ଭୁବନେଶ୍ୱର, ୧୦।୯ (କ୍ରୀଡ଼ା ପ୍ରତିନିଧି): ବାସ୍କେଟବଲ ଫେଡେରେଶନ ଅଫ ଇଣ୍ଡିଆ (ଏଫ୍ଆଇବିଏ) ଆନୁକୂଲ୍ୟରେ ବେଙ୍ଗାଲୁରୁଠାରେ ୧୮ ବର୍ଷରୁ କମ୍ ଏସିଆନ ମହିଳା ବାସ୍କେଟବଲ ଚାମ୍ପିୟନଶିପ୍ ଆରମ୍ଭ ହୋଇଛି। ଏଥିରେ ଓଡ଼ିଶାର ଅନନ୍ୟା ପଟ୍ଟନାୟକ ପରିସଂଖ୍ୟାନବିତ୍ଭାବେ ଦାୟିତ୍ୱ ତୁଲାଇବାର ସୌଭାଗ୍ୟ ପାଇଛନ୍ତି। ପ୍ରଥମ ଓଡ଼ିଆ ଭାବେ ସେ ଏହି ଦାୟିତ୍ୱ ପାଇଛନ୍ତି। ଭୁବନେଶ୍ୱରର ଅନନ୍ୟାଙ୍କ ମା’ ଭାଷା ପଟ୍ଟନାୟକ ଏବଂ ବାପା ଦିଗନ୍ତ କେଶରୀ ପଟ୍ଟନାୟକ। ସ୍କୁଲ କ୍ୟାରିୟରରେ ୧୦୦, ୨୦୦ ମିଟର ରେସ୍, ଓ ଲଙ୍ଗଜମ୍ପ ରେ ଭାଗ ନେଇଥିବା ଅନନ୍ୟା କବାଡି ଦଳର ଅଧିନାୟିକା ଥିଲେ। କଲେଜ କ୍ୟାରିୟରରେ ମଧ୍ୟ ସେ ବିଭିନ୍ନ ଆଥଲେଟିକ୍ ଓ ବାସ୍କେଟବଲ ଟୁର୍ନାମେଣ୍ଟରେ ଅଂଶଗ୍ରହଣ କରିଛନ୍ତି। ଗତ ୩ ଓ ୪ ତାରିଖରେ ଅନୁଷ୍ଠିତ ବାସ୍କେଟବଲ ପରିସଂଖ୍ୟାନବିତ୍ ପରୀକ୍ଷାରେ କୃତକାର୍ଯ୍ୟ ହୋଇ ଏଫ୍ଆଇବିଏ ଲାଇସେନ୍ସ ହାସଲ କରିଥିଲେ ଏବଂ ୧୮ ବର୍ଷରୁ କମ୍ ଏସିଆନ ମହିଳା ବାସ୍କେଟବଲ ଚାମ୍ପିୟନଶିପ୍ରେ ଦାୟିତ୍ୱ ତୁଲାଇବା ପାଇଁ ମନୋନୀତ ହୋଇଥିଲେ।
