ପାତ୍ରପୁର, ୨୦ା୭(ଡି.ଏନ୍.ଏ.)- ମୁଁ ବିଡିଓ କହୁଛି, ମାସ୍କ, ଗ୍ଲୋବ୍ସ ଓ ସାନିଟାଇଜର କିଣିବା ପାଇଁ ତୁମ ଆକାଉଣ୍ଟକୁ ୧୫ହଜାର ଟଙ୍କା ପଠାଯିବ କହି ଜଣେ ଅଙ୍ଗନଓ୍ବାଡି କର୍ମୀ ଓ ତାଙ୍କ ସମ୍ପର୍କୀୟଙ୍କ ଆକାଉଣ୍ଟରୁ ୧୪ ହଜାର ଟଙ୍କା ଲୁଟି ନେଇଛନ୍ତି ସାଇବର ଠକ।
ବୁରୁପଡା ଗ୍ରାମର ଆଶାକର୍ମୀଙ୍କ ମୋବଇଲକୁ ଗତ ୨ଦିନ ତଳେ ଏକ ଅଜଣା ନମ୍ବରରୁ କଲ ଆସିଥିଲା। ବିଡ଼ିଓ ପରିଚୟ ଦେଇ ସମ୍ପୃକ୍ତ ବ୍ୟକ୍ତି ୧୫ହଜାର ଟଙ୍କା ଛଡାଯିବ କାନାରା ବ୍ୟାଙ୍କର ଏଟିଏମ୍ ନମ୍ବର ଦେବାକୁ କହିଥିଲେ। ଆଶାକର୍ମୀ ଜଣକ କାନାରା ବ୍ୟାଙ୍କ ଏଟିଏମ୍ ନଥିବା କହିବା ପରେ ସମ୍ପର୍କୀୟଙ୍କ ନମ୍ବର ଦେବାକୁ କହିଥିଲେ। ଆଶାକର୍ମୀ ଜଣକ ଅଙ୍ଗନଓ୍ବାଡି କର୍ମୀଙ୍କୁ ଫୋନ ଦେଇଥିଲେ। ବିଡ଼ିଓଙ୍କ ଫୋନ କଲ ଭାବି ଅଙ୍ଗନବାଡି କର୍ମୀ ଜଣକ ନିଜର ଏବଂ ଗ୍ରାମର ଜଣେ ଯୁବକଙ୍କ ଏଟିଏମ୍ ନମ୍ବର ଓ ଓଟିପି ଦେବାପରେ ଉଭୟ ଆକାଉଣ୍ଟରୁ ୭ହଜାର ଲେଖାଏ ଟଙ୍କା ଗାଏବ ହୋଇଯାଇଥିଲା।
ସେହିପରି କନିରିଡାରେ ମଧ୍ୟ ସମାନ ଢଙ୍ଗରେ ଆଶାକର୍ମୀଙ୍କୁ ପ୍ରଥମେ କଲ୍ ଆସିଥିଲା। ସେ ଅଙ୍ଗନଓ୍ବାଡି କର୍ମୀ ମଞ୍ଜୁଶ୍ରୀ ମହାରଣାଙ୍କୁ ଫୋନ ଦେବାରୁ ଏହା ବିଡ଼ିଓଙ୍କ ନମ୍ବର ନୁହେଁ ବୋଲି କହିବାରୁ ଠକ ଜଣକ ଫୋନ୍ କାଟି ଦେଇଥିଲେ। ଅଙ୍ଗନବାଡି କର୍ମୀ ଏନେଇ ସିଡ଼ିପିଓଙ୍କୁ ଜଣାଇବା ସହ ବ୍ଲକର ବିଭିନ୍ନ ହ୍ବାଟ୍ସଆପ୍ ଗ୍ରୁପ୍ରେ ଉକ୍ତ ନମ୍ବର ଦେଇ ସଚେତନ କରିଛନ୍ତି।
