କୋଲକାତା,୧୫।୩: କେନ୍ଦ୍ର ସ୍ବରାଷ୍ଟ୍ୟ ମନ୍ତ୍ରୀ ଅମିତ ଶାହା ଦୁଇଦିନିଆ ପଶ୍ଚିମବଙ୍ଗ ଗସ୍ତରେ ଆସିଛନ୍ତି। ଏଠାରେ ଦୁଇଟି ସ୍ଥାନରେ ରାଲି କରିବାର କାର୍ଯ୍ୟକ୍ରମ ରହିଛି। ସୋମବାର ଝାରଗ୍ରାମରେ ଅନୁଷ୍ଠିତ ରାଲି ପୂର୍ବରୁ ଅମିତ ଶାହାଙ୍କ ହେଲିକପ୍ଟରରେ ବୈଷୟିକ ତ୍ରୁଟି ଦେଖାଦେଇଥିଲା। ଏଥିପାଇଁ ତାଙ୍କୁ ଏହି ରାଲିକୁ ଭର୍ଚୁଆଲ ଭାବେ ସମ୍ବୋଧିତ କରିବାକୁ ପଡ଼ିଥିଲା। ସାଧାରଣ ସଭାକୁ ସମ୍ବୋଧିତ କରି ଅମିତ ଶାହା କହିଛନ୍ତି ଯେ, ଆଜି ମୁଁ ଝାରଗ୍ରାମରେ ପ୍ରଚାର କରିବାକୁ ଯାଉଥିଲିି କିନ୍ତୁ ଦୁର୍ଭାଗ୍ୟବଶତଃ ମୋର ହେଲିକପ୍ଟର ଖରାପ ହୋଇଛି ଏବଂ ଆପଣଙ୍କୁ ଦେଖିବା ପାଇଁ ସୁଯୋଗ ପାଇଲି ନାହଁି। ଏହି ରାଲିରେ ଟିଏମସିକୁ ଟାର୍ଗେଟ କରି ଶାହା କହିଛନ୍ତି ଯେ, ଗତ ଦଶ ବର୍ଷ ମଧ୍ୟରେ ରାଜ୍ୟର ଗୁଣ୍ଡାରାଜ ଶିଖରରେ ପହଞ୍ଚିଛି। ଏବେ ହିନ୍ଦୁମାନଙ୍କୁ ପର୍ବପର୍ବାଣି କରିବା ପାଇଁ କୋର୍ଟର କବାଟ ବାଡ଼େଇବାକୁ ପଡ଼ୁଛି। ମମତା ବାନାର୍ଜୀ ସରକାର ରାଜ୍ୟର ବିକାଶକୁ ନଷ୍ଟ କରିଛନ୍ତି। ସେ ଆହୁରି କହିଛନ୍ତି ଯେ ଏକ ସମୟ ଥିଲା, ଯେତେବେଳେ ବେଙ୍ଗଲ ଭାରତର ନେତୃତ୍ୱ ନେଉଥିଲା। ବଙ୍ଗଳା ଶିକ୍ଷା, ସ୍ବାଧୀନତା ସଂଗ୍ରାମୀ ଏବଂ କୁଶଳୀ ନେତୃତ୍ୱର କେନ୍ଦ୍ର ଥିଲା, କିନ୍ତୁ ଏବେ ଏହା ଗୁଣ୍ଡରାଜରେ ପରିଣତ ହୋଇଛି ବୋଲି ସେ କହିଛନ୍ତି। ଗରିବ ଲୋକ ଉପକୃତ କରୁଥିବା କେନ୍ଦ୍ରର ୧୧୫ଟି ଯୋଜନା ରାଜ୍ୟରେ କାର୍ଯ୍ୟକାରୀ ହେବାକୁ ଦିଅଯାଉ ନାହିଁ ବୋଲି ଶାହା ଅଭିଯୋଗ କରିଛନ୍ତି।
