ଓଡ଼ିଶୀ ନୃତ୍ୟର ଜଣେ ପ୍ରତିଭାମୟୀ ନୃତ୍ୟଶିଳ୍ପୀ ଭାବେ ଓଡ଼ିଶାର ବିଭିନ୍ନ ସାଂସ୍କୃତିକ ସମାରୋହ ସମେତ ରାଜ୍ୟ ବାହାରେ ପଶ୍ଚିମବଙ୍ଗ, ତେଲଙ୍ଗାନା, ଦିଲ୍ଲୀ ଆଦି ସ୍ଥାନରେ ଆୟୋଜିତ କାର୍ଯ୍ୟକ୍ରମରେ ଦେଖିବାକୁ ମିଳିଛି ତାଙ୍କ ନୃତ୍ୟର ଝଲକ, ଯାହାକି ନା କେବଳ ଦର୍ଶକଙ୍କ ମନ ମୋହିଛି ବରଂ ଏଥିପାଇଁ ତାଙ୍କୁ ମିଳିଛି ଅନେକ ପ୍ରଶଂସା ଓ ପୁରସ୍କାର। ସେ ହେଉଛନ୍ତି ଆଚାର୍ଯ୍ୟ ବିହାର, ଭୁବନେଶ୍ୱର ବାସିନ୍ଦା ରୁମା ଏବଂ ଅସିତ କୁମାର ବସୁମଲ୍ଲିକଙ୍କ ଝିଅ ସୁଶ୍ରୀ ବିଦିଶା। ବର୍ତ୍ତମାନ ସେ ରମାଦେବୀ ମହିଳା ବିଶ୍ୱବିଦ୍ୟାଳୟର ଯୁକ୍ତ ୩ କଳା ୧ମ ବର୍ଷ ଛାତ୍ରୀ। ସେ କୁହନ୍ତି, ”ପିଲାବେଳୁ ଡ୍ୟାନ୍ସ ପ୍ରତି ଖୁବ୍ ଆଗ୍ରହ ରହି ଆସିଛି। ଘର ପାଖରେ ଥିବା ଏକ ଡ୍ୟାନ୍ସ କ୍ଲାସ୍ରେ ଯେବେ ଅନ୍ୟମାନଙ୍କୁ ପ୍ରାକ୍ଟିସ୍ କରୁଥିବାର ଦେଖୁଥିଲି ନିଜେ ମଧ୍ୟ ସେମାନଙ୍କ ଭଳି ଡ୍ୟାନ୍ସ କରିବାକୁ ଚେଷ୍ଟା କରୁଥିଲି। ମୋର ଏହି ଆଗ୍ରହ ଦେଖି ଜେଜେବାପା ଇଂ. ବଳରାମ ପ୍ରସାଦ ବସୁମଲ୍ଲିକ ସର୍ବପ୍ରଥମେ ଏ ଦିଗରେ ଆଗକୁ ବଢ଼ିବାକୁ ପ୍ରେରଣା ଯୋଗାଇ ଦେଇଥିଲେ। ମା’ବାପା ମଧ୍ୟ ଆବଶ୍ୟକ ପ୍ରୋତ୍ସାହନ ଯୋଗାଇ ଦେଇଥିଲେ। ଆଜିଯାଏ ମୋର ପ୍ରତ୍ୟେକ ସଫଳତା ପଛରେ ସେମାନଙ୍କ ଅବଦାନ ଅତୁଳନୀୟ।“ ବିଦିଶାଙ୍କୁ ମାତ୍ର ୧୭ ବର୍ଷ ବୟସରେ ନ୍ୟୁ ଦିଲ୍ଲୀରୁ ସର୍ବୋତ୍ତମ ନୃତ୍ୟଶିଳ୍ପୀ ଭାବରେ କନିଷ୍ଠ ବର୍ଗର ବୃତ୍ତି ପ୍ରାପ୍ତ ହୋଇଛି। କେବଳ ଏତିକି ନୁହେଁ; ତାଙ୍କୁ ପ୍ରଜ୍ଞା ପ୍ରତିଭା ସମ୍ମାନ-୨୦୧୮, କଳାକାର ସମ୍ମାନ-୨୦୧୯, ନବ ଉନ୍ମେଷ ସମ୍ମାନ-୨୦୧୯, ଇଣ୍ଟରନ୍ୟାଶନାଲ ଫେଷ୍ଟିଭାଲ- ୨୦୨୦ ଭଳି ଅନେକ ପୁରସ୍କାର ମିଳିଛି। ନୃତ୍ୟାଚାର୍ଯ୍ୟ ଗୁରୁଶ୍ରୀ ଦୁର୍ଗା ଚରଣ ରଣବୀରଙ୍କ ନୃତ୍ୟାନୁଷ୍ଠାନ ‘ନୃତ୍ୟାୟନ’ରୁ ମନୋଜ କୁମାର ପ୍ରଧାନଙ୍କଠାରୁ ନୃତ୍ୟଶିକ୍ଷା ଲାଭ କରିଛନ୍ତି। ନୃତ୍ୟ ବ୍ୟତୀତ ବିଦିଶା ଅଭିନୟ କ୍ଷେତ୍ରରେ ମଧ୍ୟ ରୁଚି ରଖନ୍ତି। ବଙ୍ଗଳାର ବେଶ୍ ଲୋକପ୍ରିୟ ଲୋକଗୀତ ‘ଗେଣ୍ଡା ଫୁଲ୍ର କଭର’ ଗୀତରେ ଅଭିନୟ କରି ବେଶ୍ ଲୋକପ୍ରିୟ ପାଇପାରିଛନ୍ତି। ତାଙ୍କ ଦ୍ୱାରା ଅଭିନୀତ ତୁ ରଜା ଝିଅ ମୁଁ ରିକ୍ସାବାଲା, ଇସାରା, ଅଭିମାନିନୀ ଏ ଅମାନିଆ ଢେଉ ଭଳି ଓଡ଼ିଆ ମ୍ୟୁଜିକ୍ ଆଲବମ୍ ଭିଡିଓ ମିଲିଅନ ଦର୍ଶନଙ୍କ ଦ୍ୱାରା ଆଦୃତ ହେଇପାରିଛି। ଖୁବ୍ଶୀଘ୍ର ତାଙ୍କ ଅଭିନୀତ ଓଡ଼ିଆ ମ୍ୟୁଜିକ୍ ଆଲବମ୍ ପାଉଁଜି ମୁକ୍ତିଲାଭ କରିବାକୁ ଯାଉଛି। ଆଗାମୀ ଦିନରେ ସୁଶ୍ରୀ ବିଦିଶା ଆମ ରାଜ୍ୟର ଗର୍ବ ଓ ଗୌରବ ଓଡ଼ିଶୀ ନୃତ୍ୟକୁ ଦେଶ ବିଦେଶରେ ପ୍ରଚାର ଓ ପ୍ରସାର କରିବା ସହ ଅଭିନୟ କ୍ଷେତ୍ରରେ ନିଜକୁ ପ୍ରତିଷ୍ଠିତ କରିବାକୁ ଲକ୍ଷ୍ୟ ରଖିଛନ୍ତି।
