ବ୍ରହ୍ମପୁର ଅଫିସ୍,୨୫ା୪: କରୋନା ମହାମାରୀର ଦ୍ୱିତୀୟ ଲହରକୁ ରୋକିବାକୁ ନେଇ ସହରାଞ୍ଚଳରେ ହୋଇଥିବା ସପ୍ତାହାନ୍ତ ଶଟ୍ଡାଉନ ରବିବାର ଦ୍ୱିତୀୟ ଦିନରେ ପହଞ୍ଚିଛି। ଦ୍ୱିତୀୟ ଦିନରେ ମହାନଗରରେ ସମାନ ସ୍ଥିତି ଦେଖିବାକୁ ମିଳିଥିଲା। ପୋଲିସ ପକ୍ଷରୁ କଡ଼ାକଡ଼ି ଯାଞ୍ଚ କରାଯିବା ସହ ଗହଳି ସ୍ଥାନରେ ପାଟ୍ରୋଲିଂ କରାଯାଇ ଲୋକଙ୍କୁ ତାଗିଦ୍ କରାଯାଇଥିଲା। ଅନ୍ୟପକ୍ଷେ ଶଟ୍ଡାଉନ ସମୟରେ ଅତ୍ୟାବଶ୍ୟକ ସାମଗ୍ରୀ ସମେତ ହୋଟେଲ ଖାଦ୍ୟ ପଦାର୍ଥର ହୋମ୍ ଡେଲିଭରି ନେଇ ବିଏମ୍ସି ପକ୍ଷରୁ ଅନୁମତି ମିଳିଛି। ଏହି ସମୟରେ ଖାଦ୍ୟ ଯୋଗାଉଥିବା ଡେଲିଭରି ବୟ କୋଭିଡ୍ ନିୟମ ଉଲ୍ଲଂଘନ କରୁଥିବା ଅଭିଯୋଗ ହୋଇଛି। ସହରର ବିଭିନ୍ନ ଛକରେ ବିନା ମାସ୍କ ଓ ସାମାଜିକ ଦୂରତା ବଜାୟ ନ ରଖି ଦୀର୍ଘ ସମୟ ଧରି ଗହଳି କରୁଛନ୍ତି। ସହରର ପୁରୁଣା ବସ୍ଷ୍ଟାଣ୍ଡ ଓ ଗିରିଜା ଛକ ଆଦି ଅଞ୍ଚଳରେ ରହିଥିବା ବିଭିନ୍ନ ରେଷ୍ଟୁରାଣ୍ଟ ସମ୍ମୁଖରେ ଡେଲିଭରି ବୟ ଗହଳି କରୁଛନ୍ତି। ଏଣୁ କୋଭିଡ୍ ନିୟମ ଉଲ୍ଲଂଘନ କରୁଥିବା ଡେଲିଭରି ବୟଙ୍କ କ୍ଷେତ୍ରରେ କାର୍ଯ୍ୟାନୁଷ୍ଠାନ ପାଇଁ ଦାବି ହୋଇଛି। ଏନେଇ ବିଏମ୍ସି ଖାଦ୍ୟ ବିଭାଗ ଅଧିକାରୀ ସସ୍ମିତା ଖାଡଙ୍ଗାଙ୍କୁ ପଚାରିବାରୁ ଘଟଣାର ତଦନ୍ତ କରି ଆବଶ୍ୟକ କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଛନ୍ତି।
