ନୂଆଦିଲ୍ଲୀ,୧୯।୧୧: ବଲିଉଡ୍ ଅଭିନେତ୍ରୀ ଅନନ୍ୟା ପାଣ୍ଡେ ଏବେ ନିଜ ୱେବ୍ ସିରିଜ୍ ‘କଲ୍ ମି ବେ’ର ଦ୍ୱିତୀୟ ସିଜନ୍କୁ ନେଇ ଚର୍ଚ୍ଚାରେ ଅଛନ୍ତି । ଏହାରି ମଧ୍ୟରେ ସେ କରନ ଜୋହରଙ୍କ ଲୋକପ୍ରିୟ ଟକ୍ ଶୋ’ ‘କଫି ୱିଥ୍ କରନ’ ସିଜନ୍ ୯ରେ ନଜର ଆସିଛନ୍ତି । ଏହି ଏପିସୋଡ୍ରେ ଅନନ୍ୟାଙ୍କ ସହ ବିଜନେସ୍ୱିମେନ୍ ଅନନ୍ୟା ବିର୍ଲା ମଧ୍ୟ ଯୋଗ ଦେଇଥିଲେ । ନଭେମ୍ବର ୧୮ ତାରିଖ ବୁଧବାର ଦିନ ଜିଓ ହଟ୍ଷ୍ଟାରରେ ଏହି ଏପିସୋଡ୍ ଷ୍ଟ୍ରିମିଂ ହୋଇଛି । ଶୋ’ରେ ଅନନ୍ୟା ନିଜ ପେସାଦାର ଜୀବନ ସହ ବ୍ୟକ୍ତିଗତ ଜୀବନକୁ ନେଇ ମଧ୍ୟ ଅନେକ କଥା କହିଛନ୍ତି। ବିଶେଷ କରି ତାଙ୍କ ଲଭ୍ ଲାଇଫ୍ ଓ ରିଲେସନ୍ସିପ୍ ଷ୍ଟାଟସ୍କୁ ନେଇ ଖୋଲାଖୋଲି ମତ ରଖିଛନ୍ତି ଅଭିନେତ୍ରୀ।
କରନ ଜୋହରଙ୍କ ସହ କଥାବାର୍ତ୍ତା ବେଳେ ଅନନ୍ୟା କହିଛନ୍ତି ଯେ, ବର୍ତ୍ତମାନ ସେ ସିଙ୍ଗଲ୍ ଅଛନ୍ତି ଏବଂ ଏହି ସମୟକୁ ବେଶ୍ ଉପଭୋଗ କରୁଛନ୍ତି। ନୂଆ ସମ୍ପର୍କରେ ଯୋଡ଼ି ହେବା ପୂର୍ବରୁ ସେ ନିଜ ଉପରେ ଧ୍ୟାନ ଦେବାକୁ ଚାହୁଁଛନ୍ତି । ଅନନ୍ୟା କହିଥିଲେ, “ମୁଁ କେବେ ଭାବି ନଥିଲି ଯେ ଏମିତି କହିବି, କିନ୍ତୁ ସିଙ୍ଗଲ୍ ରହି ମୁଁ ସତରେ ବହୁତ ଖୁସି ଅଛି।” ଏହା ଶୁଣି କରନ ଜୋହର ମଜାଳିଆ ଢଙ୍ଗରେ କହିଥିଲେ, “ଏହି କ୍ଲବ୍କୁ ତୁମକୁ ସ୍ୱାଗତ।”
ବର୍ତ୍ତମାନ ସିଙ୍ଗଲ୍ ଥିଲେ ମଧ୍ୟ ବିବାହକୁ ନେଇ ଅନନ୍ୟାଙ୍କ ମନରେ ରହିଛି ଅନେକ ଆଗ୍ରହ। ତାଙ୍କୁ ବିବାହର ଧାରଣା ବେଶ୍ ପସନ୍ଦ ବୋଲି ସେ କହିଛନ୍ତି । ଜୀବନସାରା ଜଣେ ବ୍ୟକ୍ତିଙ୍କ ସହ ରହିବାକୁ ସେ ଉତ୍ସାହିତ ଥିବା ମଧ୍ୟ କହିଛନ୍ତି । ଅନନ୍ୟାଙ୍କ କହିବା ଅନୁଯାୟୀ, “ମୋତେ ଲାଗୁଛି ମୋର ଜନ୍ମ ବିବାହ କରିବା ପାଇଁ ହୋଇଛି। ମୋତେ ବିବାହର ବିଚାର ବହୁତ ଭଲ ଲାଗେ। ଜୀବନସାରା ଜଣେ ବ୍ୟକ୍ତିଙ୍କ ସହ ରହିବା କଥା ଭାବି ମୁଁ ଉତ୍ସାହିତ ହୋଇଯାଏ।”
ଅନନ୍ୟାଙ୍କ ଏହି ବୟାନ ପରେ ୱାକର ବ୍ଲାଙ୍କୋଙ୍କ ସହ ତାଙ୍କ କଥିତ ସମ୍ପର୍କକୁ ନେଇ ପୁଣି ଚର୍ଚ୍ଚା ଆରମ୍ଭ ହୋଇଛି। ୨୦୨୪ରୁ ଉଭୟ ପରସ୍ପରକୁ ଡେଟ୍ କରୁଥିବା ନେଇ ଖବର ପ୍ରକାଶ ପାଇଥିଲା। ତେବେ ଉଭୟଙ୍କ ମଧ୍ୟରୁ କେହି ମଧ୍ୟ ସର୍ବସାଧାରଣରେ ଏହି ସମ୍ପର୍କକୁ ସ୍ୱୀକାର କରିନଥିଲେ। ଅନ୍ୟପଟେ, ଅଗଷ୍ଟ ୨୦୨୬ରେ ଅନନ୍ୟା ଓ ୱାକରଙ୍କ ମଧ୍ୟରେ ବ୍ରେକ୍ଅପ୍ ହୋଇଥିବା ନେଇ ଖବର ଆସିଥିଲା। ଏକ ରିପୋର୍ଟରେ ଉଭୟ ପାରସ୍ପରିକ ସହମତିରେ ଅଲଗା ହୋଇଥିବା ଦାବି କରାଯାଇଥିଲା। ତେବେ ଏହି ସମ୍ପର୍କ କିମ୍ବା ବ୍ରେକ୍ଅପ୍କୁ ନେଇ ଅନନ୍ୟା କିମ୍ବା ୱାକର କେହି ମଧ୍ୟ ଆଧିକାରିକ ବୟାନ ଦେଇନାହାନ୍ତି ।

