ଭଣ୍ଡାରିପୋଖରୀ,୧୬।୧୧(ଡି.ଏନ.ଏ.): ଭଦ୍ରକ ଜିଲା ଭଣ୍ଡାରିପୋଖରୀ ବ୍ଲକ ଷୋଳମପୁର ପଞ୍ଚାୟତ ମଣିନାଥପୁର ଚବିଶକୁଦ ଠାରେ ବୈତରଣୀ ନଦୀଶଯ୍ୟାରୁ ବୌଦ୍ଧ କୀର୍ତ୍ତିରାଜି ଉଦ୍ଧାର ହୋଇଛି। ଗବେଷକ ବିଶ୍ବମ୍ବର ରାଉତଙ୍କ ଉଦ୍ୟମ କ୍ରମେ ଉଦ୍ଧାର ହୋଇଥିବା ୮ଟି ଅର୍ଘ୍ୟ ସ୍ତୂପ ଓ ୫୦ରୁ ଊଦ୍ଧର୍ବ ପ୍ରାଚୀନ ମାଟିପାତ୍ରକୁ ଷୋଳମପୁର ବୌଦ୍ଧ ବିହାର ସଂଗ୍ରହାଳୟକୁ ହସ୍ତାନ୍ତର କରାଯାଇଛି।
ପ୍ରକାଶ ଯେ, ଗ୍ରାମର ମଦନ ବେଉରିଆଙ୍କ ପୁଅ ସୁଧାଂଶୁ ନଦୀପଠାକୁ ଯାଇଥିବା ସମୟରେ ଏକ ପ୍ରସ୍ତର ମୂର୍ତ୍ତି ଦେଖି ଗବେଷକ ରାଉତଙ୍କୁ ଜଣାଇଥିଲେ। ରାଉତ ଘଟଣାସ୍ଥଳରେ ପହଞ୍ଚି ଏହା ଏକ ଭୋଟିଭି ସ୍ତୂପ ଓ ବୌଦ୍ଧ ବିହାରର ପ୍ରାଚୀନ ଅଂଶ ବିଶେଷ ବୋଲି ଜାଣି ଏହାକୁ ସଂଗ୍ରହ କରିଥିଲେ। ଗ୍ରାମର ସୁଧାଂଶୁ ଓ ରଘୁନାଥ ତାଙ୍କୁ ସହଯୋଗ କରିଥିଲେ। ପ୍ରତ୍ନତତ୍ତ୍ୱବିତ୍ ସୁନୀଲ ପଟ୍ଟନାୟକ ଓ ଗବେଷକ ଡ.ଏକାଦଶୀ ପାଢ଼ୀଙ୍କ ମତରେ ଉଦ୍ଧାର ସମସ୍ତ ଅର୍ଘ୍ୟ ସ୍ତୂପ ଓ ମାଟିପାତ୍ର ଅଷ୍ଟମ ଓ ନବମ ଶତାବ୍ଦୀର। ୪ଟି ଭୋଟିଭି ସ୍ତୂପ ମଧ୍ୟରୁ ୩ଟିରେ ବୌଦ୍ଧ ଦେବୀ ତାରାଙ୍କ ମୂର୍ତ୍ତି ଥିବାବେଳେ ଅନ୍ୟ ଗୋଟିଏରେ ମୈତ୍ରେୟଙ୍କ ଅସ୍ପଷ୍ଟ ମୂର୍ତ୍ତି ଦେଖିବାକୁ ମିଳିଛି। ଅନ୍ୟ ୪ଟି ସାଧାରଣ ଅର୍ଘ୍ୟ ସ୍ତୂପ ଅଟେ। ପ୍ରତ୍ନତାତ୍ତ୍ୱିକ ଦୃଷ୍ଟିକୋଣରୁ ଏଗୁଡ଼ିକ ତାନ୍ତ୍ରିକ ମହାଜନ ବୌଦ୍ଧଧର୍ମ ସମୟର। ଉଦ୍ଧାର ମାଟିପାତ୍ରକୁ ବୌଦ୍ଧ ସନ୍ନ୍ୟାସୀମାନେ ବ୍ୟବହାର କରୁଥିଲେ ବୋଲି ଡ. ପଟ୍ଟନାୟକ କହିଛନ୍ତି।
