ନୂଆଦିଲ୍ଲୀ,୧୭ ।୧୨: ସ୍ୱରାଷ୍ଟ୍ରମନ୍ତ୍ରୀ ଅମିତ ଶାହାଙ୍କ ପଶ୍ଚିମବଙ୍ଗ ଗସ୍ତକୁ ନେଇ ସ୍ୱତନ୍ତ୍ର ବ୍ୟବସ୍ଥା କରୁଛି ସୁରକ୍ଷା ଏଜେନ୍ସି । ଭାରତୀୟ ଜନତା ପାର୍ଟି(ଭାଜପା)ର ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡାଙ୍କ ରାଲି ଉପରେ ପଶ୍ଚିମବଙ୍ଗରେ ଆକ୍ରମଣ ପରେ ଶାହାଙ୍କ ସୁରକ୍ଷାକୁ ବଢାଇ ଦିଆଯାଇଛି । କ୍ଲୋଜ ପ୍ରୋଟେକ୍ସନ ଟିମ୍ ଓ ଆଉଟର ପ୍ରୋଟେକ୍ସନ ଟିମ୍ରେ ଥିବା ଯବାନଙ୍କ ସଂଖ୍ୟା ବଢାଇ ଦିଆଯାଇଛି ବୋଲି ଜଣାପଡିଛି । ଶାହାଙ୍କ ସୁରକ୍ଷା ପାଇଁ କେନ୍ଦ୍ରୀୟ ସୁରକ୍ଷା ବଳ ଓ ଷ୍ଟେଟ ଆର୍ମଡ ପୋଲିସ ଉପସ୍ଥିତ ରହିବେ । ରୋଡ ଶୋ’ ଓ ଜନସଭା ସମୟରେ ସଡ଼କ ଉପରେ ଥିବା ଲୋକଙ୍କର ମହତ୍ୱପୂର୍ଣ୍ଣ ସ୍ଥାନରେ ସ୍କ୍ରିନିଂ କରାଯିବ । ଭିଡ ମଧ୍ୟରେ ସାଦା ପୋଷାକରେ ସୁରକ୍ଷା ଏଜେନ୍ସିର ଯବାନ ରହିବେ । ସଭା ସ୍ଥଳ ଓ ରୋଡ ଶୋ’ ସ୍ଥାନରେ କାର୍ଯ୍ୟକ୍ରମ ପୂର୍ବରୁ ସୁରକ୍ଷା ଏଜେନ୍ସି ନିୟମିତ ଭାବେ ରିହରସାଲ କରିବେ । ସ୍ଥାନୀୟ ପୋଲିସକୁ ମଧ୍ୟ ସୁରକ୍ଷା ବ୍ୟବସ୍ଥାରେ ସହଯୋଗ କରିବାକୁ ନିର୍ଦ୍ଦେଶ ଦିଆଯିବ । ସୂଚନାଯୋଗ୍ୟ. ଶାହା ୧୯-୨୦ ଡିସେମ୍ବରକୁ ପଶ୍ଚିମବଙ୍ଗ ଗସ୍ତ କରିବାର କାର୍ଯ୍ୟକ୍ରମ ରହିଛି ।
