋଇ ଚିକିତ୍ସିତ ହେଉଥିବା ନନ୍ଦନକାନନର ବାଘୁଣୀ ଆନିନୀ ମଙ୍ଗଳବାର ଆଖିବୁଜିଛି। ପ୍ରାଣୀଉଦ୍ୟାନର ବାଘ ସଫାରିରେ ରହି ଆନିନୀ ପର୍ଯ୍ୟଟକଙ୍କ ଆର୍କଷଣର କେନ୍ଦ୍ରବିନ୍ଦୁ ସାଜିଥିଲା। ହେଲେ ନନ୍ଦନକାନନ ଡାକ୍ତରୀ ଟିମ୍ ଶତ ପ୍ରଚେଷ୍ଟା ସତ୍ତ୍ୱେ ବାଘୁଣୀ ଆନିନୀକୁ ବଞ୍ଚାଇପାରି ନ ଥିଲେ। ସୂଚନାଯୋଗ୍ୟ, ଗତ ୨୮ ଜୁଲାଇ ୨୦୧୪ରେ ବାଘ ମନିଷି ଓ ବାଘୁଣୀ ସ୍ନେହା ଗର୍ଭରୁ ଜନ୍ମ ନେଇଥିଲା ବାଘୁଣୀ ଆନିନୀ। ୬ବର୍ଷ ବୟସରେ ପଦାପର୍ଣ କରିଥିବା ଆନିନୀ କୌଣସି କାରଣରୁ ଗତ ମାସରୁ ଅସୁସ୍ଥତା ଅନୁଭବ କରିଥିଲା। ଧୀରେ ଧୀରେ ଦୁର୍ବଳ ହେବା ସହ ଗୋଟିଏ ଜାଗାରେ ଛପି ରହିଥିଲା। ପରେ ଆହାର ମଧ୍ୟ ଛାଡ଼ିଦେଇଥିଲା। ବିଶେଷଜ୍ଞମାନଙ୍କ ପରାମର୍ଶ କ୍ରମେ ରକ୍ତହୀନତା ଯୋଗୁ ଆନିନୀ ଦୁର୍ବଳ ହୋଇଥିବାର ଅନୁମାନ କରି ସଫାରିର ସେଲ୍ ନଂ ୧ରେ ଚିକିତ୍ସା କରାଯାଇଥିଲା। କିନ୍ତୁ ଆନିନୀର ସ୍ବାସ୍ଥ୍ୟରେ ଉନ୍ନତି ହୋଇ ନ ଥିଲା। ଶେଷରେ ଭାଇ କ୍ରିଷ୍ଣାର ରକ୍ତ ସଂଗ୍ରହ କରାଯାଇ ପର୍ଯ୍ୟାୟକ୍ରମେ ଆନିନୀକୁ ଦିଆଯାଇଥିଲେ ମଧ୍ୟ ଆନିନୀ ମଙ୍ଗଳବାର ଅପରାହ୍ନ ୩ଟା ସମୟରେ ମୃତ୍ୟୁ କରିଥିଲା ା ବ୍ୟବଚ୍ଛେଦ ରିପୋର୍ଟ ଆସିଲେ ମୃତ୍ୟୁର ପ୍ରକୃତ କାରଣ ଜଣାପଡିବ ବୋଲି ଉପନିର୍ଦ୍ଦେଶକ ବିନଳ ପ୍ରଶନ୍ନ ଆଚାର୍ଯ୍ୟ ସୂଚନା ଦେଇଛନ୍ତି। ଏହି ବାଘ ମୃତ୍ୟୁ ପରେ ଏମାନଙ୍କ ସଂଖ୍ୟା ୨୬କୁ ହ୍ରାସ ପାଇଛି।
