ପାତ୍ରପୁର, ୧୪ା୧୧(ଡି.ଏନ୍.ଏ.): ଓଡ଼ିଶା ମାନଚିତ୍ରରେ ଗାଁ ରହିଛି ହେଲେ ପ୍ରଶାସନିକ ଅବହେଳାରୁ ଏହି ଗାଁଗୁଡ଼ିକୁ ବିକାଶ ପହଞ୍ଚତ୍ ପାରିନାହିଁ। ପଡ଼ୋଶୀ ଆନ୍ଧ୍ରପ୍ରଦେଶ ଏହାର ସୁଯୋଗ ନେଇ କୋଟିଆ ପରେ ଗଞ୍ଜାମ ଜିଲା ପାତ୍ରପୁର ଉପରେ ଦୃଷ୍ଟି ପକାଇଛି। ପାତ୍ରପୁର ବ୍ଲକ ବୁରାତାଲ ପଞ୍ଚାୟତର ଗୁଡ଼ିଖଳା ଗ୍ରାମରେ ଥିବା ଘରଗୁଡ଼ିରେ ଆନ୍ଧ୍ର ପୋଷ୍ଟର ମାରିଛି। ଏଥିରେ ଆନ୍ଧ୍ର ତାର ବିଭିନ୍ନ ଯୋଜନା ସମ୍ପର୍କରେ ଉଲ୍ଲେଖ କରିଛି।
ପାତ୍ରପୁର ବ୍ଲକର ବୁରାତାଲ, ତୁମ୍ବା, ଆମ୍ବପୁର, ଗୁଣ୍ଡ୍ରା, ଖମ୍ବାରିଙ୍ଗା, ବରଙ୍ଗ, କେଶରିପଡ଼ା, ବିନୂଆଗାଁ , ଗୁଡ଼ିପଦର ଆଦି ପଞ୍ଚାୟତର କିଛି ଗ୍ରାମକୁ ଆନ୍ଧ୍ର ସୀମାନ୍ତ ଲାଗି ରହିଛି। ଏଥିରୁ ବୁରାତାଲ ପଞ୍ଚାୟତର ଗୁଡ଼ିଖଳା ଗ୍ରାମ ଆନ୍ଧ୍ର ସୀମାକୁ ଲାଗି ରହିଥିବା ବେଳେ ଆନ୍ଧ୍ର ପ୍ରଶାସନ ଗ୍ରାମରେ ପହଞ୍ଚତ୍ ବିଭିନ୍ନ କ୍ଷେତ୍ରରେ ବିକାଶ କରିଥିବା ଜଣାପଡ଼ିଛି। ଗ୍ରାମବାସୀଙ୍କ ପାଖରେ ଗୁଡ଼ିଖଳା ଗ୍ରାମବାସୀ ବୋଲି ଭୋଟର ପରିଚୟ ପତ୍ର, ରାଶନ କାର୍ଡ ରହିଥିବା ବେଳେ ଆନ୍ଧ୍ର ପ୍ରଦେଶର ଶ୍ରୀକାକୁଲମ ଜିଲା ମୁଶା ମଣ୍ଡଳ ବୁଡ଼ାରସିଙ୍ଗି ପଞ୍ଚାୟତର କୁରୁଡ଼ାଲୁ ଗ୍ରାମବାସୀ ବୋଲି ଭୋଟର କାର୍ଡ, ରାଶନ କାର୍ଡ, ଆଧାର କାର୍ଡ ଓ ଭତ୍ତା କାର୍ଡ ଓ ସ୍ବାସ୍ଥ୍ୟ ବୀମା କାର୍ଡ ରହିଛି। ସେହିଭଳି ଗଜପତି ଜିଲା ରାୟଗଡ଼ା ବ୍ଲକ ଗଙ୍ଗାବାଡ଼ ପଞ୍ଚାୟତର ଗୁଡ଼ିଖାଳି ଗ୍ରାମରେ ରହିଲା ଭଳି କେତେଜଣ ଆଦିବାସୀଙ୍କ ପାଖରେ ପରିଚୟପତ୍ର ରହିଛି। ଓଡ଼ିଶାର ଦୁଇଟି ଜିଲାର ଦୁଇଟି ବ୍ଲକରେ ଏହି ୨ଟି ଗ୍ରାମ ଥିଲେ ମଧ୍ୟ କୌଣସି ସୁବିଧା ସୁଯୋଗ ଗ୍ରାମବାସୀ ପାଇନାହାନ୍ତି। ଏହାର ସୁଯୋଗ ନେଇ ଆନ୍ଧ୍ର ପ୍ରଶାସନ ଉକ୍ତ ଗ୍ରାମକୁ ବିଦ୍ୟୁତ୍, ପାନୀୟ ଜଳ, ଛାତ୍ରୀଛାତ୍ରଙ୍କୁ ଶିକ୍ଷା, ରାଶନ ସାମଗ୍ରୀ ସହ ବୃଦ୍ଧାବୃଦ୍ଧଙ୍କୁ ମାସିକ ୨୨୫୦ ଟଙ୍କା ଭତ୍ତା ଦେଇ ନିଜ ଆଡ଼କୁ ନେଇଛି।
ପାତ୍ରପୁର ବ୍ଲକ ତରଫରୁ କେତେଜଣ ବ୍ୟକ୍ତିଙ୍କୁ ଇନ୍ଦିରାଆବାସ ମିଳିଥିବା ବେଳେ ଆଉ କିଛି ପରବାରକୁ ଆନ୍ଧ୍ର ସରକାର ଘର ଯୋଗାଇ ଦେଇଛନ୍ତି। ସେହି ଘର ବାରଣ୍ଡାରେ ଆନ୍ଧ୍ର ସରକାରଙ୍କ କଲ୍ୟାଣ କ୍ୟାଲେଣ୍ଡର ଟଙ୍ଗା ହୋଇଛି। ଏଥିରେ ଆନ୍ଧ୍ର ସରକାରଙ୍କ ବିଭିନ୍ନ ଯୋଜନାରେ କେତେ ଟଙ୍କା ହିତାଧିକାରୀଙ୍କୁ ମିଳିବ ସେଥିରେ ଉଲ୍ଲେଖ ଅଛି। ପାତ୍ରପୁର ବ୍ଲକର ବୁରାତାଲ ପଞ୍ଚାୟତରୁ ମାସିକ ୫୦୦ ଟଙ୍କା ଭତ୍ତା ମିଳୁଥିବାବେଳେ ଆନ୍ଧ୍ର ପ୍ରଦେଶରୁ ତାରିସିଙ୍ଗି ପଞ୍ଚାୟତ କାର୍ଯ୍ୟାଳୟରେ ୨୨୫୦ ଟଙ୍କାର ଭତ୍ତା ମିଳୁଥିବା ଆଦିବାସୀମାନେ ପ୍ରକାଶ କରିଛନ୍ତି। ଗ୍ରାମରେ ରହିଥିବା ୨୭ ଆଦିବାସୀ ପରିବାରଙ୍କ ଗମନାଗମନ ପାଇଁ ଓଡ଼ିଶାର ଉଭୟ ବ୍ଲକ ଆଖି ବୁଜିଦେଇଥିବା ବେଳେ ଆନ୍ଧ୍ର ସରକାର ଗାଁ ମୁଣ୍ଡ ଉପରେ ଥିବା କଳିଙ୍ଗ ଦଳା ଜଳଭଣ୍ଡାର ପର୍ଯ୍ୟନ୍ତ ରାସ୍ତା ନିର୍ମାଣ କରିଛି। ସ୍ବାସ୍ଥ୍ୟ ସୁବିଧା ପାଇଁ ଓଡ଼ିଶାର ପାଖ ସ୍ବାସ୍ଥ୍ୟ କେନ୍ଦ୍ରକୁ ଆସିଲେ ୩୦୦ ଟଙ୍କା ଖର୍ଚ୍ଚ ହେଉଥିବା ବେଳେ ଆନ୍ଧ୍ରର ଶିରିପୁର ସ୍ବାସ୍ଥ୍ୟ କେନ୍ଦ୍ରରେ ମାଗଣା ସ୍ବାସ୍ଥ୍ୟ ସେବା ମିଳୁଥିବା ଜଣାପଡ଼ିଛି। ପ୍ରତି ମାସରେ ଆନ୍ଧ୍ର ଅଧିକାରୀ ଗ୍ରାମରେ ପହଞ୍ଚତ୍ ବିଭିନ୍ନ ସୁବିଧା ଅସୁବିଧା ବୁଝୁଥିବା ବେଳେ ଓଡ଼ିଶାର କୌଣସି ପ୍ରଶାସନିକ ଅଧିକାରୀ ଗାଁକୁ ଆସି ନ ଥିବା ଗ୍ରାମର କିଛି ବ୍ୟକ୍ତି ଅଭିଯୋଗ କରିଛନ୍ତି।
